ئاشتى هه‌ورامى: ب تنێ دو هه‌يڤێن دى خوه ل مه بگرن
ئه‌ڤرۆ نيوز:
وه‌زيرێ سامانێن سرۆشتى ل حوكمه‌تا هه‌رێما كوردستانێ دبێژيت ب تنێ دو هه‌يڤێن دى مه دڤێن هه‌تا ژ به‌غدا بێ منه‌ت بين.
ئاشتى هه‌ورامى د هه‌ڤپه‌يڤينه‌كێ دا ل گه‌ل رووداو، راگه‌هاند: “ل هه‌يڤا چار يان پێنج يا ئه‌ڤ ساله هه‌رێما كوردستانێ دێ شێت ب په‌ترۆلا خوه، بێى به‌غدا ئه‌و بودجا به‌غدا بۆ هه‌رێما كوردستانێ دانايى كو 17% يه دابين بكه‌ت، هه‌تا دووماهيا سالێ ژى دێ شێت زێده‌تر دابين كه‌ت و پێدڤى ب به‌غدا نامينيت، دو هه‌يڤێن دى دێ بێ منه‌ت بين”.
هه‌ر چه‌نده حوكمه‌تا هه‌رێمێ پلان دانابوو هه‌تا دووماهيا 2015 هه‌رێمێ شيانێن هنارتنا ئێك مليۆن به‌رميلێن په‌ترۆلێ دێ هه‌بن، به‌لێ هه‌ورامى دبێژيت: “ژ به‌ر شه‌رێ داعش ئه‌ڤ پلانه بۆ شه‌ش هه‌يڤێن دى هاته پاشخستن، به‌لێ دشيان دايه هه‌تا دووماهيا ئه‌ڤ ساله ئاستێ به‌رهه‌مئينانێ بگه‌هينينه 750 هزار به‌رميلان د رۆژه‌كێ دا”.
وه‌زيرێ سامانێن سرۆشتى ئاماژێ ب وێ چه‌ندێ ژى دكه‌ت كو ل هه‌يڤا چار يان پێنج يا ئه‌ڤ ساله، هه‌رێما كوردستانێ دێ شێت ب ته‌مامى بێ به‌غدا ئه‌و بودجێ بۆ هاتيه ده‌ستنيشانكرن كو 17% يه دابين بكه‌ت و هه‌تا دووماهيا سالێ دشێت زێده‌ترى ڤى بودجه‌يى ژى ره‌وانه بكه‌ت.
