ئاشتی كۆچه‌ر: گرۆپێن نه‌شه‌رعی بووینه دارده‌ستێ حه‌شدا شه‌عبی
دهۆك، له‌زگین جوقی
به‌رپرسێ لقێ 17 یێ پارتی دیموكراتی كوردستان ل شنگالێ راگه‌هاند، خه‌لكێ شنگالێ گه‌له‌ك بیزاربووینه ژ هه‌بوونا گرۆپێن نه‌شه‌رعی هه‌روه‌سا دبێژیت، ڕه‌ڤاندنا كچ وزارۆیان ل شنگالێ یا به‌رده‌وامه.
ئاشتی كۆچه‌ر، به‌رپرسێ لقێ 17 یێ پارتی ل شنگالێ گوت” هندی ئیراق دبن هه‌ژمونا ئێرانێ دات بیت دێ ره‌وشا شنگالێ وه‌سا بیت وناهێلن چاره‌سه‌ر ببیت و یا دیاره په‌كه‌كه بۆ ئێرانێ ل شنگالێ كاردكه‌ت وده‌مێ ئێران باره‌گه‌هێن حزبێن رۆژهه‌لاتا كوردستانێ تۆپباران بكه‌ت ئه‌رێ بۆجی یێن په‌كه‌كێ تۆپباران ناكه‌ت؟ ئه‌ڤه تشته‌كێ رۆهن وئاشكرایه وپلانێن دوژمنانه ل سه‌ر كوردستانێ وهه‌تا نوكه په‌كه‌كه نه‌شیایه ل باكوری كوردستانێ تشته‌كێ بكه‌ت و هێشتا بهۆسته‌ك ژ ئاخا باكور رزگارنه‌كریه ل ڤێرێ دیاردبیت مه‌ره‌ما وان كوردستان نینه به‌لكو تنێ بۆ ده‌وله‌تان كاردكه‌ت وهه‌موو پلان و بزاڤێن په‌كه‌كێ ئه‌ون ته‌ناهی وشه‌رعیه‌ت ل شنگالێ په‌یدا نه‌بیت وئه‌ڤه مه‌ره‌ما وان یا سه‌ره‌كیه”.
ئاشتی كۆچه‌ر ، گۆت ژی” خه‌لكێ شنگالێ گه‌له‌ك بیزاربوویه ژبه‌ر گرۆپێن نه‌شه‌رعی چونكه تیرۆرستێن داعشێ كچ وژن و زارۆ ره‌ڤاندبوون، به‌لێ نوكه ل شنگالێ ڕه‌ڤاندنا كچ وزارۆیان یا به‌رده‌وامه وبه‌ری دوو رۆژان ژی ل شنگالێ كچه‌ك هاته ڕه‌ڤاندن وكه‌سوكارێن وێ بزاڤ وگه‌ف ل گرۆپێن نه‌شه‌رعی كرن هه‌تا شیاین كچا خوه رزگار بكه‌ن وژنه‌چاری وێ خیزانێ شنگال چۆلكر ودووباره ئاواره‌بوون وقه‌ستا هه‌رێما كوردستانێ كرن”.
خویاكر” خه‌لكێ شنگالێ ژبۆ پاراستنا ژیانا زارۆیێن خوه ماینه د ناڤ كه‌مپان دا ونه‌شێن بزڤرن شنگالێ، ئه‌و چه‌ندا تیرۆرستێن داعشێ ل شنگالێ ئه‌نجام ددا نوكه گرۆپێن نه‌شه‌رعی یێ هه‌مان ڕه‌فتار ل گه‌ل خه‌لكێ خه‌لكێ وێ دكه‌ن”.
ئاشتی كۆچه‌ر، دووپاتكر ژی”خه‌لك به‌رده‌وام ده‌ستان ژ گرۆپێن نه‌شه‌رعی یێ به‌رده‌ن وبه‌ری ده‌مه‌كی هه‌تا 100 كه‌سان ده‌ست ژ ئالیێن نه‌شه‌رعی به‌رداینه وهه‌موو یێن هاتینه پێشوازیكرن ژئالیێ مه‌ڤه وئه‌م كاردكه‌ین كو خزمه‌تا وان بهێته كرن ول ده‌مێ هه‌لبژارتنێن جڤاتا نوونه‌رێن ئیراقێ دیاربوو خه‌لكێ شنگالێ گرۆپێن نه‌شه‌رعی نه‌ڤین و په‌یاما خه‌لكێ شنگالێ ئه‌وه په‌كه‌كه و هه‌موو گرۆپێن ب سه‌رڤه شنگالێ چۆل بكه‌ن وئه‌و كه‌سێن د ناڤ په‌كه‌كێ و حه‌شدا شه‌عبی دا ژی كاردكه‌ن ئه‌م وێ باوه‌ری داینه خه‌لك ژ نه‌چارێ یێن چووینه د ناڤ ڕێزێن وان دا و ل هه‌لبژارتنان دیاربوو خه‌لكێ شنگالێ ب دل و جان ل گه‌ل پارتی دیموكراتی كوردستانن وده‌نگێن خوه دانه به‌ربژارێن پارتی “.
زێده‌تر گوت” دناڤ شنگالێ دا گرۆپێن نه‌شه‌رعی یێن بووینه دارده‌ستی هنده‌ك ئالیێن حه‌شدا شه‌عبی یێن سه‌ر ب ئێرانێ ڤه ومانا په‌كه‌كێ ل شنگالێ تنێ بۆ خوه‌شكرنا رێ یه بۆ پشته‌ڤانیكرنا ئێرانێ و ئه‌ڤه هه‌شت سال بۆرین و هه‌تا نوكه په‌كه‌كه بوویه ئه‌گه‌ر و ناهێلن ته‌ناهی وشه‌رعیه‌ت ل شنگال هه‌بیت و هه‌تا ده‌ستێ ئێرانێ دناڤ دا بیت و ئیراق ل بن هه‌ژموونا وێ بیت، ڕه‌وشا شنگالێ خوه‌ش نابیت وئاواره ژی نه‌شێن بزڤرن”.
