ئامادەكاریێن بەلاڤكرنا پارچەیێن ئەردی ل دهۆكێ د قوناغێن دووماهیێ دانە
، سندس سالح:
ل دووڤ راسپاردەیێن مەسرور بارزانی سەرۆكێ حكومەتا هەرێما كوردستانێ و دووڤچوونا بەردەواما د.عەلی تەتەر پارێزگەرێ دهۆكێ، رێڤەبەریا گشتی یا باژێرڤانیان ل پارێزگەها دهۆكێ، ب هەڤكاری ل گەل چەند رێڤەبەری و دامودەزگەهێن میری یا بەردەوامە ل سەر دابینكرنا پارچەیێن ئەردی بۆ فەرمانبەران و جه ل هەموو قەزا و ناحیان هاتینە دەستنیشانكرن و چاڤەڕێ دهێتە كرن ل دەمەكێ نێزیك ئەو ئەرد بۆ بەلاڤكرنێ یێ بەرهەڤ بیت.
ئەندازیار دیار بەحری رێڤەبەرێ گشتی یێ باژێرڤانیان ل پارێزگەها دهۆكێ د دیدارەكێ دا بۆ رۆژنامەیا ئەڤرۆ گۆت: دەمێ سەرۆكێ حكومەتا هەرێما كوردستانێ بڕیار دای پارچەیێن ئەردی ل سەر فەرمانبەران بەلاڤبكەت، مە وەك تیمەك كاركریە و گەلەك رۆژان هەتا پشتی دەوامێ و ب شەڤ ژی مە كاركرینە ژ بۆ هندێ ب زووترین دەم ئەرد بهێتە دەستنیشانكرن و قوناغێن باش دەربازكرینە، ئەز دشێم بێژم ل دەمەكێ نێزیك دێ ئامادەكاری ب دووماهی هێن و فەرمانبەر دێ ب وەرگرتنا پارچە ئەردێ خوە دلخۆش بن.
هەروەسا گۆت: ژ بەر كو فەرمانبەر نە بتنێ ل سەنتەرێ باژێری نە و ل قەزا و ناحیان ژی هەنە، لەورا ئەرد ژ دەرڤەی سنۆرێ سەنتەرێ باژێری دا هاتیە دەستنیشانكرن و ل هەموو قوناغێن باش دەربازكرینە و رەنگە خەلكەك بێژیت ئەڤ پرۆسەیە گیرۆ بوو، راستە بەس ل دووڤ یاسایێ رێكار هەنە هەتا ئەو رێكار ب دووماهی نەهێن تۆ نەشێی ئەردی بۆ بەلاڤكرنێ دانی، بۆ زانین ل هەر جهەكی ب تایبەت ژی ل مەرینا كو دهێتە گۆتن كێشە ل سەر ئەردی هەیە، ئەو ژی یا دهێتە چارەكرن و ل دووڤ یاسایێ دێ خودانێن وان پارچە زەڤیان هێنە قەرەبووكرن، ئانكو دەمێ فەرمانبەر پارچەیا خوە یا ئەردی وەردگریت دێ یا بێ كێشە بیت.
ل دووماهیێ گۆت: هندەك فەرمانبەر هەبووینە بەری پتر ژ دەه سالان رازیبوون ل سەر هاتیە دان كو ئەو ژی پارچا ئەردی وەربگرن، ئەو ژی دێ دگەل ڤێ هەوێ هێنە بەلاڤكرن و سەبارەت هژمارا فەرمانبەران كا چەند فەرمانبەر یان پێشمەرگە دێ ئەردی وەرگرن فۆرم ل سەر وان هاتینە بەلاڤكرن و ل دووڤ رێنمایان ئەو كەسێن نە مفادار دێ ژ ڤێ هەوێ مفاداربن و ئەردێ خوە وەرگرن، بۆ زانین هەتا نوكە شەش كومبوونێن گرنگ ل دۆر ئامادەكاریێن بەرهەڤكرنا پارچەیێن ئەردی هاتینە كرن و وەزیرێ باژێرڤانیێ ل گەل پارێزگەهێ دهۆكێ بەردەوام ل سەر خەتە و بابەت ب گرنگی هاتیە وەرگرتن و ئەم ب ئۆمێدین كو فەرمانبەر و پێشمەرگەیێن مە پارچەیا خوە یا ئەردی وەرگرن و سەبارەتا گەهاندنا خزمەتكاریان بۆ وان جهان چو پێ نەڤێت هزر دوێ چەندێ ژی دا هاتیە كرن و پلان و بەرنامەیێن باش هاتینە دانان كو ل گۆڕەی شیانان هەموو جۆرێن خزمەتان بگەهنە وان جهان و ئەم ڤێ چەندێ ب ئەركێ خوە دزانین.
