ئامینا زکری: ئالیەکێ سیاسی نەڤێت پرۆژێ چاکسازیێ بھێتە پەسەندکرن
ئه‌ڤرۆ نيوز:
ئەندامەکا پەرلەمانێ کوردستانێ بۆ رۆژناما ئەڤرۆ دبێژیت: ژلایێ قانوونی و ئیداری ڤە کوردستانێ پێدڤی ب چاکسازیەکا بنەرەتی ھەیە کو تێدا بھێتە ئەنجامدان، ھەر چەندە سەرۆک بارزانی د دەمێ خوە دا ھندەک لیژنە پێک ئینابوون و چەندین بریار دەرێخستبوون و تێدا دیارکربوو کو پێدڤیە چاکسازی د ھەموو سەکتەرێن حوکمڕانیێ دا بھێنە کرن، نوکە ئەڤ ئیرادەیا سەرۆک بارزانی گەھشتیە حوکمەتا ھەرێمێ و ب پرۆژە قانوونەکێ گەھشتیە پەرلەمانێ کوردستانێ ژی، ھەروەسا ئەم وەکو پەرلەمانێ کوردستانێ ژی شیاین گەلەک وان مادێن گرنگ و یێن پێدڤیەکا ھەردەمی مە پێ ھەی د وێ قانوونێ دا پەسەند بکەین، لێ ژبەر داخوازیێن خەلکێ کوردستانێ جارەکادی ئەو پرۆژە قانوونە ھاتە زڤراندن بۆ پەرلەمانی ، داکو ھندەک گوھۆڕێن و دەستکاری تێدا بھێنە کرن، و ھندەک مادە بھێنە راستڤەکرن.
ئامینا زکری ئەنداما پەرلەمانێ کوردسانێ یە ل سەر فراکسیۆنا پارتی دیموکراتی کوردستان زێدەتر گۆت: پشتی پرۆژێ قانوونا چاکسازیا خانەنشینیێ ھاتیە رەتکرن، کو ب رەنگەکێ تایبەتی دانوستاندن ل سەر سێ مادان ھەبوو، ھەروەسا ئەو مادێ د ناڤبەرا فراکسیۆنان دا پتر گوتۆبێژ ل سەر ھاتیە کرن دەربارەی خانەنشینکرنا پلێن بلند بوو، ھەر چەندە نەفەسەک د ناڤبەرا فراکسیۆنێن پەرلەمانێ کوردستانێ دا ھەبوو، لێ ھندەک فراکسیۆنان نە دڤیا ئەو پرۆژە قانوونە دەرباز ببیت و بھێتە پەسەند کرن.
ئامینا زکری ھەروەسا دیارکر، ڤێ چەندێ ژی ھندەک ئەگەرێن خوە ھەبوون، لێ مە وەکو فراکسیۆنا پارتی سێ جاران بەیاننامە دەرێخستن و ھەر چەندە ل وی دەمی بھێنڤەدانا ھاڤینی یا پەرلەمانی بوو، لێ مە داخواز ژ سەرۆکاتیا پەرلەمانی کر کو روونشتنەکا نەئاسایی دەربارەی پرۆژێ چاکسازیێ بھێتە ئەنجامدان، نوکە ژی ئەم یێن شیاین دەرگەھەکێ د ناڤبەرا فراکسیۆنا پارتی و فراکسیۆنێن دیتر یێن پەرلەمانی پەیدا بکەین، کو جارەکادیتر گوتۆبێژ بھێنە کرن ژبۆ دەربازکرنا ئەڤی پرۆژەی، د دووماھی کۆمبوونا مەدا ل گەل فراکسیۆنێن دیتر، کو لیژنا دارایی و لیژنا قانوونی ل سەر ڤی بابەتی گوتۆبێژ کرن و گەھشتنە ھندەک رێککەفتنان، لێ وان لیژنێن مەعنی و پەرلەمانێ کوردستانێ چو گوتۆبێژێ ل گەل حوکمەتێ نەکرن، چونکو پرنسیپەکێ پەرلەمانی یێ ھەی کو ھەر قانوونەکا پێگیریەکێ یان بابەتەکێ دارایی ل سەر حوکمەتێ دروست بکەت، نابیت پەرلەمان بێی حوکمەتێ بڕیارێ ل سەر وێ قانوونێ بدەت و ئەڤە پرنسیپەکە ل ھەموو جیھانێ دھێتە پەیرەو کرن، ھەر چەندە دەمێ ئەڤ پرۆژە قانوونە ھاتیە پەرلەمانی حوکمەتێ بڕیارا خوە ل سەر دابوو، ب تایبەتی ل سەر خانەنشینیێ و دەرمالان و راستڤەکرنا یەکەیێن پاسەوانی.
ئەنداما فڕاکسیۆنا پارتی خوەیاکر، لێ د دووماھیک کومبوون دا ھەردوو لیژنێن دارایی و قانوونی مادێ 10 کو یێ گرێدای دەرمالانە رەتکر و ھەروەسا ئەو خانەنشینێن 90 ھزار دینار وەردرگرتن مە کربوونە 300 ھزار دینار، ھەر چەندە مە دیارکربوو کو ببنە 400 ھزار دینار لێ حوکمەتێ وەسا دیارکر کو ئەو داھاتێ وان ھەی نەشێن مووچێ خانەنشینان بکەنە 400 ھزار، ھەروەسا بۆچوونا مە ل سەر ھندێ بوو، کو ئەڤ خانەنشینیە سلکێ مەدەنی بگریت، ھەر چەندە زێدەکرنا خانەنشینێ و دەرمالان گرێدایی حوکمەتێ نە، لەوما بێی ھەماھەنگی ل گەل حوکمەتا کوردستانێ پەرلەمانی ئەڤ بابەتە یێ راستڤەکری، ھەر چەندە حوکمەت نە یا ئامادەبوو، لەوما حوکمەت دخوازیت کو ڤەکولین بۆ ڤی بابەتی بھێتە کرن و ب ھەماھەنگی ل گەل پەرلەمانی ئەڤ بابەتە بھێتە ئێکلا کرن.
ئامینایێ زێدەتر گوت: سەرۆکێ حوکمەتا ھەرێما کوردستانێ نێچیرڤان بارزانی گەلەک جاران راگەھاندیە کو ھەکە پاشکەفتێ مووچەی نەمینیت، دڤێت پرۆژێ چاکسازیێ وەکو حوکمەتێ ھنارتی بھێتە دەربازکرن، ھەر چەندە نوکە پەرلەمانی بڕیاردایە کو دەرمالان بۆ حوکمەتێ ب زڤرینن، ھەروەسا مە ل ھەرێما کوردستانێ نێزیکی “17_18″ دەرمالان ھەنە و کو ل عیراقێ نێزیکی”7-8″ دەرمالان ھەنە، کو گەلەک ژ وان دەرمالان ب رەنگەکێ نە قانوونی ھاتینە دەرێخستن، ھەکە ئەو مادە بۆ حوکمەتێ بھێنە زڤراندن حوکمەت نەشێت پاشکەفتی نەھێلیت، لەوما ئەو پرۆژێ حوکمەتێ ھنارتی دڤێت ب وی شێوازی بھێتە دەربازکرن، بۆ ھندێ کو پاشکەفت نەمینیت، ھەر چەندە ئالیەکێ سیاسی ھەر جار ب بیانوویەکێ نەدڤیا ئەو پرۆژە قانوونە بھێتە پەسەندکرن، چونکو وی لایەنی گەلەک کادرێن خوە ب نە قانوونی خانەنشینکرینە و ئەو لایەن دێ زەرەرمەندێ ئێکێ بیت، لەوما وان دژایەتیا ڤی پرۆژەی کریە، لێ ئەم وەک فڕاکسیۆنا پارتی دێ ھەموو بزاڤان کەین و ئەم دەستان ژ ڤی پرۆژێ چاکسازیێ بەرنادەین.
