ئامینا زکری: رەتکرنا قانوونا خانەنشینیێ ل گەندەلکاران پیرۆز بیت
ئەڤرۆ نیوز:
قانوونا خانەنشینیێ پشتی پەسەندکرنێ ژ لایێ پتریا ئەندامێن پەرلەمانی ڤە ژ لایێ سەرۆکاتیا پەرلەمانێ کوردستانێ ڤە هاتە رەتکرن.
ئامینا زکری جێگرا سەرۆکا فراکسیۆنا پارتی دیموکراتی کوردستان گۆتارەک ل تۆڕا جڤاکیا فەیسبۆکی بەلاڤکریە و تێدا دبێژیت: رەتکرنا قانوونا خانەنشینیێ ل گەندەلکاران پیرۆز بیت.
ناڤەرۆکا گۆتارا ئامینا زکری جێگرا سەرۆکا فراکسیۆنا پارتی دیموکراتی کوردستان:
سەرئەنجام گەندەلکار سەرکەفتن!
زور نیگەران و دلگرانم بـ رەد کرنا تێکرایا یاسایا چاکسازیێ، بـ هێجەتا نەهێلانا خانەنشینیا پەرلەمانتەران!
رەدکرنا یاسایا چاکسازیێ بـ گشتی ئاماژەیەکا مەترسیدارە بو ئەنجام نەدانا چاکسازی و بەردەوامیدان و دەستڤەکری هێلانا گەندەلکاران.
ئەڤە ماوێ چەندین سالایە جەنابێ سەروک بارزانی دەست بـ پروژێ چاکسازیێ کریە و بو ڤێ مەبەستێ چەندین فەرمانێت هەرێمی و لێژنێن تایبەت پێک ئیناین و زور کارێن باش د زوربەی سەکتەران دا هاتینە ئەنجامدان و دەرئەنجام هەولێن سەروک بارزانی دچارچوڤێ یاسایێ دا هاتە رێکخستن و ئەو ئیرادە گەهشتە حکومەتا هەرێمێ و بـ گەرمی هاتنە سەرخەتێ و بـ ئامادەکرن و هنارتنا پروژێ یاسایا چاکسازیێ بو پەرلەمانی بریارەکا وێرەکانە و مێژویی دان.
ناڤەروکا یاسایێ دەستکەفت و خالێن زور گرنگ د ئاستێ چاڤەرێ بون و داخوازیێن خەلکی تێدا هەبون
زامنکرنا پاشکەفتێ موچێ فەرمانبەران، هەلوەشاندنا خانەنشینیا پلە بالا و پلە تایبەتێن کو بـ نەیاسایی هاتینە خانەنشین کرن و دەستەبەرکرن مافێ خەباتکەر و پێشمەرگەێن تێکوشەر، گرەنتیکرنا سێسەد هزار دیناران بو ئەو خانەنشین بویێن کێمتر ژ ڤی کوژمێ هاتینە خانەنشین کرن، و زامنکرنا دانا هەیڤانە یا موچێ سەرجەم فەرمانبەر و پێشمەرگەهێن قەهرەمان، راستڤەکرنا موچێ خانەنشینی یان هەلوەشاندنا ئەو کەسێن ژ دەرڤەی یاسای بـ پلەیا بەرز هاتینە خانەنشین کرن، راگرتنا دامەزراندنا پلە تایبەتێن بێ مەرجێن یاسایی و پاقژکرنا لیستا شهید و زیندانیێن سیاسی، دەستنیشانکرن ژمارا پاسەوانێن بارەگا و بەرپرسێن پلە بەرز، رێگری کرن ژ پتر ژ ئێکجار سودمەند بون ژ بودجا گشتی یا هەرێمێ و ئێراقا فێدرال و رێگریکرن ژ پتر ژ ئێکجار موچە وەرگرتن، دامەزراندنا صندوقا خانەنشینی
و زور خال و دەستکەفتێن دی یێن گرنگ کو دڤی یاسایێ دا هاتبونە پەسەند کرن
ئەڤە سەرێ چەند سالایە گەندەلکار کەفتینە گیانێ هەرێما کوردستانێ و پارێ ڤی ملەتی بـخسارەت دەبەن و تێر نەبون ژ گەندەلیێ و موچێن بندیوار و هەمی سنور تێپەراندن، ئەڤی یاسایێ بەرژەوەندیێن زور گەندەلکاران ئێخستنە مەتەرسی و دەرفەتکا ئێکجار مەزن و مێژویی بو ژ بو بنبرکرنا سودمەندی و بهەدەردانا سامانێ گشتی یێ وەلاتی، لێ گەندەلکار شیان سەرئەنجام بـ ناڤێ شەپولا نارەزایبونا ملەتی سەربکەفتن!!
بـ مخابنی ڤە بێ ئاگاداربون ژ ناڤەروکا یاسایێ خەلکەک کەفتنە شەپولا دژایەتیکرنا ڤێ یاسایی، هەلبەت خانەنشینی بابەتەکێ زور لاوەکی بو ئارمانجا سەرەکیی چاکسازیی بو، لێ پروسە بەروڤاژیی لێهات و چاکسازی بو بابەتەکێ لاوەکی و خانەنشینی بابەتەکێ سەرەکی!؟
یاسایەک کو هندی ساخ بم دێ شانازیێ پێ بەم کو بەشدار بویەکا کارا بویمە د گفتگو و دەنگدان لسەر ڤی یاسایێ دا.
ئەز پیشگیری یان هێجەتا ناگرم بو هندێ کا ئەم چەند دروست و سەرکەفتی بوینە د دارشتنا خانەنشینیا پلە تایبەتان دا، لێ بو ئێکەمین جار بو پەرلەمان دەست بو موچێ خانەنشینیا پلە تایبەتان بـ مەبەستا کێمکرنێ ببەت و ئەم شیاین بێمەرجدار بونا خانەنشینیا پلە تایبەتان کو بـ رێژا 80% یە دەستکاری بکەین و هندەک پیڤەرێن گونجایی وەک خزمەت و تەمەن و باوەرنامە وەک مەرج بو خانەنشینیێ و ژ رێژا 80% بو 25% دابەزینین،و هەروەسان دەرفەتا زڤرین بو کارێ پێش پەرلەمانیێ بو هەرکەسێ خانەنشینیێ رەد بکەت برەخسینین.
نەرازیبون و دژایەتیکرن بو خانەنشینیا پلە تایبەتان ژلایی خەلکی ڤە زور ئاسایی و مافێ رەوایێ گەلیی یە و ئەرکێ مەیە وەک پەرلەمانتەر دەنگ و داخوازیێن هاوەلاتیان بـهەند وەربگرین و هەردەملدەست وەک فراکسیونا پارتی مە کومبونەکا بلەز بو بەرسڤدانا یاسایی بو داخوازیێن جەماوەرێ دلسوژ ئەنجامدا و دو پێشنیار ئامادەکرن یا ئێکێ پروژە یاسایا کێمکرنا دەرمالە و موچە و پاداشت یا پلە تایبەتان و یا دووێ ئینفازا یاسایا موحد یا ئێراقی
لێ مخابن ئەڤرو سەروکایەتا پەرلەمانی بـ رەدکرنا سەرجەم یاسایا چاکسازیێ دەرفەتا دوبارە دەرئیخستن و پەسەندکرنا ڤێ یاسایێ بزەحمەت و دور کر، هەرچەند مە زور هەول دگەل سەروکاتیا پەرلەمانی دان ، کو تەنها مادێ سێ کو پەیوەستە بـ خانەنشینا پلە تایبەتان بهێتە رەد کرن، لێ مخابن هەمی یاسا هاتە رەد کرن و ئەز گەشبین نینم جارەکا دی ئەڤ یاسایە بهێتە دناڤ هولا پەرلەمانی دا و ژدایکبونەکا نویی بخوڤە ببینیت
بویە رەد کرنا یاسایا چاکسازیی پیروز بیت ژ هەمی گەندەلکاران!!
ئامینا زکری
�
�
