ئامەد دەنگێ كوردان ل سۆپەر لیگێ
ئیحسان حەسەن
سەركەڤتنا ئامەد سپۆر بۆ سۆپەر لیگا توركیا یا فوتبۆلێ بۆ جارا ئێكێ ددیرۆكا خوە دا بناڤێ خوە یێ رەسەن یێ باژێرێ دیاربەكر، پترە ژ دەستكەڤتەكا وەرزشی، بەلكو ب وەرچەرخانەكا جڤاكی سیاسی ددیرۆكا كوردان دا دهێتە هژمارتن، ئەڤ سەركەڤتنە ژ ئەنجامێ هەڤركییەكا درێژ و پشتەڤانییا راستەوخوە یا كوردێن هەموو پارچەیێن كوردستانێ هاتە تۆماركرن، ئانكو تنێ گوهورینەك درێزبەندیا خولێ دا نەبوو، بەلكو خوراگری بوو بەرامبەر وان هەموو ئاستەنگێن دارایی و یاسایی و جەماوەری و هەتا یێن دەرۆنی یێن كو یانەیا كوردان بدرژاهییا كاروانێ خوە كەڤتیە تێدا، دیسان سەلماندنا وێ چەندێ بوو كو یاریگەه تاكە مەیدانا فەرمی بوو ژبۆ دەربرینێ ژ هەبوونا مللەتێ كورد، هەروەسا چەسپاندنا زمان و ناسنامەیا گوردی یا ڤی باژێرێ بوو، نەتنێ وەكو یانەیا وەرزشی، بەلكو وەكو نوونەرا راستەقینەیا جڤاكێ خوە دمەیدانێن دەولەتی دا، ژبەر كوسۆپەر لیگا توركیا ل گەلەك وەلاتاندا دهێتە بەخشكرن، هەبوونا یانەیا ئامەد سپۆر دێ سرنجا میدیایێن جیهانی بخوە راكێشیت، ئەڤە دێ كەڤیتە د بەرژوەندیا دۆزا كوردان دا، یا دیتر ئەڤ دەستكەڤتە دێ وەكەت كو یانەیێن مەزن بهێنە ڤی باژێری، وەكو گالاتە سەرای، ڤەنەرباخچە و یێشیكتاش، ئەڤ چەندە دێ بیتە ئەگەرێ گەشەكرنا بزاڤا گەشتیاری، ژبلی هندێ زێدەبوون و گرنگیدان ب ژێرخانەیا وەرزشی ل باكورێ كوردستانێ، هەورەسا هاندانا گەنج و لاوێن كورد كو وەرزشێ بكەن ب تایبەت یاریا فوتبۆلێ، بەلكو ل پاشەرۆژێ ببنە ناڤێن دیار ل ئەسمانێ ڤێ یارێ، هەر ئەڤە گرنكترین ئەو خالبوون یێن كو یانەیا پایتەختێ كوردان خەبات بۆ كری، تا كو گەهشتییێ، یا من دڤێت بێژم سۆپەر لیگا توركیا، تنێ خولەكا فوتبۆلێ یان یا وەرزشی نابیت، بەلكو دێ بیتە مەیدانا فەرمی یا پایتەختێ نوو یێ دەنگێ كوردان، كو ناڤێ وێ ئامەد سپۆرە، لەوما ژبۆ پاراستنا ڤێ دەستكەڤتێ پێدڤی یە كارگێریا یانەیا ئامەدێ ب عەقلیەتەكا پیشەكاری و بازرگانییا سەردەم بچیتە دناڤا خولێ دا، ژبلی هندێ پێدڤی ب سیستەمەكێ دارایی یێ سەربەخوە یێ بهێز هەیە، بۆ هندێ باشترین یاریزانان لدۆر خوە كومڤەكەت، كو خودان ئەزموون و شارەزاهی بن، ژبلی هندێ سەقامگیریا كارگێری و تەكنیكی هەبیت، هەروەسا پشتەڤانێن تیمێ ژی دخوشی و نەخوشییان دا دگەل بن و ببنە فاكتەرێ سەركەڤتنێ بۆوان ب تایبەتی دوان یایاندا یێن كو لیاریگەها خوە دكەن، ژبلی هندێ خوە دوور بێخن ژكێشیان ب تایبەت یێن گرێدای رەگەز پەرستییێ، بلا بۆ هەر یاریەكێ نامەیەك بۆ جیهانێ هەبیت، كو دەنگێ وان یێ وەرزشێ ژیێ سیاسەتێ بهێزترە، دیسان ئارمانجێن خوە دەستنیشانبكەن بەری بگەڤنە دناڤا هەڤركییان دا و بزانن كا ل وەرزێ ئێكێ وان چ دڤێت بجهبینن، هەر ئەڤ خالە نە یێن كو دێ بنە كلیلێن سەركەڤتنێ و گرنتییا مانا یانەیا كوردان دخولا مەزنان دا.
