ئاوارێن شنگالێ : هندی به‌غدا د كه‌یسا شنگالێ دا كار نه‌كه‌ت و گرۆپێن چه‌كدار د ناڤ مالێن خه‌لكێ دا بن، ناڤه‌گه‌رین
دهۆك، له‌زگین جوقی
ئه‌ڤرۆ 3/8/2022 كوردێن ئێزدی هه‌شته‌مێن سالڤه‌گه‌را جینۆسایدا شنگالێ ساخ دكه‌ن وئاوارێن شنگالێ ژی دبێژن ئه‌م ناڤه‌گه‌رین.
ره‌شو شنگالێ، خه‌لكێ كۆمه‌لگه‌ها بۆرك ل شنگالێ كو ئه‌ڤه هه‌شت سالن ئاواره‌بووی و نوكه ل كه‌مپا شاریا یێ ئاكنجیه دیاركر” خه‌لكێ شنگالێ نه‌شێن ڤه‌گه‌رن جهێن خوه یێن ره‌سه‌ن ژبه‌ر هه‌بوونا گرۆپێن چه‌كدار ونه‌بوونا ته‌ناهیێ ل شنگالێ، هه‌كه ره‌وشا شنگالێ وه‌سا بمینیت ئه‌م د به‌رهه‌ڤ نینین ڤه‌گه‌رن، ژ به‌ر كو ئه‌و ئه‌ره‌بین ل سالا 2014ێ خیانه‌ت ل خه‌لكێ شنگالێ كرین نوكه یێن زڤرینه سه‌ر مالێن خوه ل شنگالێ وهێشتا كوردێن ئێزدی ئاواره‌نه ونه‌شیاینه ڤه‌گه‌رن، ئه‌م دێ چاوا شێین ڤه‌گه‌رن هه‌كه حوكمه‌تا عێراقی د كه‌یسا شنگالێ دا كار نه‌كه‌ت و گرۆپێن چه‌كدار د ناڤ مالێن خه‌لكی دا بن”.
ئاماژه دا وی چه‌ندی ژی ” ره‌وشا نوكه یا شنگالێ یا باش نینه و ته‌ناهی تێدا نینه وگه‌له‌ك گرۆپێن چه‌كدار یێن د ناڤدا وهه‌تا ته‌ناهی نه‌بیت خه‌لك نه‌شێن ڤه‌گه‌رن بتنێ ئه‌م داخواز دكه‌ین ته‌ناهی ل شنگالێ په‌یدا بیت دا كو بشێین ڤه‌گه‌رین”.
قه‌وال مچۆ، ئاواره‌كێ شنگالێ یه ل كۆمه‌لگه‌ها شاریا دژیت دبێژیت” ئاوارێن شنگالێ ژبه‌ر خرابیا ره‌وشا شنگالێ ناخوازن ڤه‌گه‌رن جهێن خوه چونكو هێشتا ترسا تیرۆرستێن داعشێ یا سالا 2014ێ د دلێ خه‌لكێ شنگالێ دا مایه وتشتێ هه‌ره نه‌خوه‌ش بۆ خه‌لكێ شنگالێ ئه‌وه ئه‌و ئه‌ره‌بێن چوینه دناڤ رێزێن داعشێ دا و رێ نیشا داعشێ داین بۆ داگیركرنا شنگالێ و ره‌ڤاندنا كچ وژن و زارۆیان نوكه ئه‌و ئه‌ره‌ب یێن زڤرینه سه‌ر جهێن خوه وره‌وشا شنگالێ یا خرابه وئاواره ناڤه‌گه‌رن”.
زه‌ریف، ژنه‌كا دانعه‌مره ئاوارا شنگالێ یه ل كه‌مپا چه‌مشكو ل زاخۆ دژیت دیاركر” زارۆیێن مه هه‌موو ده‌ربه‌رده‌ربوون ئه‌م گه‌فتینه د ره‌وشه‌كا نه‌خوه‌ش دا، ل شنگالێ ژی تشته‌ك نینه وچ خوه‌شی لێ نه‌مایه وئه‌م نه‌شێین ڤه‌گه‌رین و ژ نه‌چاری مه ژیانا بن خیڤه‌تان هه‌لبژارتیه”.
ئه‌حلام كتی، كچه‌كا ئاوارا شنگالێ یه دیاركر” ئه‌م خه‌لكێ قوبیله‌تی شنگالێ نه، مال و حالێ مه ل شنگالێ نه‌مایه وهه‌موو خانیێن مه یێن هاتینه خرابكرن و تالانكرن هه‌تا نوكه ژی خوه‌شك ودایكێن مه دناڤ ده‌ستێن خیزانێن تیرۆرستێن داعشێ دا ماینه وئه‌م نه‌شێن بچینه شنگالێ وچاڤه‌رێ دكه‌ین پێشمه‌رگێ كوردستانێ ڤه‌گه‌ریته شنگالێ وته‌ناهیێ تێدا دابین بكه‌ت دا كو بشێین بچینه سه‌ر مالێن خوه، ب راستی ژی ته‌ناهی ل شنگالێ نینه وهه‌تا نوكه ژی ل وێرێ كچ دهێنه ره‌ڤاندن ژئالیێ گرۆپێن چه‌كدار، له‌ورا ما دێ چاوا شێن ڤه‌گه‌رین؟”.
پیر ده‌یان جه‌عفه‌ر، رێڤه‌به‌رێ كۆچ وكۆچبه‌ران وبه‌رسڤدانا قه‌یرانان ل پارێزگه‌ها دهۆكێ دبێژیت” ئاواره ناخوازن ڤه‌گه‌رن شنگالێ، به‌لكو گه‌له‌ك ئاوارێن چووینه شنگالێ ژی ژ ئه‌نجامێ شه‌رێ د ناڤبه‌را په‌كه‌كێ وله‌شكرێ ئیراقێ دا شنگال چۆل كر و دووباره ئاواره بوون نوكه ژی رێ بۆ ئاواران د ڤه‌گه‌رینه ڤه‌گه‌رن شنگالێ، لێ ئه‌و ناخوازن ڤه‌گه‌رن”.
