ئاوارە د رازی نینن ب ملیۆنەک و ٥٠٠ ھزار دیناران ڤەگەڕنە شنگالێ
دھۆک، لەزگین جوقی:
ئەندامەکێ جڤاتا قەزا شنگالێ بۆ ئەڤرۆ نیوز دیار کر کو خەلکیێ شنگالێ د رازی نینن ب کوژمێ ملیۆنەک و ٥٠٠ ھزاردیناران ڤەگەڕنە شنگالێ، چونکو ئەڤ کوژمێ پارەی زۆر یێ کێمە و کەس نەشێت خانیێ خوە پێ دروست بکەت.
خەیری زیبان، ئەندامێ جڤاتا قەزا شنگالێ دیار کر کو ھەکە خزمەتگۆزاری و تەناھی ل شنگالێ ھەبیت و حکومەتا عیراقێ ل دووڤ فۆرما ئاھێن خوارنی بۆ ھەر سەرۆک خێزانەکێ ب کێماسی کوژمێ پێنج ملیۆن دیناران ب مەزێخیت، رەنگە خەلک بشێن ھەتا رادەیەکی خانیێن خوە ئەوێن زیان گەھشتینێ؛ پێ دروست بکەن و ڤەگەڕنە سەر مال و حالێن خوە، چونکو پتریا خانیێن وەلاتیێن شنگالێ ھاتینە خرابکرن یان زیان یێن گەھشتینێ و ھەموو کەرەستێن وەلاتیان یێن ھاتینە تالانکرن و تشتەک بۆ خەلکێ شنگالێ نەمایە، لەورا کوژمێ ملیۆنەک و ٥٠٠ ھزار دیناران تیرا چ ناکەت و ئەم ب ڤی کۆژمێ پارەی درازی نینین.
وی ئەندامێ جڤاتا قەزا شنگالێ ئاماژە ب وێ چەندێ ژی کر کو حکومەتا عیراقێ بڕیار دایە ھەر خێزانەکا ڤەگەڕیتە شنگالێ کوژمێ ملیۆنەک و ٥٠٠ ھزار دیناران بدەنێ وەکو ھاریکاری، لێ خەلک ژ ڤی کوژمێ پارەی یێ رازی نینە، چونکو گەلەک یێ کێمە، دیسا رەنگە پارە بۆ وەلاتیان نەیێ گرنگ بیت، بەلکو تەناھی و خزمەتگوزاری دگرنگن و ئەڤە ھەتا نوکە ل شنگالێ نینن.
