ئەڤرۆ

دوهی ئێكشەمبی 26/2/2023 نێچیرڤان بارزانی، سەرۆكێ هەرێما كوردستانێ پێشوازی ل ئەحمەد ئیبراهیم سەعید زاهری، قونسلێ گشتیێ وەلاتێ ئیماراتێ ل هەرێما كوردستانێ كر.
سەرۆكایەتیا هەرێما كوردستانێ د بەیاننامەیەكێ دا بەلاڤكر» د كۆمبوونەكێ دا، هەردو ئالیان دووپاتی ل ب هێزكرنا پەیوەندیێن ئیراقێ و هەرێما كوردستانێ ل گەل وەلاتێ ئیماراتێ و بەفرەهكرنا هاریكاریا هەڤپشك د ناڤبەرا واندا كر و ڕەوشا سیاسی و ئابۆری یا ئیراقێ و هەرێما كوردستانێ و پەیوەندیێن بەغدا و هەولێرێ هاتنە باسكرن».
قونسلێ گشتیێ ئیماراتێ ل هەرێما كوردستانێ داخوازنامەیەكا فەرمی ژ ئالیێ شێخ محەمەد بن زاید ئال نەهیان، سەرۆكێ ئیماراتێ گەهاندە نێچیرڤان بارزانی بۆ سەرەدانا وەلاتێ وی.
سەرۆكایەتیا هەرێما كوردستانێ سەبارەت ناڤەرۆكا داخوازنامەیا سەرۆكێ وەلاتێ ئیمارات بۆ سەرۆكێ هەرێما كوردستانێ، بەلاڤكر» سەرۆكێ ئیماراتێ د داخوازنامەیا خوە دا ئاماژە ب خواست و گرنگیدانا وەلاتێ خوە ب پەیوەندیان ل گەل هەرێما كوردستانێ و هاریكاریا هەڤپشك د ناڤبەرا واندا د بوارێن جودا جودا كر، هەروەسا بۆ گوهۆڕینا بیروڕا ل دۆر بەرژەوەندیێن هەڤپشك د ناڤبەرا هەردو ئالیان دا، چاڤێ وی ل وێ چەندێ یە ل ئیماراتێ پێشوازیێ ل نێچیرڤان بارزانی، سەرۆكێ هەرێما كوردستانێ بكەت».
ژ ئالیێ خوەڤە نێچیرڤان بارزانی ڕاگەهاند، ب خوەشحالی ڤە داخوازنامەیا سەرۆكێ ئیماراتێ بۆ سەرەدانا وەلاتێ وی قبوول دكەت و ب دیتنا وی پەیوەندیێن د ناڤبەرا هەرێما كوردستانێ و ئیماراتێ د قۆناغەكا باش و گرنگ دانە.
د پشكەكا دی یا كۆمبوونێ دا، نێچیرڤان بارزانی و قونسلێ گشتیێ ئیماراتێ ل هەرێما كوردستانێ باس ل پرسا بودجەی و قانوونا پەترۆلێ و غازێ د ناڤبەرا حوكمەتا هەرێما كوردستانێ و حوكمەتا فیدرالی یا ئیراقێ دا و ڕەوشا شنگالێ ژی كر.

ئەڤرۆ

دارێژتن: ئەیاد بەرواری

بەرپرسێ پشكا ڕەوشەنبیری و ڕاگەهاندنێ یا پارتی دیموكراتی كوردستان د. سالار عوسمان د دیدارەكێ دا ڕاگەهاند» ڕۆلێ ڕاگەهاندنا پارتی هەمان ئەو ڕۆلە یێ پارتی د ناڤ پرۆسەیا نیشتمانی و پرۆسەیا سیاسی دا و د پرۆسەیا حوكمڕانیێ دا بڕێڤە دبەت، ئانكو ڕۆلێ كوردستانێ و نیشتمانی و ئێكڕێزی و دیموكراسی و پێكڤەژیان كۆم دكەت ب ڕێكا ڕاگەهاندنێ ڤە ئانكو ب ڕێیا پەیڤ و وێنەیان ب ڕێكا هەموو وان كەنالێن و بوار و جهێن پێ دهێتە گوتن بوارێ رەوشەنبیری و بوارێ ڕاگەهاندنێ، هەمان ئەو ڕۆلەیە كو ڕێبازا بارزانی ئەم فێركرین كو كوردستان بەری هەموو تشتەكی یە و پێدڤیە ئەڤ وەلاتە ببیتە خودان سنۆر و ئالا و ئازادی» .
سەبارەت وێ چەندێ كا پشكا ڕەوشەنبیری و ڕاگەهاندنا پارتی دێ چ پێنگاڤ هاڤێژت ل ئۆرگانێن ڕاگەهاندنا پارتی دەرگەهەك بهێتە ڤەكرن كو ڕاگەهاندن ببیتە پرەك د ناڤبەرا دەستهەلاتێ و خەلكی دا؟
بەرپرسێ پشكا ڕەوشەنبیری و ڕاگەهاندنا پارتی گوت» پارتی خودانا پتریا دەنگانە ل هەرێما كوردستانێ و حزبا هەژمار ئێكە ل هەرێمێ و ل هەلبژارتنێن ئیراقێ دا ژی حزبا هەژمار ئێكە، چاوان پارتی نوونەرایەتیا پتریا دەنگان دكەت، پێدڤیە ڕاگەهاندنا وێ ژی نوونەرایەتیا پتریا گوهدانێ ژ جەماوەری بكەت و نوونەرایەتیا پتریا دیتنا چارەسەریان بۆ گرفت و ئاریشەیێن وەلاتیان بكەت، لەوما مە باوەری ب وێ چەندێ هەیە كو پێدڤیە ڕاگەهاندن ڤەكریتر سەرەدەریێ دناڤ جڤاكی و وەلاتیان دا بكەت و پێدڤیە پەیرەوكارێن ئاخڤتنا بارزانیێ نەمر ( شانازیە مرۆڤ خزمەتكارێ مللەتێ خوە بیت) بین، هەروەسا دڤێت ڕاگەهاندن و ڕاگەهاندكارێن پارتی د وێ ڕاستیێ بگەهن كو هەموو ڕەخنێن خەلكی پێدڤی ب سینگەكێ بەرفرەهـ وەربگرن وەكو پرۆسەیا وەرگرتنا گازندەیێن خەلكی و پرۆسەیەكا دی یا هەی ئەوژی پرۆسەیا خزمەتكرنا خەلكی دڤێت دەرگەهێ ڕاگەهاندنێ بۆ وێ چەندێ یێ ڤەكری بیت ئانكو دڤێت هەم گازندێ و ڕەخنێ وەرگریت وهەم ژی چارەسەر بكەت بۆ خزمەتكرنا گەلێ كوردستانێ».
د. سالار عوسمان ئاماژەكر» پشتی كۆنگرەیێ 14 ب دووماهی هاتی و مە ئەركێ بەربرسیارەتیا پشكا ڕەوشەنبیری و ڕاگەهاندنا پارتی وەرگرتی ب شانازی ڤە مە دەست ب دانانا بەرنامەیەكێ كریە و ل دەستپێكێ دخوازین كۆمبوونان ل گەل هەموو ئۆرگان و كەنال و هەموو بوارێن دی یێن ڕەوشەنبیری و ڕاگەهاندنێ بكەین و ڕوو ب ڕوویێ هەموو كارمەندان ببین و هەتا نوكە مە ڕێژەیا 75% ژ هەموو كارمەندێن خوە یێن دیتین و یێن دی ژی دێ بینین هەر بۆ نموونە بەری دەمەكی ل دهۆكێ بووین كو مە ل وێرێ ڕاگەهاندكار و ڕەوشەنبیرێن دلسۆز یێن هەین ل هەولێرێ و گەرمیان و رانیا و سلێمانیێ و هەلەبجە و ل كەركووكێ ژی ل هەر جهەكێ دی بوارێ ڕەوشەنبیری هەبیت ئەم دێ سەرەدانا وان كەین و پشتی سەرەدان و دانوستاندنان دێ پلانەكێ داڕێژین و پێدڤیە ئەڤ پلانە بۆچوونا پارتی دیموكراتی كوردستان بیت بۆ بوارێ ڕەوشەنبیری و ڕاگەهاندنێ. بێگومان پشتی ئەم وێ پلانێ دادڕێژین ب هەڤكاری ل گەل ئەندامێن پشكا ڕەوشەنبیری و ڕاگەهاندنێ و ڕاگەهاندكاران ب گشتی و ڕەوشەنبیرێن دناڤ پارتی دا هەتاكو ئەوێن ل دەرڤەی پشكا ڕەوشەنبیری و ڕاگەهاندنا پارتی و دڤێت ژبیر نەكەین كۆمەكا كەلتوورزان و ڕاگەهاندنكار و ڕەوشەنبیرێن گەلەك باش ل دەرڤەی پشكا ڕەوشەنبیری و ڕاگەهاندنا پارتی نە و ئەم بەردەوام ڕاوێژان ل گەل دكەین و بۆچوونێن وان وەردگرین و ئەم دێ پلانەكێ داڕێژین و ب ڕازیبوونا سەرۆك بارزانی و مەكتەبا سیاسی یا پارتی دێ دەست بجهئینانا وێ پلانێ كەین، بێگومان ڤێ پلانێ مەشق و ڕاهێنان یا تێدا كو پێدڤیە ئەم گرنگیێ بدەینە ڤی بواری و ڤێ پلانێ بوارێ سۆشیال میدیا تێدایە كو پێدڤیە ئەم ل سەردەمێ گلۆبالیزمێ و تەكنەلۆژیایێ گرنگیێ ب سۆشیال میدیایێ بدەین، هەروەسا د ڤێ پلانێ دا دێ گرنگیێ ب زمانێن دی دەین بۆ نموونە زمانێن ئەرەبی و فارسی و توركی و ئینگلیزی و هەر د وێ پلانێ دا دێ گرنگی دەینە گەنج و ژنان ژبەركو گەنج و ژن هێزا جڤاكی نە، هەروەسا دناڤ پلانا مە دا كۆمەكا بابەتێن دی یێن گرنگ هەنە ژوان ژی ژیارا كادری وڕۆژنامەنڤیسی و ڕاگەهاندنكارێ و ب پشت ڕاستی ڤە ئەڤە بتنێ ب مە ناهێتە كرن و ب پشتەڤانیا سەرۆك بارزانی و پارتی و دەزگەهـ و ڕاگەهندنكاران ب گشتی دێ هێتە كرن».
د. سالار عوسمان ئاماژەكر» ئەوا بۆ مە ڕۆهن بووی د سەرەدانێن خوە دا بۆ دەزگەهێن ڕاگەهاندنا پارتی ئەوە كو ئەو كەسێن دناڤ بوارێ ڕەوشەنبیری و ڕاگەهاندنا پارتی دا كاردكەن كەسێن دلسۆزن و خەباتكەرن ب پارە و شیانێن كێم كارەكێ مەزن دكەن و ئەڤە جهێ ڕێزێ یە، هەروەسا بۆمە ڕۆهن بوو كە ژ ڕوویێ زانستی ڤە مە پێدڤی ب مەشق و ڕاهێنانێن زۆر هەیە و مە پێدڤی ب دووبارە دروستكرنا تەكنولۆژیا سەردەمی هەیە ل كوردستانێ، هەروەسا بۆمە ڕۆهن بوو كو نەیار و نەحەزێن پارتی گەلەك ب دلرەقی هێرشان دكەنە سەر پارتی و هەرێما كوردستانێ و ئەزموونا وێ و پێدڤیە ل بەرامبەری وان مە بەرسڤ هەبیت و وان تێبگەهینین كو كوردستان ژ هەموو تشتەكی مەزنترە و دەمێ بەرسڤا نەیار و نەحەزان بدەین مە دڤێت بێژینە وان كوردستان یا گرنگە و پارتی بەردەوام دەستێ ئاشتیێ درێژ دکەت و ڕاگەهاندنا پارتی ژی یا ئاشتیخوازە».
د. سالار گوت ژی» پێدڤیە ڕاگەهاندنا پارتی خودان باشترین و ب هێزترین و بەرفرەهترین پەخش بیت و خودان باشترین وێنە و تەكنیك بیت و د بەرنامەیێ مە دایە گرنگیێ ب هەموو وان بواران بدەین و دێ مینیت ل سەر وێ چەندێ ئایا شیان چەندن و شیانێن كادرێن مە چەندن و بەرهەڤیا قۆناغێ ژ ڕوویێ سیاسی و كەلتووری ڤە چەندە دێ ڤەخواندنێ ل سەر ڤان هەموویان كەین. بێگومان ب هەناسەیا پێشكەفتن و باشتركرنا بوارێ تەكنیكی و پەخشێ و دەنگ و وێنەی دێ كارێ جدی كەین».
سەبارەت پلانا ڕاگەهاندنا پارتی بۆ پارچەیێن دی یێن كوردستانێ و ئیراقێ و ئۆرۆپا گوت» كوردستان تی ڤی ئێكەمین دیرۆكە دبوارێ پەیاما كوردستانی دا ل سەر ئاخا كوردستانێ بۆ هەر چار پارچەیێن كوردستانێ و كوردێن ل ئۆرۆپا و بۆ هەموو جیهانێ هەروەسا مە كەنالێ زاگرۆس یێ هەی وەكو كەنالەكێ ئەرەبی و ئەم دخوازین ب ڕێكا سۆشیال میدیایێ و دیجیتال میدیایێ دەنگێ پارتی و پەیامێن سەرۆك بارزانی و خزمەتگوزاریێن حوكمەتا هەرێما كوردستانێ بگەهینینە هەموو جیهانێ ب ڕێكا ڕاگەهاندنێ و سۆشیال میدیایێ».
ئو ئاماژەكر» مە نیاز هەیە ڕۆژنامەیەكا ئەلكترۆنی ب زمانێ ئینگلیزی دەربكەین كو دێ بیتە پەنجەرەك بۆ هەموو جیهانێ و بۆ پارچەیێن كوردستانێ ژی ئەم دێ بزاڤێ كەین دەنگێ پارتی بگەهیتە هەرسێ پارچەیێن دی یێن كوردستانێ».
دیاركر ژی» ب درێژیا دیرۆكا ڕاگەهاندنا پارتی بەردەوام زمانێن نەتەوەیێن جودا یێن كوردستانێ هەبوون و بەرنامەیێن ئایینی یێن جودا هەبوون و پارتی بەردەوامی دایە كو پێكڤەژیانێ بكەتە ئێك ژ براندێن تێكگەهشتنا خوە یا سیاسی ب هەمان شێوە ئەم دێ بزاڤێ كەین هزر بۆ وی بواری بكەین دناڤ بەرنامەیێن ڕادیۆ و تەلەفزیۆن و ڕۆژنامە و كۆڤارێن خوە دا و ئەڤە بوارەكێ گەلەك گرنگە و ڕایا گشتی بۆ هەرێما كوردستانێ ڕادكێشیت و هەرێمێ ب شێوەیێ خوە یێ جوان ژ ڕوویێ پێكڤەژیانا ئایینی و نەتەوەیی و سیاسی و ئایدیۆلوژی دێ گەهینیتە هەموو ناڤەندێن جیهانێ و د ڤی بواری ژی دا دێ كاركەین، بەلێ پشكا هەرە مەزن یا ڤان كاران گرێدای شیانێن دارایی و مەشق و ڕاهێنانێ یە».
ل دۆر گرنگیدانا پارتی ب بوارێ ڕەوشەنبیری و ب تایبەتی چاپكرنا پەرتۆكان دا دبێژیت» ئێك ژ بەرنامەیێن كارێ مە ئەوە كو ل سەر هەردو چاپخانەیێن مە هەین كار بكەین ئەوژی چاپخانەیا موكریانی ل هەولێرێ و چاپخانەیا خانی ل دهۆكێ و مە چاپخانەیەكا دی ژی یا هەی ل بەغدا ب ناڤێ (التاخی) كو مخابن نوكە یا ڕاوەستیایە بۆ وان سێ چاپخانەیان ئەم د گفتۆگویێ داینە كا چ لێبكەین، ئایا نووژەن بکەین یان نووترین چاپخانەیان بینین بۆ چاپكرنا كۆڤار و ڕۆژنامەیان و هەتاكو د بوارێ هەلبژارتنان دا مفای ژێ وەربگرین، سەبارەت چاپكرنا پەرتۆكان مە دەزگەهێ مۆكریانی هەیە و بەردەوام وی كاری دكەت و نوكە چەند پەرتۆك ل بەردەستن».
ئو خویاكر» ل دهۆكێ گرنگی ب ڕاگەهاندنا وەرزشی هاتیە دان ب تایبەتی د ڕۆژنامەیان دا ومە ل بەرە هندەك كەنالێن تایبەت ب وەرزشێ ڤە ل هەولێرێ ژی وەكو دهۆكێ مە هەبن و د ئەكتیڤ بن.
ڕاستە وەكو هونەر مە تەلەڤزیۆنەكا تایبەت نینە ب وی بواری ڤە بەلێ ئەم هزر د دانانا ڕادیۆیەكا كەلتووری و هونەری دا دكەین». ل دۆر گرنگیدانێ ب ڕاگەهاندنا زارۆیان، د. سالار دبێژیت» دڤان نێزیكان دا تەلەفزیۆنەك دێ ب شێوەیەكێ باش كەڤتە كاری د ڤی بواری دا ب ناڤێ «پێلستانک» كو كوردستان تیڤی سەرپەرشتیا وێ دكەت كو وێ تەلەڤزیۆنێ دیرۆكەكا باش د ڤی بواری دا هەیە و پێدڤی ب پێشڤەبرنا زێدەترە و ل دهۆكێ مە كۆڤارا سڤۆرە هەیە كو وێ ژی دیرۆكەكا باش هەیە».

ئەڤرۆ

سەرۆك مەسعود بارزانی ل سەلاحەددین پێشوازی ل شاندەكێ وەزارەتا دەرڤە یا وەلاتێ هندستانێ كر كو پێكهاتبوو ژ دكتۆر سەعید جێگرێ وەزیرێ دەرڤە یێ هندستانێ و براشانت پیسی بالیۆزێ هندستانێ ل ئیراقێ و سوبهاش چاندرا قونسۆلێ هندستانێ ل هەولێرێ.
د دیدارەكێ دا شاندێ مێهڤان پێزانین بۆ خەباتا سەرۆك بارزانی و گەلێ كوردستانێ هەبوو و دووپاتی ل خواستا وەلاتێ خوە بۆ پێشڤەبرنا پەیوەندیێن د ناڤبەرا هەرێما كوردستانێ و هندستانێ دا د بوارێن تەكنەلۆژیا و نوشداری و زانستی و ئەكادیمی و مەشق و ڕاهێنانێ كر. هەروەسا ئەوژی ڕاگەهاند سەقامگیریا هەرێما كوردستانێ و ئیراقێ و ڕۆژهەلاتا ناڤین بۆ هندستانێ گرنگیەكا تایبەت هەیە.
د پشكەكا وێ دیدارێ دا سەرۆك بارزانی پەیوەندی و دۆستایەتیا د ناڤبەرا گەلێ كوردستانێ و گەلێ هندستانێ ب دیرۆكی و دێرین هەژمارت و پشتەڤانیا خوە بۆ بەرفرەهكرنا پەیوەندیێن د ناڤبەرا هەردو ئالیان دا دووپاتكر.

ئەڤرۆ

بەرپرسێ پەیوەندیێن پارتی دیموكراتی كوردستان، جەعفەر ئێمینكی ڕاگەهاند، قەوارەیێ هەرێما كوردستانێ قەوارەیەكێ دەستووریە و مەترسیێن دەستووری و سیاسی ل سەر نینن.
جەعفەر ئێمینكی ئاشكراكر ژی، كۆمبوون ل گەل ئالیێن سیاسی دێ دەستپێكەن ب مەبەستا ئەنجامدانا هەلبژارتنان.
بەرپرسێ پەیوەندیێن پارتی دیموكراتی كوردستان داخواز ژ ئالیێن سیاسی كر ب ئەركێ بەرپرسیارەتی و دیرۆكی یێ خوە ڕاببن.
جەعفەر ئێمینكی ئاماژەكر ژی» كۆمبوونێن ئالیێن سیاسی بۆ وێ چەندێ نە د ئەڤ سالەدا هەلبژارتنێن پەرلەمانێ كوردستانێ بهێنە ئەنجامدان، چونكە هەلبژارتن پرسەكا گرنگ یا هەرێما كوردستانێ یە و نابیت ب هیچ بەهانەیەكێ ئەو ماف ب خەلكێ هەرێما كوردستانێ نەهێتە دان».

ئەڤرۆ

سەرۆك مەسعود بارزانی د چارچۆڤەیێ كۆمبوونەكێ ل گەل سەركردایەتیا هەردو ڕێكخراوێن ئێكەتیا قوتابیان و ئێكەتیا لاوێن دیموكراتی كوردستانێ ڕاگەهاند، ژ پێخەمەت بهێزكرنا بها و پرەنسیپ و ئارمانجێن بلند، چاكسازی و گوهۆڕینێن دناڤ پارتی دیموكراتی كوردستان دا دێ د بەردەوام بن.
د پشكەكا دی یا ئاخڤتنێن خوە دا، سەرۆك بارزانی ئاماژە ب ڕاسپاردە و ئەنجامێن كۆنگرەیێ 14 یێ پارتی كر و دووپاتكر كو پێدڤیە پارتی بۆ وان ئارمانج و پرەنسیپان بزڤریت كو ژ پێخەمەت وان هاتیە دامەزراندن.

دەقێ بەیاننامەیا بارەگەهێ بارزانی ل دۆر وێ كۆمبوونێ:
سەرۆك مەسعود بارزانی ل گەل سەركردایەتیا هەردو ڕێكخراوێن ئێكەتیا قوتابیێن كوردستانێ و ئێكەتیا لاوێن دیموكراتی كوردستان كۆمبوو.
ل دەستپێكا وێ كۆمبوونێ كورتیەك ل دۆر كار و چالاكی و بەرهەڤیێن بۆ گرێدانا كۆنگرەیێ هەردو ڕێكخراوان هاتە پێشكێشكرن. پاشی سەرۆك بارزانی پەیڤەك پێشكێشی بەرهەڤبوویان كر.
ل دەستپێكا پەیڤێ خوە سەرۆك بارزانی ب هەلكەفتا 18 شوباتێ و سالیادا 70 یا دامەزراندنا هەردو ڕێكخراوێن ئێكەتیا قوتابیێن كوردستانێ و ئێكەتیا لاوێن دیموكراتی كوردستان پیرۆزباهی ل لاوان و قوتابیان كر و هیڤیا بەردەوامیێ و سەركەفتنێ بۆ خواست.
هەروەسا سەرەرای ئاماژەدان ب گرنگیا ڕۆلێ قوتابیان و لاوان د پێگەهاندنا كادران دا بۆ بەردەوامیا خەباتا سیاسی و حزبی داخوازكر كو هەردو ڕێكخراو ب پلانەكا ڕۆهن بۆ پاشەڕۆژێ و ب گیانەكێ هەڤالینی و نیشتمانپەروەرانە و ژ پێخەمەت هاریكاریا پرۆسەیا پەروەردە و پێگەهاندنا لاوان و قوتابیان كۆنگرەیێ خوە ب گرێدەن.
د پشكەكا دی یا پەیڤێن خوە دا سەرۆك بارزانی ئاماژە ب ڕاسپاردە و ئەنجامێن كۆنگرەیێ 14 یێ پارتی كر و دووپاتی ل وێ چەندێ كر كو پێدڤیە پارتی بۆ وان ئارمانج و پرەنسیپان بزڤریت كو ژ پێخەمەت وان هاتیە دامەزراندن.
سەرۆك بارزانی ئەوژی بەرچاڤكر كو چاكسازی و گوهۆڕینێن دناڤ پارتی دا دێ بەردەوام بن ژ پێخەمەت بهێزكرنا بها و پرەنسیپ و ئارمانجێن بلند.
د پشكەكا دی یا وێ كۆمبوونێ دا سەرۆك بارزانی هەڤپشكیا خوە بۆ خەم و ئازارێن زیانڤێكەفتیێن بیڤەلەرزا باكوور و ڕۆژئاڤایێ كوردستانێ و توركیا و سووریێ دووپاتكر و پێزانین ژی بۆ هاریكاری و ب دەنگچوونا حوكمەتا هەرێما كوردستانێ و دەزگەهێ خێرخوازیێ بارزانی و هەموو خەلكێ كوردستانێ بۆ زیانڤێكەفتیێن بیڤەلەرزێ هەبوو.
ڕەوشا سیاسی یا ئیراقێ و ڕەوشا ناڤخوەیی یا هەرێما كوردستانێ تەوەرەكێ دی یێ پەیڤا سەرۆك بارزانی بوون و ل دۆر ڤێ چەندێ سەرۆك بارزانی بەرچاڤڕۆهنیێن پێدڤی بۆ بەرهەڤبوویان شرۆڤەكرن.
هەر ب هەلكەفتا سالیادا دامەزراندنا ئێكەتیا قوتابیێن كوردستانێ و ئێكەتیا لاوێن دیموكراتی كوردستان، نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ پەیامێن پیرۆزباهیێ ئاراستەی هەردو ڕێكخراوێن ناڤبری كرن.

ئه‌ڤرۆ، عه‌زیز هه‌ورامی

به‌رپرسێ فه‌رمانگه‌ها قانوونی یا پارتی دیموكراتی كوردستان، ڕاگه‌هاند، دادگه‌ها فیدرالی یا دستووری نینه‌ و پێدڤیه‌ بهێته‌ هه‌لوه‌شاندن و دادگه‌هه‌كا نوو بهێته‌ پێكئینان ژ به‌ر كو بڕیارێن وێ د سیاسی نه‌.

به‌ختیار حه‌یده‌ر، به‌رپرسێ فه‌رمانگه‌ها قانوونی یا پارتی بۆ ڕۆژنامه‌یا (ئه‌ڤرۆ) گوت” دادگه‌ها فیدرالی ب گۆره‌ی بڕیارا هه‌ژمار 30 یا سالا 2005 ده‌مێ ئیراق ل بن داگیركاریا ئه‌مریكا دا هاتیه‌ دامه‌زراندن، ل گه‌ل نڤیسین و په‌سه‌ندكرنا دستوورێ ئیراقێ ل ماده‌یا 92 ل چاوانیا دامه‌زراندنا دادگه‌ها فیدرالی، ئه‌و دادگه‌ها وی ده‌می ب گۆره‌ی دستووری نه‌هاتیه‌ دامه‌زراندن، له‌وما مان و هه‌بوونا ڤێ دادگه‌هێ یا دستووری نینه‌”.

ئاماژه‌كر” ل سالا 2021 ده‌مێ قانوونا دادگه‌ها فیدرالی هاتیه‌ ڕاستڤه‌كرن، دستوور ل به‌رچاڤ نه‌هاته‌ وه‌رگرتن، ب نه‌ دستووری ئه‌و قانوونه‌ هاته‌ ڕاستڤه‌كرن، د دستووری دا هاتیه‌ هه‌ر ڕاستڤه‌كرنه‌كا گرێدای دادگه‌ها فیدرالی پێدڤی ب دو ل سه‌ر سێ یا په‌رله‌مانی یه‌، به‌لێ ب زۆرینه‌ ئه‌و قانوون ده‌ربازكر”.

به‌ختیار خویاكر ژی” دادگه‌ها فیدرالی ب شێویه‌كێ سیاسیانه‌ كار دكه‌ت و هه‌ر دادگه‌هه‌ك ژ قانوون و دستووری ده‌ربچیت و ب سیاسیانه‌ كاربكه‌ت، ئه‌و دادگه‌هه‌ جهێ باوه‌ریێ نینه‌، پێدڤیه‌ دادگه‌ها فیدرالی ببیته‌ هێڤێنێ تێكگه‌هشتنێ و چاره‌سه‌ریا كێشه‌یان نه‌كو ئه‌و ب خوه‌ ببیته‌ كێشه‌، نوكه‌ وێ دادگه‌هێ كێشه‌ د ناڤبه‌را به‌غدا و هه‌ولێرێ دا دروستكریه‌ ب ڕێیا ده‌ركرنا بڕیاره‌كێ دژی په‌ترۆلا هه‌رێما كوردستانێ، وی ده‌می مه‌ داخوازكر ب توندی دژی وێ دادگه‌هێ ب ڕاوه‌ستین و نابیت ل گه‌ل دادگه‌هه‌كا نه‌ دستووری كار بكه‌ین”.

به‌رپرسێ فه‌رمانگه‌ها قانوونی یا پارتی دبێژیت” دادگه‌ها فیدرالی ب ڤی شێوه‌ی به‌رده‌وام بیت، دێ بڕیارێن مه‌ترسیدارتر ژی دژی هه‌رێما كوردستانێ ده‌ركه‌ت و نابیت بچینه‌ ژێر بارێ بڕیارێن ئه‌و دادگه‌هه‌ ده‌ردكه‌ت و هه‌تاكو پێدڤیه‌ مامه‌له‌ ژی دگه‌ل نه‌هێته‌ كرن، هه‌روه‌سا پێدڤیه‌ دو دادوه‌رێن كورد یێن وێ دادگه‌هێ ژی بهێنه‌ ڤه‌كێشان، ژ به‌ر كو هه‌بوون و نه‌بوونا وان وه‌كو ئێكه‌ وپێدڤیه‌ دادگه‌هه‌كا دستووری یا فیدرالی هه‌روه‌سا جڤاتا فیدرالی ژی بهێنه‌ دامه‌زراندن “.

ل دووماهیێ گوت” بڕیارێن دادگه‌ها فیدرالی یا نوكه‌ یا مه‌ترسیدارتره‌ ژ (دادگه‌ها شۆڕه‌شێ) یا سه‌رده‌مێ سه‌دام حسێنی، ژ به‌ر كو وێ بڕیارێن سته‌مكارانه‌ یێن سێداره‌دانێ دژی سه‌ر كه‌سان ده‌ردكر، به‌لێ ئه‌ڤ دادگه‌ها ب ناڤ فیدرالی بڕیاران دژی ملله‌ته‌كی ده‌ردكه‌ت”.

ئه‌ڤرۆ:

سه‌رۆك مه‌سعود بارزانی په‌سنا بڕیارا په‌رله‌مانێ ئه‌لمانیا یا ب جینۆساید نیاسینا كۆمكوژیا كوردێن ئێزدی دكه‌ت و دبێژیت، ئه‌و بڕیاره‌ جهێ پێزانینا مه‌یه‌ و گه‌له‌ك ب بلندی د هه‌لسه‌نگینین.

ل ڕۆژا 19 ڤێ هه‌یڤێ، ڕوونشتنا په‌رله‌مانێ ئه‌لمانیا بۆ ده‌نگدانێ ل سه‌ر ب جینۆساید نیاسینا كۆمكوژیا كوردێن ئێزدی بڕیڤه‌چوو و ب پتریا ده‌نگان په‌رله‌مانتارێن ئه‌لمانی ئه‌و كۆمه‌لكوژیه‌ ب جینۆساید هه‌ژمارت.

سه‌رۆك مه‌سعود بارزانی سوپاسیا پشته‌ڤانیا ئه‌لمانیا كر و گوت” سوپاسیا هه‌موو پشته‌ڤانیێن ئه‌لمانیا بۆ گه‌لێ كوردستانێ دكه‌ین، مه‌ ئه‌و چاڤه‌ڕێیه‌ ژی ژ وه‌لاتێن دی یێن ڕۆژئاڤایی هه‌یه‌ ژ پێخه‌مه‌ت بده‌ستڤه‌ئینانا دادپه‌روه‌ریێ و نه‌هێلانا سته‌مكاریێ و بڕیارا هه‌ڤشێوه‌یێ په‌رله‌مانێ ئه‌لمانیا بده‌ن”.

هه‌ر پشتی بڕیارا په‌رله‌مانێ ئه‌لمانیا، نێچیرڤان بارزانی، سه‌رۆكێ هه‌رێما كوردستانێ ژ ڕاگه‌هاند” مه‌ سوپاس و پێزانین بۆ هاریكاری و پشته‌ڤانیا به‌رده‌وام یا ئه‌لمانیا هه‌یه‌ و دخوازین هه‌مان گاڤا په‌رله‌مانێ ئه‌لمانیا ژ ئالیێ په‌رله‌مانێ وه‌لاتێن دی یێن ئه‌وروپا و جیهانێ ژی بهێته‌ دان و دادپه‌روه‌ری بۆ قوربانیان بده‌ستڤه‌ بهێت”.

ڕه‌شنڤیسا 20 خالی ژ بلی داخوازیا دانپێدانێ ب جینۆساید نیاسینا كۆمكوژیا كوردێن ئێزدی، داخوازێ ژ حوكمه‌تا ئه‌لمانیا دكه‌ت، ژ ئالیێ دارایی ڤه‌ پشته‌ڤانیا زڤرینا كوردێن ئێزدی یێن ئاواره‌ بۆ حهێن خوه‌ بكه‌ت كو ب گۆره‌ی نڤیسینگه‌ها ڕزگاركرنا ڕه‌ڤاندیێن ئێزدی، هه‌تا نوكه‌ 135 هزار و 860 ئاواره‌ ل كه‌مپێن دهۆكێ دژین و 189 هزار و 337 ئاواره‌یێن دی ل ده‌رڤه‌ی كه‌مپان ل ده‌ڤه‌رێن جودا ل هه‌رێما كوردستانێ دژین.

هه‌ر ل دۆر بڕیارا ب جینۆساید نیاسینا كۆمكوژیا كوردێن ئێزدی، میر حازم ته‌حسین به‌گ، میرێ كوردێن ئێزدی ڕاگه‌هاندبوو” ب جینۆساید نیاسینا كۆمكوژیا ئێزدیان ژ ئالیێ په‌رله‌مانێ ئه‌لمانیا ڤه‌ بۆمه‌ گه‌له‌گ یا گرنگه‌ و باوه‌رناكه‌م د 100 سالێن بۆری دا، د هیچ پرسه‌كێ دا 100% په‌رله‌مانتارێن ئه‌لمانیا د هه‌ڤڕا بوون”.

ئه‌ڤرۆ:

سه‌رۆكێ هه‌رێما كوردستانێ ڕاگه‌هاند، دستوورێ ئیراقێ گرێبه‌سته‌كا سیاسی و جڤاكی یه‌ و نابیت بهێته‌ پشت گوه هاڤێتن. دووپاتكر ژی، ب گۆره‌ی دستووری و ئه‌و ڕێككه‌فتنا بۆ پێكئینانا حوكمه‌تێ هاتینه‌ كرن پشته‌ڤانیا كابینه‌یا محه‌مه‌د شیاع سودانی دكه‌ین.

نێچیرڤان بارزانی، سه‌رۆكێ هه‌رێما كوردستانێ د چارچۆڤه‌یێ پشكداریكرنێ د ڕێوه‌سمێن سالڤه‌گه‌را تیرۆركرنا محه‌مه‌د باقر ئه‌لحه‌كیم، ل به‌غدا په‌یڤه‌ك پێشكێشكر و ڕاگه‌هاند” محه‌مه‌د باقر ئه‌لحه‌كیم وه‌كو دامه‌زرێنه‌رێ ئۆپۆزسیۆنێ ل ئیراقێ ڕێزه‌كا تایبه‌ت دناڤ گه‌لێ كوردستانێ دا هه‌بوو، به‌رده‌وام باوه‌ری ب گوڕانكاریێ و سه‌رئێخستنا پرۆسه‌یێ هه‌بوو، ل سالا 1986 ل گه‌ل بابێ من ئدریس بارزانی ل یه‌كخستنا جیهانبینیا شیعه‌ و كوردان، بۆ ڕوو ب ڕووبوونا دیكتاتۆریه‌تێ ل ئیراقێ، هه‌روه‌سا محه‌مه‌د باقر ئه‌لحه‌كیم په‌یوه‌ندیه‌كا گرنگ ل گه‌ل سه‌رۆك بارزانی و مام جه‌لال تاله‌بانی دا هه‌بوو بۆ وێ ئێكێ ئۆپۆزسیۆنا ئیراقی ئێكبێخن بۆ دژایه‌تیكرنا دیكتاتۆریه‌تێ، بزاڤكرن پێگه‌هێ ئیراقێ ل ئاستێ جیهانێ به‌ر ب پێشڤه‌ ببه‌ن”.

سه‌رۆكێ هه‌رێما كوردستانێ گوت ژی” محه‌مه‌د باقر ئه‌لحه‌كیم خودان هزر و ئایدیایه‌كا جودا بوو ل گه‌ل هه‌موو ته‌خ و چین و مه‌زهه‌بان، باوه‌ری ب ئێك نێزیكربوونا بیروباوه‌رێن جودا هه‌بوو، به‌رده‌وام كار بۆ وێ چه‌ندێ كریه‌ كو هه‌موو گه‌لێن ئیراقێ پێكڤه‌ ب ئاشتی بژین. پێشتر ژی مه‌لا مسته‌فا بارزانی ڕێبه‌رێ بزاڤا ڕزگاریخوازا گه‌لێ كورد، په‌یوه‌ندیێن باش ل گه‌ل به‌رپرسێن مه‌رجه‌عیه‌تا شیعی ل ئیراقێ هه‌بوون، بزاڤكرن ئیراقێ ژبن ده‌ستێ دیكتاتۆریه‌تێ ڕزگار بكه‌ن، محه‌مه‌د باقر ئه‌لحه‌كیم ڕۆله‌كێ گرنگ هه‌بوو ب تایبه‌تی ل سالا 1974 وی ده‌می فه‌توا بۆ كوشتنا كوردان هاته‌ دان، وی پشته‌ڤانی بۆ كوردان ده‌ربری، ئه‌و ئێك بوو ژ وان سه‌ركرده‌یان كو دگوت پێدڤیه‌ د دستووری دا مافێن كوردان و هه‌موو پێكهاته‌یان جهێ خوه‌ بگریت و ماف پێ بهێنه‌ دان”.

نێچیرڤان بارزانی دیاركر” دستوورێ ئیراقێ گرێبه‌سته‌كا سیاسی و جڤاكی یه‌ و نابیت بهێته‌ پشت گوه هاڤێتن، پێدڤیه‌ ژ نوكه‌ و پێڤه‌ گرنگی ب دستووری بهێته‌ دان و نه‌هێته‌ پشت گوه هاڤێتن، چونكه‌ ل پرۆسه‌یا سیاسی یا ئیراقێ دستوور مافێ هه‌موویان ده‌سته‌به‌ر دكه‌ت و بنه‌مایه‌ بۆ بڕێڤه‌برنا ده‌وله‌ت و حوكمه‌ته‌كێ كو خزمه‌تا هه‌موویان بكه‌ت”.

خویاكر ژی” ئه‌م ل هه‌رێما كوردستانێ ب گۆره‌ی دستووری و وان ڕێككه‌فتنێن بۆ پێكئینانا حوكمه‌تێ هاتینه‌ كرن پشته‌ڤانیا محه‌مه‌د شیاع سودانی دكه‌ین و هیڤیدارین هه‌موو وان خالان بجهبینیت یێن كو د پێكئینانا كابینه‌یا خوه‌ دا سۆزا بجهئینانا وان دای، هه‌روه‌سا پشته‌ڤانیا وی دكه‌ین بۆ وێ ئێكێ ڕوانگه‌هه‌ك بۆ چاره‌سه‌ركرنا كێشه‌یان دناڤبه‌را حوكمه‌تا هه‌رێما كوردستانێ و حوكمه‌تا فیدرالی دا په‌یدا ببیت و هه‌موو كێشه‌ ب دانوستاندنێ بهێنه‌ چاره‌سه‌ركرن”.

سه‌رۆكێ هه‌رێما كوردستانێ ڕاگه‌هاند ژی” پێدڤیه‌ به‌غدا ب گۆره‌ی ماده‌یێن دستووری ڕێزێ ل هه‌رێما كوردستانێ و هه‌موو ده‌ڤه‌رێن ئیراقێ بگریت و مافێن وان بده‌ت، بێگومان بجهئینانا دستووری دێ به‌غدا ب هێزتر بیت و ئه‌م ژی پشته‌ڤانیا وێ چه‌ندێ دكه‌ین حوكمه‌ته‌كا ب هێز ل ئیراقێ هه‌بیت، ده‌مێ ئیراق ب خرابترین ڕه‌وش دا ده‌رباز دبیت به‌رده‌وام ئیراقیان چاڤ ل پێشكه‌فتنێ بوو و دخوازت د پێشكه‌فتنا بوارێ ئاسایشێ و خوه‌شتڤیا نیشتمانی و به‌ر پێشڤه‌چوونا ده‌وله‌تێ نێرینه‌ك ل هه‌رێما كوردستانێ بهێته‌ كرن”.

ئه‌وژی به‌رچاڤكر” مه‌ ده‌لیڤه‌ یا ل پێش بۆ وێ ئێكێ پێگه‌هێ ئیراقێ بۆ ئاسته‌كێ باش بزڤرینین و وان كێشه‌یان چاره‌سه‌ر بكه‌ین كو پێشتر په‌یدابووین، ژ ڕوانگه‌ها مه‌ڤه‌ هه‌رێم و ده‌ڤه‌رێن ئیراقێ دوژمنێن هه‌ڤدو نین، پێدڤیه‌ پێكڤه‌ كاركرن و خالێن لاواز یێن خوه‌ نیشا ده‌رڤه‌ نه‌ده‌ین، مه‌ پێدڤی ب چه‌سپاندنا سیسته‌مه‌كێ دیموكراته‌ كو ڕێزێ ل هه‌موو ئایین و نه‌ته‌وه‌یان بگریت”.

ئه‌ڤرۆ:

وه‌لاتیێن خوه‌شتڤی..

من و كابینه‌یا خوه‌ ل به‌رده‌م په‌رله‌مانێ كوردستانێ و هه‌وه‌یێن خوه‌شتڤی سویند یا خاری كو كار بكه‌ین بۆ به‌رژه‌وه‌ندیێن بلند یێن گه‌ل و نیشتمانی و پاراستنا كیانێ دستووری یێ هه‌رێما كوردستانێ، له‌وما ل ده‌ستپێكا ڤێ كابینه‌یێ، وه‌سا ڕێككه‌فتین كو شوونوارێن دوئیداره‌ییێ نه‌هێلین و بڕیارێن حوكمه‌تێ، ل سه‌رانسه‌ری هه‌رێما كوردستانێ، ب ئێك شێوه‌ بهێنه‌ بجهئینان.

نابیت ل هیچ پشكه‌كا هه‌رێما كوردستانێ، بڕیارێن حزبی یان تاكه‌كه‌سی، ڕێ ل جهئینانا كار و به‌رنامه‌یێ حوكمه‌تێ بگریت. ئه‌ز ب یه‌كسانی، سه‌حدكه‌مه‌ سه‌رانسه‌ری هه‌رێما كوردستانێ و خوه‌ ب به‌رپرسیار دزانم به‌رامبه‌ر هه‌موو وه‌لاتیێن هه‌رێما كوردستانێ ل هه‌موو پارێزگا و ئیداره‌یێن سه‌ربخوه‌. به‌لێ مخابن، ڕێگری هاتیه‌ كرن و ئاسته‌نگ بۆ حوكمه‌تا هه‌رێمێ هاتینه‌ دروستكرن، كو ڤێ چه‌ندێ ژی زیان ب ژیانا وه‌لاتیان گه‌هاندیه‌.

نێزیكی دو سالایه‌، كێشه‌یا كۆمكرنا داهاتی و نه‌مانا پاره‌ی ل بانكێن سنوورێ سلێمانیێ و گه‌رمیان و هه‌له‌بجه‌ و ڕاپه‌رین یا هه‌ی. مه‌ دووڤچوونا ڤێ كێشه‌یێ كریه‌ و لژنه‌یه‌ك ژ وه‌زاره‌تێن دارایی و ناڤخوه‌، بۆ دووڤچوونا ڤێ كێشه‌یێ هاته‌ پێكئینان، به‌لێ ئه‌گه‌رێ ڤێ كێشه‌یێ ئه‌وه‌، كو هنده‌ك كه‌س و ئالی ژ پێخه‌مه‌ت به‌رژه‌وه‌ندیا خوه‌، ده‌ستێن خوه‌ دئێخنه‌ دناڤ پرۆسه‌یا كۆمكرنا داهاتێ وان سنووراندا، له‌وما هه‌ر ئه‌و كه‌س و ئالی به‌رپرسیارن ل به‌رامبه‌ر وان زیانێن ب وه‌لاتی و داموده‌زگه‌هێن حوكمه‌تێ دگه‌هن.

شه‌فافیه‌ت ئه‌وه‌ كو حوكمه‌ت، بخوه‌ چاڤدێریێ ل سه‌ر هه‌موو پرۆسه‌یا كۆمكرنا داهاتێن خوه‌ بكه‌ت، نه‌كو تنێ ئاگه‌هداری وێ پشكێ بیت كو بۆ حوكمه‌تێ دهێته‌ جوداكرن. ل ده‌ستپێكا ڤێ كابینه‌یێ، مه‌ بزاڤكریه‌ داهاتێن هه‌رێمێ ڕێكبێخین و هه‌تا ئاسته‌كێ باش ژی د سه‌ركه‌فتی بووین و هه‌ر ژ به‌ر وی ئه‌گه‌ری، مه‌ شیا قۆناغا دژوار یا بێ داهاتی ل ده‌ستپێكا دیاربوونا په‌تایا كورۆنایێ ده‌رباز بكه‌ین.

وه‌لاتیێن به‌رێز…

ده‌مه‌كه‌ ژ ئالیێ داموده‌زگه‌هێن ئێكه‌تی نیشتمانی كوردستان، كه‌ هه‌ڤپشكه‌كێ سه‌ره‌كیێ ڤێ كابینه‌یێ نه‌، وه‌سا دهێته‌ باسكرن كو دوورپێچی ل سه‌ر سنوورێ سلێمانیێ هه‌یه‌، هه‌موو شه‌هره‌زایێن ڕه‌وشا دارایی یا هه‌رێما كوردستانێ دزانن كو داهاتی په‌ترۆلێ و هه‌روه‌سا ئه‌و پشكا بودجه‌یا هنده‌ك جاران ژ به‌غدا هاتی، ب شێوه‌یه‌كێ یه‌كسان هاتیه‌ به‌لاڤكرن و مووچه‌یێ كارمه‌ندان پێ هاتیه‌ دان، ئه‌وا جهێ پرسیارێ، داهاتێ نه‌په‌ترۆلی یێ ناڤخوه‌یا هه‌رێما كوردستانێ بوو كو پشكه‌كا مه‌زن ژی داهاتێ ده‌روازێن سنووری یه‌، به‌لێ مخابن، ڕێ نه‌هاتیه‌ دان ئه‌ڤ بواره‌ ل سنوورێ سلێمانیێ و گه‌رمیان و هه‌له‌بجه‌ و ڕاپه‌رین بهێته‌ ڕێكخستن، له‌وما سه‌ركردایه‌تیا ئێكه‌تیێ، به‌رپرسیاره‌ به‌رامبه‌ر وێ ڕه‌وشا ل وان ده‌ڤه‌ران دروست بووی.

هه‌كه‌ به‌رژه‌وه‌ندیا وه‌لاتیێن مه‌، ل سه‌ر به‌رژه‌وه‌ندیا حزبی بهێته‌ دانان، چاره‌سه‌ریا ڤێ ڕه‌وشێ ژی یا ب ساناهی یه‌ و مه‌ پلان و به‌رنامه‌یێ كارا هه‌یه‌ بۆ چاره‌سه‌ركرنا ڤێ كێشه‌یێ و گاڤێن باش ژی مه‌ هاڤێتبوون بۆ چاره‌سه‌ریێ، به‌لێ مخابن ڕێگری هاته‌ كرن ل جهئینانێ و پاشی كریارا تیرۆركرنا هاوكار جاف ئه‌و پرۆسانه‌ ب تمامی ئیفلیجكر.

كێشه‌یێن دارایی و بابه‌تێ كۆمكرنا داهاتی، نێزیكی دو سالایه‌ هه‌ی و ده‌هان كۆمبوون ل سه‌ر ڤی بابه‌تی هاتینه‌ كرن و به‌رچاڤ ڕۆهنیه‌كا باش هه‌بوو بۆ چاره‌سه‌ریێ. بریارا جڤاتا وه‌زیران ژی یا هه‌ی بۆ هنارتنا هێزا هه‌ڤپشك بۆ ده‌روازه‌یێن سنووری، به‌لێ ئێكه‌تی نیشتمانی ڕێگر بوو و گه‌فێن وێ چه‌ندێ كر كو هه‌كه‌ ئه‌و بهێته‌ كرن دێ شه‌ڕێ ناڤخوه‌یی ڕووده‌ت، له‌وما د ڤی ده‌می دا، زه‌قكرنا ڤی بابه‌تی، تنێ بۆ وێ چه‌ندێ بوو ڕۆناهی نه‌هێته‌ خستن ل سه‌ر بابه‌تێ تیرۆركرنا هاوكار جاف ل جه‌رگێ پایته‌ختا هه‌رێما كوردستانێ. هه‌رێما كوردستانێ و پێشمه‌رگه‌، هێمایێن ڕوو ب ڕووبوونا تیرۆر بوون و نابیت ل ناڤخوه‌یا هه‌رێمێ، هنده‌ك كه‌س بۆ ئێكلاكرنا كێشه‌یێن خوه‌ په‌نایێ بۆ تیرۆرێ ببه‌ن.

د ڤێ كه‌یسێ دا، مه‌ هیچ ئالیه‌ك تۆمه‌تبار نه‌كریه‌، تنێ ناڤێن چه‌ند كه‌سێن تۆمه‌تبار یێن هه‌ی كو پێدڤیه‌ بهێنه‌ ڕاده‌ستكرن بۆ دادگه‌هێ و بۆ ڤێ مه‌به‌ستێ ژی، ب فه‌رمی نڤیسیار ئاراسته‌ی ئالیێ په‌یوه‌ندیدار ل سلێمانیێ هاتیه‌ كرن. هه‌ر ژ ده‌ستپێكێ، مه‌ گوتیه‌ بلا لژنه‌یه‌كا ڤه‌كۆلینی یا هه‌ڤپشك هه‌بیت و بلا ئالیێ سیێ ژی، هه‌تاكو ل ئاستێ نێڤده‌وله‌تی دا ژی، پشكداریێ د ڤه‌كۆلینێ دا بكه‌ن، به‌لێ مخابن، هه‌تا نوكه‌ به‌رسڤه‌ك بۆ ڤێ داخوازیێ نینه‌. ئانكو كێشه‌ داهات و ڕه‌وشا دارایی یا سلێمانیێ نینه‌، ئه‌وا هه‌ی ئه‌وه‌، داخواز ژ مه‌ دهێته‌ كرن كه‌یسا تیرۆرا هاوكار جاف بهێته‌ بێ ده‌نگكرن كو ئه‌ڤه‌ژی داخوازیه‌كا نه‌ڕه‌وایه‌ و نابیت وه‌لاتیێن هه‌رێما كوردستانێ قبوول بكه‌ن.

ڕه‌وشا ده‌ڤه‌رێ ژ مه‌ دخوازیت كو كێشه‌یێن خوه‌ چاره‌سه‌ر بكه‌ین و ب هێز ڤه‌ به‌ر ب پاشه‌ڕۆژێ گاڤان بهاڤێژین. ل ڤێرێ ژ پێخه‌مه‌ت به‌ژه‌وه‌ندیا گشتی و ده‌ربازكرنا ڤێ قۆناغێ، ڤان چه‌ند خالێن ل خوارێ، د ئێخمه‌ به‌رده‌م ڕایا گشتی و هه‌موو ئالیان:

ئێك: ل دۆر كه‌یسا تیرۆركرنا هاوكار جاف كو هۆكارێ سه‌ره‌كیێ وێ ڕه‌وشا ئالۆزه‌، داخواز دكه‌م، ل ده‌ستپێكێ تۆمه‌تبار بهێنه‌ ڕاده‌ستكرن بۆ دادگه‌هێ و پاشی بلا لژنه‌یه‌كا هه‌ڤپشك ب به‌رهه‌ڤبوونا ئالیێ نێڤده‌وله‌تی و نوونه‌رێن په‌رله‌مانێ كوردستانێ یان هه‌ر وه‌لاته‌كێ دۆست كو بخوازیت پشكدار بیت، بهێته‌ پێكئینان، تاكو هه‌ر چ زووتر ڤه‌كۆلین دگه‌لدا بهێته‌ ده‌ستپێكرن و ئه‌نجام بۆ ڕایا گشتی بهێنه‌ ئاشكراكرن.

دو: ل ده‌ستپێكا ده‌ست بكاربوونا كابینه‌یا نه‌هێ، داخواز دهاته‌ كرن بابه‌تێ لامه‌ركه‌زیه‌ت و هاتنا خوارێ یا ده‌ستهه‌لاتێ ل داهات و خه‌رجیان بهێته‌ بجهئینان، له‌وما ئه‌و چه‌نده‌ هاته‌ بجهئینان. نوكه‌ ژ ئالیێ تیما وه‌زاری یا ئێكه‌تی نیشتمانی كوردستانی، داخواز دهێته‌ كرن خه‌رجی ببنه‌ مه‌ركه‌زی، هه‌كه‌ ئه‌ڤه‌ بهێته‌ داخوازكرن، پێدڤیه‌ كۆمكرنا داهاتی ژی ببیته‌ مه‌ركه‌زی و پرۆسه‌یا كۆمكرنا داهاتی ب تایبه‌ت ل خالێن سنووری، ل بن سه‌رپه‌رشتی و چاڤدێریا چر یا مه‌ركه‌زی بیت. بۆ ڤێ مه‌به‌ستێ ژی، پێدڤیه‌ هه‌ماهه‌نگی د ناڤبه‌را وه‌زاره‌تێن دارایی و ناڤخوه‌ و پێشمه‌رگه‌ دا هه‌بیت تاكو ڕێ ل قاچاخچیێ و ده‌ستبرن بۆ داهاتێ ده‌روازه‌یێن سنووری بهێته‌ گرتن و پێكئینانا هێزه‌كا هه‌ڤپشك بۆ ڤێ مه‌به‌ستێ گه‌له‌ك یا پێدڤیه‌.

سێ: پێدڤیه‌ ئاسته‌نگ بۆ پرۆسه‌یا چاكسازیێ و ئێكگرتناهێزا پێشمه‌رگه‌ی نه‌هێنه‌ دروستكرن. د ڤێ كابینه‌یێ دا ب كریا مه‌ گاڤ بۆ چاكسازیێ د هێزا پێشمه‌رگه‌ی و ئێكگرتنا وێ هاڤێتینه‌ و پێدڤیه‌ هێزا پێشمه‌رگه‌ی، ببیته‌ هێزه‌كا نیشتمانی یا ب هێز بۆ به‌رگریێ ژ كیانێ دستووری یێ هه‌رێما كوردستانێ و دوورخستنا گه‌فان، دوور ژ ئه‌جنده‌یێن حزبی و تاكه‌كه‌سی.

چار: ژ پێخه‌مه‌ت به‌رژه‌وه‌ندیا گشتی و پرۆسه‌یا دیموكراسی ل هه‌رێمێ، پێدڤیه‌ هه‌ر چ زووتر، په‌رله‌مانێ كوردستانێ ڕوونشتنا خوه‌ ئه‌نجام بده‌ت بۆ كاراكرنا كۆمسیۆنا بلند یا هه‌لبژارتنان، تاكو ب كریار، گاڤا بۆ ئه‌نجامدانا هه‌لبژارتنان بهاڤێژیت و پێدڤیه‌ ئه‌ڤساله‌، هه‌لبژارتنێن په‌رله‌مانێ كوردستانێ بهێنه‌ ئه‌نجامدان و ئه‌م ل حوكمه‌تا هه‌رێمێ، د به‌رهه‌ڤین هه‌موو پێدڤیێن هه‌لبژارتنان، د زووترینده‌م دا دابین بكه‌ین.

پێنج: پێدڤیه‌ ئالیێن سیاسی یێن پشكدار د حوكمه‌تێ دا، وه‌كو حزب، پشته‌ڤانێن حوكمه‌تا هه‌رێمێ بن و نابیت د ناڤ حوكمه‌تێ دا بن و ڕۆلێ ئۆپۆزسیۆنێ ببینن. پێدڤیه‌ وه‌زیر و تیمێن وه‌زاری ژی، جێبه‌جێكارێن ئه‌جنده‌یێن حكومی بن ونابیت كێشه‌ و ئالۆزیێن سیاسی بهێنه‌ ڤه‌گوهاستن بۆ ناڤ حوكمه‌تێ. پێدڤیه‌ بزاڤا چاره‌سه‌ركرنا كێشه‌یێن سیاسی، ل ده‌رڤه‌ی حوكمه‌تێ وان بهێته‌ كرن نه‌كو كارێ حوكمه‌تێ ئیفلیج بكه‌ن.