ئاڤـاکرنا ده‌ولـه‌تەکـا کـوردی بۆ ئارامیـا رۆژهـه‌لاتا ناڤین یا پێدڤیه
بەرپرسەکێ ئیتالیا دیار دیار دکەت دڤێت ل رۆژهەلاتا ناڤین گوهۆڕینێن مەزن بهێنە کرن و د چارچۆڤەیێ گوهۆڕینان دا دڤێت دەولەتەکا کوردی ژی بهێتە ئاڤاکرن، ئاڤاکرنا دەولەتەکا کوردی بۆ ئارامیا رۆژهەلاتا ناڤین ژی گەلەک یا گرنگە.
ئالیسساندرۆ ڤیگنا سه‌رۆکێ کۆمسیۆنا سیاسی یا ئێکەتیا ئۆرۆپا ژ جڤاتا نوونه‌رێن ئیتالیا د داخۆیانیه‌کێ دا راگه‌هاند کو ئاڤاکرنا ده‌وله‌تا کوردی دێ ل رۆژهه‌لاتا ناڤین بیتە ئەگەرێ ئارامیێ و گۆت: (بۆ چارەسەر‌کرنا پرسێن ل رۆژهەلاتا ناڤین دڤێت گوهۆڕینێن مەزن بهێنە کرن، ب سالانە رۆژهەلاتا ناڤین د ناڤ ئالۆزیان دایە و شەڕێن گەلەک مەزن ژی ل وێ دەڤەرێ هاتنە کرن و مخابن هەتا نها ژی ئالۆزیێن ل رۆژهەلاتا ناڤین بەردەوام دکەن، ئەو یەک ژی نیشا ددەت کو دەم یێ هاتی گوهۆڕینێن گەلەک مەزن ل وێ دەڤەرێ بهێنە کرن، ئێک ژ وان ژی بێگومان ئاڤاکرنا دەولەتەکێ یە بۆ کوردان، ب ئاڤاکرنا دەولەتەکێ بۆ کوردان دێ رەوشا رۆژهەلاتا ناڤین ئارام بیت و ئەو یەک د بەرژەوەندیا هەموو گەلێن رۆژهەلاتا ناڤینە).
هەمان بەرپرسی سەبارەت ب رەوشا سووریێ و کوردان ژی دیار کر کو ئه‌و وه‌ک ئیتالیا هیڤیدارن ل سووریێ ژی وه‌ک ل ئیراقێ رێڤه‌به‌ریه‌کا هه‌رێمی یا بهێز بهێته ئاڤاکرن و گۆت: (نها ل سووریێ قۆناغەکا نوو دەستپێکریە، بێگومان کوردان ل سووریێ هەتا نها ژ بۆ ئازادیا خوە گەلەک قوربانی داینە، د شەڕێ ل دژی داعشێ دا کوردان گەلەک هاریکاریا هەڤپەیمانیا نێڤدەولەتی کرن، ژ بەر ڤێ یەکێ ژی دڤێت سیستەمێ سووریێ بهێتە گوهۆڕین، دڤێت سیستەمێ سووریێ ببیتە فیدرالی دا کورد و نەتەوەیێن دی یێن ل سووریێ بگەهنە مافێن خوە، هەکە ل سووریێ هەرێمەکا کوردی وەکو یا ل ئێراقێ بهێتە ئاڤاکرن دێ گەلەک پرسێن هەی هێنە چارەسەرکرن و وەکو ئیتالیا ئەم پشتەڤانیێ ل مافێن رەوا یێن گەلێ کورد ل سووریێ دکەین).
ناڤهاتی د دووماهیا ئاخڤتنا خوه دا ژی راگه‌هاند کو کورد مللەتەک قارەمان و ئاشتیخوازن، د شەڕێ ل دژی داعشێ دا هەموو جیهانێ دیت کا کوردان چەند ژ بۆ ئازادیێ قوربانی دان، کورد هەردەم ل رۆژهەلاتا ناڤین ژ بۆ ئارامیێ و ئاشتیێ کار کرینە، کورد چو دەمەکێ نەبووینە مەترسی بۆ گەلێن دی و گۆت: (ژ بەر ڤێ یەکێ ژی دەم یێ هاتی کورد ژی وەکو هەموو گەلێن دی یێن جیهانێ بگەهنە مافێن خوە، هەتا کورد نەگەهنە خوە رەوشا رۆژهەلاتا ناڤین ژی ئارام نابیت، ئەزموونا چەندین سالێن بۆری ژی ئەو یەک سەلماندیە کو دڤێت کوردان ژی دەولەتەکا خوە یا جودا هەبیت، ژ بەر ڤێ یەکێ ژی دڤێت وەلاتێن رۆژهەلاتا ناڤین ب بەهانەیێن جودا جودا نەبنە رێگر ل هەمبەر ئاڤاکرنا دەولەتەکێ بۆ کوردان).
