ئاکپارتی تیرۆرستەکێ بۆ په‌رله‌مانی كاندید دکەت
ئەڤرۆ نیوز ، زنار تۆڤی :
ئاكپارتى یا ده‌ستهەلاتدار ل توركیا بۆ هه‌لبژارتنێن داهاتی یێن په‌رله‌مانی كه‌سەک كاندید كریه، كو پێشتر ب تۆمه‌تا پەیوه‌ندیکرنێ ب رێكخراوا تیرۆرستى یا قاعیده هاتیە گرتن.
سایتێ سكاى نیوز ئاماژه ب هندێ دایە ، کو میدیایێن توركیا بەحس ل ئۆسمان نورى گول ئه‌چار دكهن، كو ئێكه ژ كاندیدێن حزبا ئه‌ردۆغانی و ل پارێزگەها وانێ هاتیە كاندید كرن و هەروەسا سه‌رۆكێ وێ لیستێ یە ل وێ هه‌رێمێ دا.
میدیایێن توركیا ئاماژه ب بوریێ ئۆسمان نورى دكهن، كو پێشتر ب تۆمه‌تا پەیوه‌ندیێ ل گه‌ل رێكخراوا قاعیده ل گه‌ل 16 گومان لێكریێن دیتر، ل سالا 2009 هاتیە گرتن ، پشتی هنگێ دایە دادگەهێ و چه‌ندین هەیڤان هاتیە گرتن.
پاشی ل سالا 2014 هێزێن به‌رهنگاربوونا تیرۆرێ چووینە سه‌ر مالا وی، لێ شاره‌دارێ وێ هه‌رێمێ پشتگیرى لێ كریه و وه‌ك سزایه‌ك ژی به‌رپرسێ هێزێن دژه تیرۆرێ هاتیە ڤەگوهاستن.
پێ دچیت عوسمان نوورى پەیوه‌ندیەکا نێزیك ل گه‌ل ئه‌ردۆگانی هه‌بیت، چونكی ل سالا 2014 خوە وه‌ك شاره‌دارێ وانێ كاندید كریە، ره‌جه‌ب ته‌ییب ئه‌ردۆگانی پشتیگری لێ كریە، لێ ده‌رنەکەفت. چونكی ل دەمێ برێڤەچوونا بانگه‌شا هه‌لبژارتنان كۆمه‌کا سه‌رپێچیا كرن.
ل 24 خزه‌یرانێ دێ هه‌لبژارتنێن سه‌رۆكاتیێ و په‌رله‌مانی ل توركیا هێنە ئه‌نجامدان.
