ئه‌ردوگانى ده‌ستپێكرنا ئۆپه‌راسيۆنا له‌شكرى ل شنگالێ راگه‌هاند
ئه‌ڤرۆنيوز:
سه‌رۆكێ توركيا ره‌جه‌ب ته‌يب ئه‌ردۆگان،ئه‌ڤرۆ ئێكشه‌مبى 25/3/2018 راگه‌هاند كو وه‌لاتێ وى ده‌ست ب ئه‌نجامدانا ئۆپه‌راسيۆنه‌كا له‌شكرى ل شنگالێ دژى شه‌رڤانێن پارتيا كاركه‌رێن كوردستانێ (په‌كه‌كێ) كريه.
ئاژانسا ئه‌نادۆل يا توركى به‌لاڤكر كو ئه‌ردۆگانى راگه‌هاند” پێشتر مه دووپات كربوو كو دێ چينه شنگالێ ونوكه مه ئۆپه‌راسيۆنا له‌شكرى ل وێرێ ده‌ستپێكريه”.
رۆژا ئه‌ينى يا بۆرى23/3/2018، پارتيا كاركه‌رێن كوردستانێ (په‌كه‌كێ) راگه‌هاندبوو كو ل سه‌ر داخوازا حوكمه‌تا عيراقێ وكوردێن ئێزدى، ئه‌و يێ ژ شنگالێ ده‌ركه‌فتين پشتى ب دووماهى هاتنا ئه‌ركێ وان دشه‌رێ دژى داعشێ دا ونوكه ره‌وشا شنگالێ يا سه‌قامگيره وكوردێن ئێزدى شيانێن پاراستنا خوه يێن هه‌ين.
ل رۆژا 19/3/2018، سه‌رۆكێ توركى ب دوور نه‌زانيبوو كو پشتى ب دووماهى هاتنا ئۆپه‌راسيۆنا له‌شكرى بۆ سه‌ر عه‌فرينێ ل سووريێ، له‌شكرێ توركى ده‌ست ب ئۆپه‌راسيۆنه‌كا وه‌سا ل شنگالێ ل عيراقێ بكه‌ت بۆ پاقژكرنا وێ ژشه‌رڤانێن په‌كه‌كێ.
دوهى شه‌مبيێ 24/3/2018، جه‌بار ياوه‌ر، ئه‌ميندارێ گشتيێ وه‌زاره‌تا پێشمه‌رگه داخواز ژ حوكمه‌تا عيراقێ كر كو هه‌لويست ل به‌رامبه‌ر توركيا هه‌بيت كو بزاڤا پێشێلكرنا سه‌روه‌ريا عيراقێ دكه‌ت وئاماژه كر كو هاتنا هێزێن توركيا بۆ ناڤ سنور وئه‌سمانێ عيراقێ پرسه‌كا سه‌روه‌ريه وپێدڤيه به‌غدا ل دژى راوه‌ستيت.