ئه‌ردۆغان: ناهێلین كۆبانێ یه‌كا دی دوباره ببیت
ئه‌ڤرۆ نیوز:
ره‌جه‌ب ته‌یب ئه‌ردۆغان، سه‌رۆككۆرمارێ توركیا ئاماژه دا سه‌ركه‌فتنا هێزین كوردی یا سالا 2015ێ یا دژی داعشێ ل كۆبانێ و خویا كر كو ئه‌و ناهێلن كۆبانێ یه‌كا نوو دوباره ببیت.
ئه‌ردۆغانی دیار كر كو ئه‌و رێ ناده‌ت رۆژئاڤایێ كوردستانێ بگه‌هیته ده‌ریایا ناڤه‌راست و گۆت: ئه‌و دێ هه‌ر دەڤەرەکا تیرۆرستی کو ب درێژییا باکۆرێ سووریێ ھەتا دەریایا ناڤەراس بچیت ژناڤ بەت.
ل سالا 2015ێ ب پشته‌ڤانییا هێزین پێشمه‌رگه‌ی، یه‌په‌گه شیا كۆبانی ژ داعشێ رزگار بكه‌ت، د ده‌مه‌كی دا توركیا ل گۆری هه‌لوه‌ستێ خوه یێ ئاشكرا پێ باشتر بوو یه‌په‌گه بشكێت و كۆبانێ نه‌كه‌ڤیته بن كۆنترۆلا یه‌په‌گێ.
ئه‌ڤه د ده‌مه‌كی دایه كو توركیا پشته‌ڤانییا ئۆپه‌راسیۆنه‌كێ ل دژی به‌ره‌یا ئه‌لنوسره ل ئدلبێ نیزیكی عه‌فرینێ دكه‌ت، هنده‌ك ژێده‌ر دبێژن توركیا دگه‌ل ئه‌لنوسره دا رێككه‌فتییه كو هنده‌ك ده‌ڤه‌ران بێ شه‌ر راده‌ستی ئۆپۆزسیۆنا سووریێ یا بن هه‌ژموونا توركیا ڤه بكه‌ت، شرۆڤه‌كار دبێژن كو ئارمانجا سه‌ره‌كی یا توركیا كانتۆنا عه‌فرینێ یه.
