ئه‌رد بۆ ١٠ كارگه‌هێن پیشه‌سازی ل پارێزگه‌ها دهۆكێ هاته ته‌رخانكرن
ئه‌ڤرۆ:
ب سه‌رپه‌رشتیا د. عه‌لی ته‌ته‌ر، پارێزگارێ دهۆكێ و ب به‌رهه‌ڤبوونا لایه‌نێن په‌یوه‌ندیدار لژنا گه‌شه‌پێدان و پشتگیریا پیشه‌سازی ل پارێزگه‌ها دهۆكێ كۆمبوو.
د كۆمبوونێ دا، دانوستاندن ل دۆر پڕۆژه‌یێن كارگه‌هێن پیشه‌سازی هاته كرن و پشتی هه‌لسه‌نگاندنێ ئه‌رد بۆ ١٠ كارگه‌هێن پیشه‌سازی هاتینه ته‌رخانكرن، ئه‌و كارگه‌هه ژی د بیاڤێن به‌رهه‌مئینانا گێج و بویاغێ، مه‌له‌ڤانگه‌هێن فایبه‌ر گلاس و كورسیك و سه‌یوانێن باغچا، چێكرنا پێدڤیێن ئاڤاهیێن حازر، دروستكرنا دوشه‌ك و بالیفك و چارچه‌ڤا، كارگه‌ها كلینیسێن هشك، به‌رهه‌مئینانا كه‌ره‌سته‌یێن ئاڤاهیان، كارگه‌ها ئیزوگام و فلینكوت و قێر ماستیك، كارگه‌ها درینا جلكان، كارگه‌ها به‌رهه‌مئینانا فلینێ و دیكورێن خانیا و بۆریێن پلاستیكی دانه.
هه‌روه‌سا د كۆمبوونا لژنا گه‌شه‌پێدانێ دا باس ل ده‌ڤه‌را پیشه‌سازیا ده‌ڤه‌رداریا به‌رده‌ڕه‌ش هاته‌كرن و ئه‌ردێ پێدڤی بۆ هاته ته‌رخانكرن.
دیسا هه‌ر دوهی د. عه‌لی ته‌ته‌ر، پارێزگارێ دهۆكێ پێشوازی ل خانم د. یوكو فوجی مورا، به‌رپرسا رێكخراوا كۆچ و كۆچبه‌ران یا سه‌ر ب نه‌ته‌وێن ئێكگرتی ڤه ل هه‌رێما كوردستانێ كر، د هه‌ڤدیتنه‌كێ دا ل دۆر به‌رنامه و كارێ رێكخراوا ناڤبری د بیاڤێ هاریكاریا خه‌لكێ پێدڤی و ئاواره و په‌نابه‌ران و هه‌ماهه‌نگیا ل گه‌ل حكومه‌تا هه‌رێما كوردستانێ و كارگێریا خوه‌جهی و به‌رنامێ وان بۆ داهاتی هاته كرن.
