ئه‌مريكا دێ كۆمه‌لگه‌هه‌كا مه‌زن بۆ كونسه‌لخانا خوه ل هه‌ولێرێ ئاڤاكه‌ت
ئه‌ڤرۆنيوز:
حوكمه‌تا هه‌رێما كوردستانێ پارچه زه‌ڤيه‌ك بۆ ئاڤاهيێ نوويێ كونسولخانا ئه‌مريكى ل هه‌ولێرێ ديار دكه‌ت وئه‌ڤرۆ دوشه‌مبى 24/4/2018 درێ وره‌سمه‌كى دا كو نێچيرڤان بارزانى سه‌رۆك وه‌زيرێن هه‌رێما كوردستانێ ودۆگلاس سليمان باليۆزێ ئه‌مريكا ل عيراقێ به‌رهه‌ڤ بووين، ل دۆر ره‌وشا پرۆژه‌ى وپه‌يوه‌نديێن ئه‌مريكا وهه‌رێما كوردستانێ ئاخڤتن.
دۆگلاس سليمان، باليۆزێ ئه‌مريكا ل عيراقێ گۆت” ئه‌مريكا يا پێگيره ب پشته‌ڤانيا خه‌لك وحوكمه‌تا هه‌رێما كوردستانێ وڤه‌كرنا كونسولخانێ وئاڤاكرنا كۆمه‌لگه‌هه‌كێ بۆ وێ ل هه‌ولێرێ نيشانا وێ پشته‌ڤانيێ يه وواشنتۆن پشته‌ڤانيێ ل حوكمه‌ته‌كا ب هێز ل هه‌رێما كوردستانێ دكه‌ت”.
سليمانى گۆت ژى” ئه‌مريكا دخوازيت ل گه‌ل هه‌رێما كوردستانێ وزه‌لامكارێن كورد بۆ پرۆژێن باشتر كار بكه‌ت”.
نێچيرڤان بارزانى سه‌رۆك وه‌زيرێن هه‌رێما كوردستانێ دگۆتاره‌كێ دا راگه‌هاند” ده‌ستخوه‌شيێ ل وێ ده‌ستپێشخه‌ريێ دكه‌م بۆ ئاڤاكرنا كۆممه‌لگه‌ها كونسولخانا ئه‌مريكى ل هه‌ولێرێ، نيشانا باوه‌رى وپشته‌ڤانيا واشنتونێ يه ل هه‌رێما كوردستانێ وپێشخستنا په‌يوه‌نديێن خوه ل گه‌ل هه‌رێمێ”.
دياركر ژى” په‌يوه‌نديێن ئه‌مريكا وهه‌رێمێ نه يێن نوكه نه ول سه‌رهلدانا 1991، ئه‌مريكا ل رێزا به‌راهيێ بوو يا بريارا دروستكرنا ده‌ڤه‌را ئارام، ل قۆناغا ژناڤبرنا رژێما به‌عس وشه‌رێ داعشێ ژى، ئه‌مريكا په‌يوه‌نديه‌كا باش ل گه‌ل هه‌رێما كوردستانێ هه‌بوو وئه‌ڤرۆ ژى ل قۆناغا سه‌قامگيريێ دا ئاڤاهيێ كۆمه‌لگه‌ها كونسولخانا خوه ل هه‌ولێرێ دروست دكه‌ت وئه‌ڤه ژى نيشانا گرنگى وپێشڤه‌چوونا وان په‌يوه‌نديانه”.
نێچيرڤان بارزانى گۆت ژى” گه‌ل وحوكمه‌تا هه‌رێما كوردستانێ هه‌ڤپشكى ل گه‌ل گه‌لێن پێشكه‌فتى يێن جيهانێ ل هه‌موو بوارێن ديموكراسيێ ومافێن مرۆڤى كر وهه‌موو ئه‌و بوارێن هه‌ين كو جيهانا پێشكه‌فتى ل سه‌ر هاتيه ئاڤاكرن، پێشمه‌رگه ژى مل ب ملى جڤاكێ نێڤده‌وله‌تى بۆ پاراستنا وان بهايان دژى داعشێ وتيرۆرێ شه‌ركر”.
سه‌رۆك وه‌زيرێن هه‌رێما كوردستانێ گۆت ژى”چاڤێ مه يێ ل هه‌ماهه‌نگى وپه‌يوه‌نديا باشتر ودخوازين وه‌لاتێن جيهانێ ژى هه‌ڤشێوێ ئه‌مريكا گرنگيێ ب پێشخستنا ئاستێ نوونه‌راتيێن خوه بده‌ن”.
