ئه‌مريكا ره‌خنه‌يێن دژوار ل ئيرانێ دگريت
ئه‌ڤرۆ نيوز، فاتما مزوورى:
وه‌زیرێ ده‌رڤه یێ ئه‌مریكا د تویته‌كى دا ره‌خنه‌یێن توند د شێوازێن سه‌ركوت كرنێن ده‌ست هه‌لاتدارێن ئیرانێ ل وه‌لاتیێن خوه‌نیشانده‌رێن نه‌رازی یێن ئیرانێ گرتن و ئه‌ڤ كاره ب تاوان ناڤ بریه.
هه‌ڤده‌م ته‌كه‌ز ل سه‌ر وێ یه‌كێ كریه كو وه‌لاتیێن ئیرانی ژ هه‌ژی وێ یه‌كێ نه رێز ل مافێن وان بهێته گرتن.
مایك پۆمپۆ وه‌زیرێ ده‌رڤه یێ ئه‌مریكا ئاماژه ب وێ چه‌ندێ ژى كريه كو د زڤستانا ده‌رباس بووی دا هه‌تا نها پتری پێنج هه‌زار وه‌لاتیێن ئیرانێ ژبال حوكمه‌تا وی وه‌لاتی هاتینه ده‌سته‌سه‌ر كرن.
د ناڤا وانا ژی دا سێ ئافره‌ت، كو ب سه‌ده‌ما دژایه‌تیا حیجابا ب زووری د گرتیگه‌هان دا هاتینه ده‌سته‌سه‌ر كرن.
هه‌روه‌سا ب سه‌دان وه‌لاتیێن ژینگه‌هـ پارێزی و ب سه‌دان ده‌روێشێن سه‌لاسی و 14 وه‌لاتیێن ئه‌هوازی و و 30 جوتكارێن ئه‌سفه‌هانی د گرتیگه‌هێن ئیرانێ دا هاتینه ده‌سته‌سه‌ر كرن.
هژماره‌كا په‌رله‌مانتارێن ئیرانێ ده‌سته‌سه‌ر كرنا چار هزار وه‌لاتیێن ئیرانی پشت راست كرينه كو زڤستانا ده‌رباس بووی ژبال حوكمه‌تا ئیرانی هاتبوونه ده‌سته‌سه‌ر كرن.
یا دیاره به‌شه‌ك ژ ئافره‌تێن كو نه‌رازینه ب حیجابێن ب زووری ژبال سازیێن دادی یێن وی وه‌لاتی هاتنه ده‌سته‌سه‌ر كرن، لێ به‌لێ ب ده‌هان چالاكڤانێن ژینگه‌هـ پارێزی كو هاتینه ده‌سته‌سه‌ر كرن د گرتیگه‌هێن ئیرانێ دا بێی كو چو تاوانه‌ك ب سه‌ر وانا دا هاتبيته ساخكرن هه‌يا نها د گرتیگه‌هان دا ماینه و كه‌یسێن وانا نه‌هاتینه ئێك لای كرن.
كومارا ئیسلامیا ئیرانی هنده‌ك جاران ژبال ده‌سته‌یا مافێن مرۆڤا یا نێڤده‌وله‌تی هاتیه تۆمه‌تبار كرن، ژ به‌ر كو رێزێ ل مافێن مرۆڤان ناگريت و مافێن وان بن پێ دكه‌ت، به‌لێ كار ب ده‌ستێن ئیرانێ ب به‌رده‌وامی ڤان تۆمه‌تان ره‌ت دكه‌ن.
