ئه‌مريكا سزا ل سه‌ر سێ كه‌ساتى و دو وه‌زاره‌تێن توركيا سه‌پاند
ئه‌ڤرۆ نيوز:
وه‌زاره‌تا ژ ده‌رڤه يا ئه‌مريكا د راگه‌هاندنه‌كێ سزايێن وه‌لاتێ خوه بۆ سه‌ر توركيا ئاشكه‌را كرن و راگه‌هاند كو سێ به‌رپرسێن بلندێن توركيا و دو وه‌زاره‌ت سزادان.
د راگه‌هاندنه‌كێ دا، وه‌زاره‌تا ژ ده‌رڤه يا ئه‌مريكا هاتيه: فه‌رمانا سه‌رۆكاتيێ ب ده‌ست گه‌هشتيه بۆ بجهئينانا سزايێن ئه‌مريكا بۆ سه‌ر توركيا.
د راگه‌هاندنێ دا ئاماژه ب وێ چه‌ندێ كريه كو سزا سێ به‌رپرسێن بلندێن توركيا گرتيه د ناڤ دا وه‌زيرێ به‌ره‌ڤانيێ و وه‌زيرێ وزا توركيا يێن هه‌ين.
وه‌زاره‌تا ژ ده‌رڤه يا ئه‌مريكا د راگه‌هاندنه‌كێ دا، راگه‌هانديه، كو ئۆپه‌راسيۆنا له‌شكرى يا توركيا مه‌ترسى خستيه سه‌ر مه‌ده‌نيان و هه‌ر وه‌سا كه‌مپينێن دژى داعش لاواز كرينه.
هه‌ڤده‌م وه‌زاره‌تا ژ ده‌رڤه يا ئه‌مريكا هوشدارى دايه توركيا كو هه‌كه ئۆپه‌راسيۆن يا به‌رده‌وام بيت سزايێ دى دێ سه‌پينن و ده‌ست ب جهـ وه‌ستاندنا ئۆپه‌راسيۆنا له‌شكرى يا ئێكلايانه يا توركيا بۆ سه‌ر باكوورێ رۆژهه‌لاتێ سوريا كه‌ت.
شه‌ڤا بۆرى دوشه‌مبى 14ى چريا ئێكێ 2019 سه‌رۆكێ ئه‌مريكا د راگه‌هاندنه‌كێ دا ئاماژه ب وێ چه‌ندێ دا كو ل ڤان نێزيكان دێ سزايان ب سه‌ر به‌رپرسێن نها و به‌رێ يێن توركيا دا سه‌پينيت و سزا ئه‌وان كه‌شان ژى دگريت كو هاريكاريا چالاكيێن نه‌سه‌قامگێريێن توركيا ل سوريا دكه‌ن.
سه‌رۆكێ ئه‌مريكا ئاماژه ب وێ چه‌ندێ كريه كو دانوستاندن ل گه‌ل توركيا ده‌رباره‌ى رێكه‌فتنا بازرگانى ب بهايێ 100 مليار دۆلاران ل گه‌ل توركيا راوه‌ستينن. هه‌ڤده‌م باج ل سه‌ر ئاسنى ب رێژا 50% زێده كر.