ئه‌مریكا دووماهی هه‌لوه‌ستێ خوه ل دۆر رۆژئاڤایێ كوردستانێ ئاشكرا دكه‌ت
ئه‌ڤرۆ:
وه‌زاره‌تا به‌رگریێ یا ئه‌مریكا راگه‌هاند كو شه‌رێ ل دژی داعشێ ل سووریێ به‌رده‌وام دكه‌ت و ئه‌مریكا ژی د چارچۆڤێ شه‌رێ ل دژی داعشێ و گرۆپێن دی یێن تیرۆرستی دا دێ ل سووریێ مینیت و پشته‌ڤانیا ئه‌مریكا بۆ هێزێن سووریا دیموكرات ژی دێ د به‌رده‌وام بیت.
وه‌زاره‌تا به‌رگریێ یا ئه‌مریكا دووماهی هه‌لوه‌ستێ خوه ل دۆر رۆژئاڤایێ كوردستانێ و باكورێ سووریێ ئاشكرا كر و راگه‌هاند كو ئه‌مریكا ژ به‌ر شه‌رێ ل دژی داعشێ چوو سووریێ، نها ژی هێزێن ئه‌مریكا د چارچۆڤێ شه‌رێ ل دژی داعشێ دا ل باكورێ سووریێ ماینه و هاریكاریا هێزێن سووریا دیموكرات دكه‌ن، ژ به‌ر هندێ ژی هه‌تا مه‌ترسیا داعشێ و گرۆپێن دی یێن تیرۆرستی ل سه‌ر باكورێ سووریێ هه‌بیت دێ هێزێن ئه‌مریكا ژی ل وێرێ مینن.
د به‌رده‌وامیا داخۆیانیا وه‌زاره‌تا به‌رگریێ یا ئه‌مریكا دا ئه‌و یه‌ك ژی هاتیه كو ئۆپه‌راسیۆنێن به‌ری نها یێن توركیا ب چو ره‌نگه‌كێ د خزمه‌تا شه‌رێ ل دژی تیرۆرێ دا نه‌بووینه و ئۆپه‌راسیۆنێن توركیا زیانا خوه بۆ شه‌رێ ل دژی داعشێ هه‌بووینه، ژ به‌ر هندێ ژی ئه‌مریكا ب چو ره‌نگه‌كێ ل گه‌ل هندێ نینه كو توركیا جاره‌كا دی ده‌ست ب ئۆپه‌راسیۆنێن نوو ل دژی هێزێن كوردی بكه‌ت و دڤێت توركیا ده‌ستان ژ ئالۆزكرنا ره‌وشا باكورێ سووریێ به‌رده‌ت.
ئه‌و یه‌ك د ده‌مه‌كێ دایه كو به‌ری چه‌ند رۆژان كۆچكا سپی یا ئه‌مریكا ژی راگه‌هاند كو ئه‌و ب چو ره‌نگه‌كێ رێ ناده‌ن توركیا ده‌ست ب ئۆپه‌راسیۆنه‌كا دی ل باكورێ سووریێ بكه‌ت و هه‌ر ئۆپه‌راسیۆنه‌كا توركیا ل دژی هێزێن سووریا دیموكرات دهێته رامانا ئێرش ل سه‌ر ئاسایشا ئه‌مریكا و ئه‌و یه‌ك ژی ب چو ره‌نگه‌كێ ناهێته قه‌بوول كرن.
وه‌زاره‌تا ده‌رڤه یا توركیا ژی راگه‌هاند كو ئه‌مریكا هاریكاریا رێكخراوا تیرۆرستی یا په‌یه‌گێ دكه‌ت و هه‌موو وه‌لاتێن جیهانێ ژی باش دزانن كو یه‌په‌گه سه‌ر ب په‌كه‌كێ یه و مه‌ترسیا خوه بۆ توركیا هه‌یه، دڤێت ئه‌مریكا ده‌ست ژ پشته‌ڤانیا یه‌په‌گێ به‌رده‌ت و هاریكاریا وێ رێكخراوا تیرۆرستی نه‌كه‌ت، توركیا بۆ پاراستنا سنۆرێن خوه نه‌چاره یا پێدڤی ل دژی رێكخراوێن تیرۆرستی بكه‌ت.
چاڤدێرێن سیاسی ژی دیار دكه‌ن كو نها ناكۆكیێن توركیا و ئه‌مریكا گه‌له‌ك دژوار بووینه، به‌ری چه‌ند رۆژان ژی به‌رپرسێن ئه‌مریكا ب توندی هۆشداری دانه توركیا كو نابیت ب چو ره‌نگه‌كێ توركیا چه‌كان ژ رۆسیا بكڕیت و هه‌روه‌سا ئه‌مریكا ژ سه‌ره‌دانا ڤێ دووماهیێ یا ئه‌ردۆغانی بۆ رۆسیا ژی دلگرانه، چونكو ئه‌ردۆغانی دڤێت كارتا رۆسیا ل دژی ئه‌مریكا بكار بینیت لێ سه‌ره‌دانا ئه‌ردۆغانی یا بۆ رۆسیا بێی ئه‌نجام بوو و رۆسیا داخواز ژ توركیا كر كو هه‌موو هێزێن خوه ژ سووریێ ڤه‌كێشیت، ب تایبه‌تی ژی نها رۆسیا و رژێما به‌شاری ب هه‌موو ره‌نگه‌كێ به‌رهه‌ڤیان دكه‌ن دا كو ئدلبێ ژ ده‌ستێ هێزێن سه‌ر ب توركیا ده‌رخینن و ره‌نگه شه‌ره‌ك دژوار د ناڤبه‌را هێزێن سه‌ر ب توركیا و رۆسیا دا روو بده‌ت، لێ هه‌تا نها دیار نینه كا دێ توركیا داخوازا رۆسیا یا بۆ ڤه‌كێشانا هێزێن خوه ژ ئدلبێ قه‌بوول كه‌ت یان نه؟
ل ئالیێ دی ده‌زگه‌هێن راگه‌هاندنا توركیا ژی دیار دكه‌ن كو توركیا ب چو ره‌نگه‌كێ به‌رهه‌ڤ نینه كو ئدلبێ بێی مه‌رج راده‌ستی رژێما به‌شاری بكه‌ت، لێ هه‌تا نها دیار نینه كا مه‌رجێن توركیا چنه، چونكو ل گۆر راپۆرته‌كا ئاژانسا سپوتینگ یا رۆسی د سه‌ره‌دانا ئه‌ردۆغانی یا بۆ رۆسیا دا پوتینی هه‌موو مه‌رجێن ئه‌ردۆغانی یێن ل دۆر سووریێ ره‌ت كربوون و داخواز كربوو توركیا بێی مه‌رج هه‌موو هێزێن خوه ژ سووریێ ڤه‌كێشیت.
