ئه‌نجامێن دوماهیێ یێن ریفراندۆما سه‌ربخوه‌ى یا كوردستانێ راگه‌هاندن
ئه‌ڤرۆ نیوز ، هلۆرى:
كومسیونا بلند یا سه‌ربخوه‌ى یا هه‌لبژاردن و راپرسیێ یا هه‌رێما كوردستانێ ئه‌ڤرۆ دوماهى ئه‌نجامێن ریفراندۆما سه‌ربخوه‌ى یا كوردستانێ راگه‌هاندن و رێژا ده‌نگێن به‌لێ 92،72% بوویه.
دنڤیسارا كومسیوونێ دا هاتیه پشتى كو ئه‌نجامێن برایێ بو ئه‌نجومه‌نا دادوه‌ریێ و سه‌روكاتیا دادگه‌ها پێداچونێ یا هه‌رێما كوردستان و ده‌سته‌یا دادوه‌ریێ یا هه‌لبژاردنان و راپرسیێ هاتیه هنارتن و ئه‌نجامێن ریفراندۆما سه‌ربخوه‌ى یا كوردستان و ده‌ڤه‌رێن كوردستانیێن ده‌رڤه‌یێ كارگێریا هه‌رێما كوردستانێ هاتنه په‌سه‌ندكرن.
ل گوره‌ى نڤیسارێ كو ئه‌ڤرۆ 10 چریا ئێكێ 2017 به‌لاڤكریه و دانه‌یه‌ك بو ئه‌ڤرۆ نیوز ره‌وانه‌كریه تێدا هاتیه: ( هژمارا ده‌نگده‌ران چوار ملیون 581 هزار و 255 ده‌نگده‌ر بوون و مافێ پشكداریێ هه‌بوو ، و هژمارا پشكداران ژى سێ ملیون و 305 هزار و 925 ده‌نگده‌ر بوون ، و ده‌نگێن سپى و پیچ و دورئێخستى ژى 219 هزار 990 ده‌نگده‌ر بوون ، و ده‌نگێن درۆست ژى دوو ملیون و 85 هزار و 925 ده‌نگ بوون ، و بڤێ یه‌كێ ژى رێژا پشكداریا د ریفراندۆمێ دا 72،16% بوویه ، و رێژا ده‌نگێ به‌لێ 92،73% بوو و دبه‌رامبه‌ر ده‌نگێن نه‌خێر ژى 7،27% بو)
