ئه‌ندامه‌كێ سه‌ركردايه‌تيا پارتى:سلێمانيێ دێ پارتى وبارزانى هه‌لبژێريت
ئه‌ڤرۆنيوز:
ئه‌ندامێ سه‌ركردايه‌تيا پارتى ديموكراتى كوردستان، عه‌لى عه‌ونى دبه‌رپه‌رێ خوه ل سه‌ر تۆرا جڤاكى يا فه‌يسبووكى نڤيسينه‌ك ل بن ناڤێ سلێمانيێ ونووخوازى به‌لاڤكر وتێدا دبێژيت” ژ سالا 1966 وهه‌تا نوكه ل سلێمانيێ بۆ دژايه‌تيا هزرا نه‌ته‌وى، رێكخستن وحزبێن جۆرا وجۆر دهێنه دروستكرن، هه‌ر رۆژه‌كێ ل بن ناڤه‌كى وب هيجه‌ته‌كێ رێكخستنه‌ك وهنده‌ك ب ناڤ كه‌سايه‌تى بۆ لێدانا پارتى وبارزانى قوت دبن، هزارا هێجه‌تێن سه‌ير دئينن بۆ وێ چه‌ندێ هزرا نه‌ته‌وى وسه‌ربخوه‌خوازى راوه‌ستن وخه‌لكێ باژێرێ سلێمانيێ بينن سه‌ر بيروباوه‌رێن خوه.
عه‌لى عه‌ونى دپشكه‌كا دى يا نڤيسينا خوه دا دبێژيت” باژێرێ سلێمانيێ مه‌يلا نووخوازيێ يا هه‌ى، له‌وما هه‌موو جاره‌كێ هه‌مان كه‌لوپه‌لێ كه‌ڤن يێ رزى ب ناڤه‌كى وب كراسه‌كێ جودا دده‌نه خه‌لكى وپشتى ده‌مه‌كى، خه‌لكێ داماى يێ سلێمانيێ دبينن كو فێل ل وان هاتيه كرن وتشتێ سه‌خته ب وان هاتيه فرۆتن”.
گۆت ژى” ئه‌و حزب ورێكخستنێن ل سلێمانيێ هه‌ين، هه‌موو مێريێن كونه‌كێنه، هه‌موو ژى دبينن كو پارتى حزبا بنه‌مال ونه‌خوينده‌وار ومه‌سين هه‌لگر وهزاران بێ رێزيێن دى، لێ ئه‌و ب خوه هه‌لگرێن وان سيفه‌تانه وخرابتر ژى”.
