ئه‌ندامه‌كێ لژنا پاكسازيێ: ئه‌و نامينيت كو به‌رپرسه‌كى 100 زێره‌ڤان هه‌بن
ئه‌ڤرۆنيوز:
به‌رى چه‌ند رۆژان پرۆژێ قانوونا چاكسازيێ دكه‌رتێ وه‌زيفا گشتى خانه‌نشينيێ دا ژلايێ جڤاتا وه‌زيرێن هه‌رێمێ ڤه چوويه په‌رله‌مانێ كوردستانێ وبرياره په‌رله‌مان ل روونشتنا داهاتى داخواندنا ئێكێ بۆ بكه‌ت وپاشى ئاراسته‌ى لژنێن دارايى وقانوونى بكه‌ت.
فه‌رسه‌ت سوفى ئه‌ندامێ په‌رله‌مانێ كوردستانێ ژ فراكسيۆنا پارتى وئه‌ندامێ لژنا پاكسازيێ راگه‌هاند” ئه‌ڤ پرۆژه قانوونه هه‌ر كه‌سه‌كێ ڤه‌دگريت كو ئيمتيازه‌كێ ژحوكمه‌تێ وه‌ردگريت ويا گشتگيره ودژى كه‌سێ نه‌هاتيه دارێشتن ونه دژايه‌تيه بۆ پرۆسا دادپه‌روه‌ريێ ل وه‌زيفا گشتى وچو پرۆژه‌ك ژى بێ كێماسى نابن، له‌وما دبيت ل په‌رله‌مانى ئاخڤتنێن جدى ل دۆر بهێته كرن وئه‌و خالێن لاواز يێن تێدا بهێنه دروستكرن”.
سوفى رۆهنكر” ده‌مه‌كێ درێژه به‌حس ل وێ چه‌ندێ دهێته كرن كو پێدڤيه چاكسازى دوه‌زيفا گشتى دا بهيته كرن، له‌وما نوكه حوكمه‌تێ ب خوه يا هاتيه ژێر بار، ئانكو پێدڤيه ئه‌م هه‌موو دهاريكار بين وپشته‌ڤان بين وهه‌ر به‌ربه‌سته‌ك دچيته دخانا دژه چاكسازيێ دا”.
وى په‌رله‌مانتارى زێده‌تر بۆ باسنيوز گۆت” چاره‌نڤيسێ وان كه‌سان يێن وه‌زيفه نه‌ديتى وب پلێن بلند هاتينه خانه‌نشينكرن، ئه‌ڤ قانوونه دێ ژوان گريت وپلێن وان دێ ژێ هێنه وه‌رگرتن، ئه‌و نه‌بن يێنتاكو سالا 1991 رێز لێ هاتيه گرتن كو رێزلێنانا پێشمه‌رگه‌يه، ئه‌لێ ئه‌وين نه‌شايسته وب پلێن تايبه‌ت هاتينه خانه‌نشينكرن، ئه‌ڤجا وه‌زير بن يان ريڤه‌به‌رێن گشتى ودبزاڤا رزگاريخوازا كوردستانێ دا پشكدار نه‌بوون، دێ ناڤێن وان هێنه ده‌رخستن، قانوونێن عيراقى ژى دێ ل سه‌ر وان هێنه بجهئينان كو ب پلها راوێژكار وجێگرێ وه‌زيرى ورێڤه‌به‌رێ گشتى هاتينه دانان وهه‌ر كه‌سه‌كێ ب نه‌قانوونى پلا وى هاتبيته بلندكرن، دێ پلا وى هێته خوار”.
ل دۆر به‌رپرسان ژى، ئاشكراكر” زێره‌ڤانێن به‌رپرسان دێ هێنه رێكخستن ونامينيت كو به‌رپرسه‌كى 100 كه‌س ل گه‌ل دابن” ديسا گۆت” هه‌ر كه‌سه‌كى چه‌ند مووچه‌ك هه‌بن، دێ پێداچوون پێدا هێته كرن ودێ هێنه سه‌رپشكرن دهه‌لبژارتنا مووچه‌كى ب تنێ دا ودێ پێداچوون دليستا مووچێ كه‌سوكارێن شه‌هيدان ژى دا هێته كرن وهه‌روه‌سا ده‌رماله دێ هێنه رێكستن وپێداچوون دوان ژى دا دێ هێته كرن”.
خوياكر ژى” ئه‌ڤ پرۆژه قانوونه نوكه يێ ل په‌رله‌مانى وئه‌ركێ په‌رله‌مانى يه رۆلێ خوه يێ ديرۆكى بگێريت ووى پرۆژه‌ى په‌سه‌ند بكه‌ت، دچارچۆڤێ ڤى پرۆژه‌ى دا دێ رێژا گه‌نده‌ليێ ده‌ركه‌ڤيت، له‌وما دخوازين ژهه‌موو حزبان دهاريكاربن بۆ ڤى پرۆژه‌ى”.
دياركر” ب بجهئينانا ڤێ چاكسازيێ دێ پاره‌كێ زۆر بۆ گه‌نجينا گشتى ڤه‌گه‌ريت”.
ل دۆر مووچه‌خۆرێن كادرێن حزبان كو ژ حوكمه‌تێ پاره‌ى وه‌دگرن، فرسه‌ت سوفى گۆت” هه‌ر كه‌سه‌ك ژنوكه وپێڤه مووچه‌ى ژ حوكمه‌تێ وه‌رگريت، پێدڤيه ده‌وامێ بكه‌ت وبه‌رهه‌م بۆ حوكمه‌تێ هه‌بيت، ژبلى ڤێ چه‌ندێ مووچێ نه‌قانوونى نامينيت”.
