ئه‌وێن ئه‌ڤ گۆمه شوێلی كری، ب سلامه‌تی لێ ده‌رباز نابن
غیاس خالد زێباری
ل ڤان سالێن داویێ و پشتی بالاده‌ستبوونا ڕه‌ها یا پێكهاتێ شیعی ل ده‌ستهه‌لات و سازیێن ده‌وله‌تا ئیراقێ ب رێكێن جودا جودا هه‌ول دهێته‌دان بۆ شوێلیكرنا گۆما زه‌لالا كوردستانێ، جار د رێكا له‌شكری و جار ب رێكا گه‌مارۆیێن سیاسی و ئابۆری و جار ژی برسیكرنا خه‌لكێ كوردستانێ ب بڕینا مووچه و بودجا هه‌رێمێ و گاڤێن داویێ ژی ده‌ركرنا چه‌ندین بریاریێن دوژمنكارانه دژی قه‌وارێ هه‌رێما كوردستانێ و پێكهاتێن خه‌لكێ كوردستانێ ژلایێ دادگه‌ها فیدرال ڤه.
سه‌ركردایه‌تیا سیاسیا كوردستانێ و حوكمه‌تا هه‌رێما كوردستانێ ب رێبه‌ریا پارتی دیموكراتی كوردستان هه‌دارا ئه‌یۆب پێغه‌مبه‌ر (س. خ) بكارئینا و پڕانیا مه‌رج و داخوازیێن ئیراقێ وه‌ك راده‌ستكرنا نه‌فتێ و داهاتێ ده‌روازێن سنووری و…هتد بجهئینان داكو ره‌وش ئالۆزتر نه‌بیت و كوردان نه‌كه‌نه به‌هانه‌یێن سه‌رهه‌لدانا كاره‌ساتێن مه‌زن د ناڤ ئیراقێدا. لێ سه‌ره‌رای ڤێ هه‌می ده‌سهه‌لاتدارێن ئیراقێ پشتی سه‌رنه‌كه‌فتنا پیلان و گاڤێن وان یێن دژی هه‌رێما كوردستانێ، نه‌خاسمه پارتی یێن سیاسی و له‌شكری و ئابۆری سه‌رنه‌گرتی و هاتینه هه‌لوه‌شاندن د رێكا دادگه‌ها فیدرال بریارێن لاوازكرن و نه‌هێلانا قه‌واره‌یێ هه‌رێمێ ده‌ركرن، مینا هه‌لوه‌شاندنا په‌رله‌مانى و كۆمسیۆنا هه‌لبژارتن و راپرسیا كوردستانێ و نه‌هێلانا كۆتایا پێكهاته‌یان ل په‌رله‌مانێ كوردستانێ و به‌رده‌وامیا بڕینا مووچه و بودجه‌ی، خوه‌كره شوینگرێ ده‌ستهه‌لاتێن ده‌ستووری و قانوونی یێن هه‌رێمێ.
ده‌ستهه‌لاتا شیعه‌گه‌ریا ئیراقێ ب پشته‌ڤانیا هنده‌ك ئالیێن سیاسی یێن كوردستانێ ب ڤان بریار و سه‌ره‌ده‌ریێن دژی پارتی و وه‌رگرتنا راسپارده و ره‌شنڤیسێن قانوونی ل وه‌لاته‌كێ دیاركری ب مه‌ره‌ما لاوازكرنا پێگه‌هێ پارتی كو مان و نه‌مانا قه‌واره‌یێ هه‌رێمێ یێ پێڤه گرێداییه، چونكی شیعه‌یێن ده‌ستهه‌لادارێن ئیراقێ و ئه‌و وه‌لاتێ سپۆنسه‌ریا وان دكه‌ت باش دزانن، هێز و هه‌بوونا پارتی، هێز و هه‌بوونا قه‌وارێ هه‌رێما كوردستانێ و كوردایه‌تیێ یه، له‌وما دڤێت ئه‌ڤ گۆمه (هه‌رێما كوردستانێ) ژبۆی پاراستنا به‌رژه‌وه‌ندیێن خوه یێن تایفی مینا سووریا، یه‌مه‌ن، لبنان و كه‌رتێ غه‌ززه ل فه‌له‌ستینێ شوێلی بكه‌ن، چونكی هه‌ناسه‌یا وان ب شوێلیكرن و دۆزه‌خكرنا ده‌ڤه‌رێ دهێته هه‌لكێشان، نه‌خاسه ل ڤی ده‌می كو هه‌رێما كوردستانێ به‌ر ب هه‌لبژارتنێن په‌رله‌مانی ڤه دچیت و هه‌می پێشبینی به‌رب سه‌ركه‌فتنه‌كا مه‌زنا پارتی ڤه دچن و لاوازبوونا دویڤه‌لانكێن به‌ره‌یێ موقاومێ ل كوردستانێ، له‌وما گڤاشێن زێده‌تر لسه‌ر پارتی و حوكمه‌تا هه‌رێما كوردستانێ كرن، كار گه‌هشته پیلانا راده‌ستكرنا كۆدێن ڤاڤارتن ئه‌نجامێن هه‌لبژارتنێن كوردستانێ بێشی بهێنه ئه‌نجامدان!، هه‌رچه‌نده ئه‌ڤه پێشبینیه لێ پێشبینیه‌كا به‌رئاقله، چونكی كۆمسیۆنا هه‌لبژارتنێن ئیراقێ یا د ده‌ستێن وان حزبێن ڤێ دوژمناتیا كوردستانێ دكه‌ن و ئه‌و حزب ژ لایێ یێن د ده‌ستێ وی وه‌لاتێ سپۆنسه‌رێ وان و شویلیكه‌رێن ڤێ گۆمێ یه.
لێ پارتی ب سه‌رۆكاتیا سه‌رۆك مسعود بارزانی لسه‌ر هه‌می پیلانێن دژی هه‌رێما كوردستانێ و ماف و داخوازی و ده‌ستكه‌فتێن خه‌لكێ كوردستانێ زۆرا هشیاره و ب بریارا پشكداری نه‌كرنێ ل هه‌لبژارتنێن بن سێبه‌ر و رێنمایی یێن وان هێز و ئالیێن دوژمنكار یێن پێشوه‌خت ئه‌نجامان دیاردكه‌ن و ده‌رڤه‌ی ئیراده و ده‌ستهه‌لاتا خومالیا كوردستانێ و ئاماژه‌یێن خۆڤه‌كێشانێ ل پرۆسا سیاسی یا ئیراقێ، ئه‌ڤ پیلانا وان ژی هه‌لوه‌شاندنا پارتی بوویه خه‌جخه‌جۆكا زه‌لال راگرتنا گۆما كوردستانێ و ب ڤێ بریاریا پارتی زۆر پیلان و بریارێن هێز و لایه‌نێن ژناڤبرنا قه‌وارێ هه‌رێما كوردستان كریه دێ ستاپ بن و ژناڤ چن. چونكی پارتی و سه‌رۆك بارزانی چ جاران چ بریار نه‌داینه كو پێشییا خوه ب زه‌لالی نه‌بیت.
ئه‌ز باوه‌رم ب ڤێ بریار پارتی سه‌نگ و پێگه‌هێ هه‌رێما كوردستانێ دێ بهێزتربیت و ل داهاته نێزیك ده‌ستهه‌لاته‌كا شه‌رعی كوردستانی ب بریارا خه‌لكێ كوردستانێ دێ ده‌ستهه‌لاتداریا كوردستانێ كه‌ت، نه‌ك بریارێن كه‌سانێن مه‌زهه‌ب په‌رست و شۆفینی، ئه‌وێن ئه‌ڤرۆ ڤێ دوژمناتیا پارتی و حوكمه‌تا هه‌رێما كوردستانێ دكه‌ن، بۆ لێبۆرینێ و ته‌وبه‌كرنێ دێ قه‌ستا هه‌ولێرا پایته‌خت كه‌ن و گۆما وان دێ شوێلی مینیت و پێ ناهێته زه‌لالكرن و خه‌لكێ كوردستانێ ژی ب ئاشتیانه دێ خائین و خۆفرۆشێن كوردستانێ سزا ده‌ت.
