ل شنگالێ و كۆبانێ
غیاس خـالد زێباری
ل سه‌ر پێشنیار و داكۆكییا سه‌رۆك مه‌سعوود بارزانی ل رۆژا 22/10/2014 په‌رله‌مانێ كوردستانێ ب پڕانی چوونا پێشمه‌رگه‌هێن كوردستانی بۆ كۆبانێ ل رۆژئاڤایێ كوردستانێ په‌سند كر، ژبلی پاراستن و رزگاركرنا كۆبانێ و گونده‌وارێن وێ ل داگیركرن و وێرانكرنێ و كاره‌ساتێن خویناوی و جڤاكی ل سه‌ر ده‌ستێ چه‌كدارێن تیرۆرستێن بناڤ ده‌وله‌تا ئیسلامی (داعش)، ره‌هه‌ندێن مه‌زن یێن مرۆڤایه‌تی و نشتیمانی و مرۆڤایه‌تی و سیاسی و دبلۆماسی هه‌بوون، چونكی جارا ئێكێ یە د دیرۆكێ دا ب فه‌رمی و ره‌زامه‌ندیا نیڤده‌وله‌تی و هه‌رێمایه‌تی هێزێن پێشمه‌رگه‌هێن كوردستانێ سنوورێن وه‌لاتان دبڕن و به‌شه‌كێ كورد و كوردستانیا یێن هه‌ڤ نفش و زمان و نه‌ته‌وه ل داگیركرنێ رزگار دكه‌ن، ئه‌ڤه ژی كۆپیتكا هه‌ستكرنێ یه ب به‌رپرسیاره‌تیا نه‌ته‌وه‌یی و نشتیمانی و مرۆڤایه‌تیا سه‌ركردایه‌تیا هه‌رێما كوردستانێ كوردستانێ یه ب سه‌رۆكایه‌تیا سه‌رۆك مه‌سعود بارزانی، ڤه‌گه‌ریانا پێشمه‌رگه‌هی ل كۆبانێ پشتی تمامبوونا ئه‌ركێ وان بێ مایتێكرنێن سیاسی و له‌شكری و راده‌ستكرنا ده‌ڤه‌رێ ب هێزێن ده‌ستهه‌لاتدارێن خۆجهــ، ئالیه‌كێ دیتر یێ په‌روه‌رده و دیسپلینیا پێشمه‌رگه‌هێ كوردستانێ ب قانوونێن نیڤده‌وله‌تی و به‌رپرسیاریا نشتیمانی و مرۆڤایه‌تی . ژ ئالیه‌كێ دیتر چه‌كدارێن هه‌لگرێن هه‌مان ئایدیۆلۆژیا بۆ كۆبانێ داخازا هاریكاریا پێشمه‌رگه‌هی دكر، ل شنگالێ و چه‌ندین ده‌ڤه‌رێن هه‌ریما كوردستانێ كو (پ.ك.ك) خوه كریه ده‌ستهه‌لاتدار و چ هزرا بۆ قانوونێن هه‌رێما كوردستانێ و نیڤده‌وله‌تی ناكه‌ن و ب هێزا چه‌كی ئیرادا خوه دسه‌پینن و ب ئاشكرا دژایه‌تیا سازیێن هه‌ریما كوردستانێ دكه‌ن، ئه‌ڤ هه‌بوونا په‌كه‌كێ ده‌لیڤه دایه وه‌لاتێن جیران سنوورین هه‌رێمێ ببه‌زینن و زیانێن مه‌زن بگه‌هینێ ، ئه‌وا حیبه‌تی ئه‌وه په‌كه‌كه یا به‌رهه‌ڤه شه‌ڕی ل دژی هه‌ریما كوردستانێ رابگه‌هینیت ئه‌گه‌ر داخوازا به‌ردانا وانه‌ڤه‌ران بكه‌ت ئه‌وێن چه‌ندین ساڵه خه‌لكێ وێ لێ ده‌ركری و ل هه‌می به‌ر و بۆمان بیًَ به‌رهر كری، لێ ب ئاشكرا و فه‌رمی ده‌ڤه‌ره‌كا مینا چیایێ شنگالێ و ده‌ور و به‌رێن وێ راده‌ستی حوكمه‌تا ئیراقێ بكه‌ت و ب فه‌رمی ببیته به‌شه‌ك ل وێ حه‌شدا شه‌عبی ئه‌وا ب هه‌می هێزێن خوه‌ڤه هه‌ولا ژناڤبرنا قه‌وارێ هه‌رێما كوردستانێ ددا و نهۆ ژی ب مۆشه‌ك و دروونان جار جار هێرش دكه‌ت و به‌رده‌وام كه‌فا دكه‌ت ..! ئه‌ڤا په‌كه‌كه دكه‌ت ب بازرگانیه‌كا سیاسی و پیلانگێریا دژی مافێن نه‌ته‌وه‌یی و نشتیمانیێن كوردا دهێته دیتن و ئه‌وا پێشمه‌رگه ژی دكه‌ت ب تمامی به‌روڤاژیا په‌كه‌كێ یه، ئه‌ڤه ژی نیشانێ جوداهیا په‌روه‌رده‌یا سیاسی و مرۆڤایه‌تی و نشتیمانیا پارتیێن باشوورێ كوردستانێ ب تایبه‌ت پارتی دیموكراتی كوردستانه ل گه‌ل وێ په‌روه‌رده‌یا په‌كه‌كی ل سه‌ر دچیت .
