ئه‌و گه‌نجێ كوردێ كچه‌كا ئه‌لمانى كوشتى ل دهۆك هاته ده‌سته‌سه‌ركرن
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌رێ پۆليسێن پارێزگه‌ها دهۆكێ راگه‌هاند كو ل ئه‌و گه‌نجێ ل ئه‌لمانيا كچه‌كا ئه‌لمانى كوشتى و ره‌ڤيه كوردستانێ ل دهۆكێ هاته ده‌سته‌سه‌ركرن.
ليوا تارق ئه‌حمه‌د، رێڤه‌به‌رێ پۆليسێن پارێزگه‌ها دهۆكێ بۆ ئه‌ڤرۆ نيوز گۆت: “پشتى حوكمه‌تا ئه‌لمانيا ب رێيا لايه‌نێن په‌يوه‌نديدار په‌يوه‌ندى ب حوكمه‌تا هه‌رێما كوردستانێ، وه‌زاره‌تا ناڤخۆ، كه‌ريم شنگالى كرى، ل سه‌ر هه‌بوونا تاوانه‌كا كوشتنێ كو كوره‌كێ 21 سالى رابوويه ب كوشتنا كچه‌كا ئه‌لمانى يا 14 سالى و پێزانينێن زێده‌تر داينه ده‌ستى”.
زێده‌تر گۆت: “وه‌زاره‌تا ناڤخۆ يا هه‌رێما كوردستانێ په‌يوه‌ندى ب من كريه و ژ لايێ خوه ڤه من ژى سێ ئه‌فسه‌رێن نه‌هێلانا تاوانباران ل زاخۆ ب ڤێ چه‌ندێ راسپاردن و پشتى حه‌فت ده‌مژمێران شيان جهێ تاوانبارى ده‌ستنيشان بكه‌ن ده‌سته‌سه‌ر بكه‌ن و پاشان ژى تاوانبار هاته ده‌سته‌سه‌ركرن”.
دا زانين ژى كو ئه‌وى تاوانبارى دانپێدان كريه كو ئه‌و كچا 14 سالى ل ئه‌لمانيا كوشتيه پشتى كو پێكڤه چووينه گه‌شته‌كێ و شه‌ره‌ده‌ڤ د ناڤبه‌را وان دا دروست بووى و پاشان ژى گه‌فێن ئاگه‌هداركرنێ ژ لايێ پۆليسێن ئه‌لمانيا ڤه لێكريه و كوڕك ژى رابوويه ب كوشتنا وێ”.