ئه‌ڤرۆ جڤاتا پارێزگه‌هێ و په‌رله‌مانتارێن دهۆكێ دێ كۆمبن
هه‌ولێر، قائید میرۆ:
بڕیاره ئه‌ڤرۆ جڤاتا پارێزگه‌ها دهۆكێ و په‌رله‌مانتارێن دهۆكێ لپه‌رله‌مانێ كوردستانێ لدۆر چه‌ندین پرسان كۆمببن و سه‌رۆكێ لیژنا نافخۆژی ل جڤاتا پارێزگه‌ها دهۆكێ ژی دبێژیت، دخوازین پڕۆژێن هشكه‌ڕۆ و ئاڤا ئاكرێ و فڕۆكخانا دهۆكێ بهێنه ته‌مام كرن.
ئیدریس هه‌ركی، سه‌رۆكێ لیژنا نافخۆ ل جڤاتا پارێزگه‌ها دهۆكێ بۆ رۆژناما ئه‌ڤرۆ دیاركر” بڕیاره ئه‌ڤرۆ جڤاتا پارێزگه‌هێ و په‌رله‌مانتارێن دهۆكێ لپه‌رله‌مانێ كوردستانێ لدۆر چه‌ندین پرسێن گرێدایی پارێزگه‌ها دهۆكێ ڤه كۆمببن، چونكه ئه‌م دخوازین ئێكسانیه‌ك هه‌بیت ل به‌لافكرنا پڕۆژه‌یان ل سنورێ پارێزگه‌ها دهۆكێ و چه‌ندین داخوازی مه هه‌نه، كو یا فه‌ره په‌رله‌مانتارێن دهۆكێ پێشكه‌شی وه‌زاره‌تێن په‌یوه‌ندیدار بكه‌ن.
ئیدریس هه‌ركی ئاشكراكر” ئێك ژوان داخوازیێن مه وه‌كی پارێزگه‌ها دهۆكێ هه‌یه ل حوكمه‌تا هه‌رێما كوردستانێ پڕۆژێ ئاڤاكرنا فڕۆكخانا دهۆك یا نێڤده‌وله‌تیه یاكو هاتیه راگرتن و دخوازین بهێته ده‌ستپێكرن، هه‌روه‌سا هژماره‌ك پڕۆژه‌یێن دی یێن گرنگ هه‌نه وه‌كی پڕۆژێ ئاڤا قه‌زا ئاكرێ و پڕۆژێ رۆبارێ هشكه‌ڕۆ پێدڤیه بهێنه بجه ئینان بۆ خزمه‌تكرنا وه‌لاتیێن سنورێ پارێزگه‌ها دهۆكێ، مه دڤێت وه‌ك ئه‌نجوومه‌ن و په‌رله‌مانتارێن دهۆكێ بزاڤێن باش بۆ پێشكه‌شكرنا خزمه‌تگوزاریان بكه‌ین.
