ئه‌ڤرۆ دێ بازرگانیا د ناڤبه‌را دهۆك و مووسل دا ده‌ست پێ كه‌ت
ئه‌ڤرۆ نيوز:
بڕیاره ئه‌ڤرۆ رۆژا 21-2-2018ێ رێیا بازرگانی د ناڤبه‌را دهۆك و مووسل دا بهێته ڤه‌كرن و به‌رپرسه‌كێ پارێزگه‌ها هه‌ولێرێ ژی دیار كر كو هه‌رێما كوردستانێ به‌رهه‌ڤیا خوه بۆ ڤه‌كرنا رێیا د ناڤبه‌را هه‌ولێر و كه‌ركووكێ ژی دا دیاركریه، به‌لێ به‌غدا یا رازینینه، ژ ئالیێ خوه ڤه سه‌رۆكێ ژوورا بازرگانی و پیشه‌سازی ل دهۆكێ ژی گۆت: “سێ هزار و 500 كۆمپانی و بازرگانێن دهۆكێ پتریا وان به‌رهه‌ڤیێن خوه كرینه كو كه‌ره‌ستێن خوه یێن بازرگانی ره‌وانه‌ی بازارێ باژێرێ مووسل بكه‌ن”.
عسمه‌ت ره‌جه‌ب، به‌رپرسێ لقی 14ێ پارتی دیموكراتی كوردستان ل مووسل بۆ رۆژناما ئه‌ڤرۆ دیار كر كو به‌ری دو هه‌یڤان رێیا سه‌ره‌كیا د ناڤبه‌را دهۆك و مووسل دا بتنێ بۆ هاتنوچوونا وه‌لاتیان هاتبوو ڤه‌كرن، له‌وڕا وان سه‌ره‌دانا پارێزگه‌رێ نه‌ینه‌وادا و د كۆمبوونه‌كێ دا پارێزگه‌ری بڕیاردا ئه‌ڤرۆ رۆژا چارشه‌مبی 21-2-2018ێ رێیا سه‌ره‌كیا دناڤبه‌را دهۆك بۆ مووسل دا بۆ بزاڤێن بازرگانی ژی بهێته ڤه‌كرن و گۆت: “بازرگان ژ ئه‌ڤرۆ پێڤه دشێن ده‌ست بكارێن خوه بكه‌ن و كه‌لوپه‌لێن خوه ب هنێرنه باژێرێ مووسل”.
ژ ئالیێ خوه ڤه شێخ ئه‌یاد حه‌سه‌ن، سه‌رۆكێ ژوورا بازرگانی و پیشه‌سازی ل دهۆكێ بۆ رۆژناما ئه‌ڤرۆ دیار كر كو سێ هزار و 500 كۆمپانی و بازرگانێن دهۆكێ پتریا وان به‌رهه‌ڤیێن خوه كرینه كو كه‌ره‌ستێن خوه یێن بازرگانی ره‌وانه‌ی بازارێ باژێرێ مووسل بكه‌ن و گۆت: ” ڤه‌كرنا رێیا دهۆك بۆ مووسل دێ بیته ئه‌گه‌رێ وێ چه‌ندێ ره‌وشا بازرگانی باش بیت و ب ڤه‌كرنا ڤێ رێیێ دێ زێده‌تر ده‌لیڤێن كاری په‌یدابن”.
