ئه‌ڤرۆ روونشتنا ئێكێ يا په‌رله‌مانێ كوردستانێ ژ خولا پێنجێ دێ ب رێڤه چيت
ئەڤرۆ نيوز:
ئەندامەکێ خۆلا نوو یا پەرلەمانێ کوردستانێ بۆ رۆژناما ئەڤرۆ دیار کر کو روونشتنا ئێکێ یا خۆلا نوو یا پەرلەمانێ کوردستانێ ئه‌ڤرۆ رۆژا 6-11-2018ێ ل دەمژمێر 12:00 نیڤرۆ دێ ھێتە ئەنجامدان.
بژار خالد عزێر کۆچەر، ئەندامێ خۆلا نوو یا پەرلەمانێ کوردستانێ ئاشکرا کر کو پشتی جڤاتا دادوەریا ھەرێما کوردستانێ ژڤانێ روونشتنا ئێکێ یا خۆلا پێنجێ یا پەرلەمانێ کوردستانێ دیارکری و د رۆژناما وەقایعا کوردستانێ ژی دا بەلاڤکری ئه‌ڤرۆ روونشتنا ئێکێ یا پەرلەمانێ ناڤھاتی دێ ھێتە ئەنجامدان و گۆت: “بەرنامێ روونشتنا ئێکێ یا پەرلەمانی دێ یێ تایبەت بیت ب سووندخوارنا پەرلەمانتارێن نوو ڤە، چونکی ھەر دەمێ پەرلەمانتاران سووندا قانوونی خوار ڤالاھیا قانوونی ل ھەرێمێ پەیدا نابیت، لێ سەرۆکێ پەرلەمانی و جێگرێ وی د ڤێ روونشتنێ دا ناھێنە ھەلبژارتن، بەلکو ئەڤ پۆستە دێ ل دووڤ رێکەفتنێن سیاسی و کۆ دەنگیێ ھێنە تژیکرن”.
ناڤھاتی ئاماژە دا وێ چەندێ کو راستە پارتی دیموکراتی کوردستان حزبا ئێکێ بوویە د ھەلبژارتنێن پەرلەمانێ کوردستانێ دا، لێ ل دووڤ پێزانینێن وی ھەتا نوکە چو رێککەفتن ل گەل لایەنێن دی ئەنجام نەداینە و رەنگە ل رۆژێن بھێت پارتی دیموکراتی کوردستان سەرەدانا لایەنێن دی یێن سیاسی بکەت و بەحسێ بابەتێ پێکئینانا حوکمەتێ و پۆستێن سیادی بکەت و گۆت: “وەکو نەریتەک ل ھەموو وەلاتان دەمێ پەرلەمان روونشتنا خوە یا ئێکێ ئەنجامدەت ھەتا کو سەرۆکێ پەرلەمانی دھێتە ھەلبژارتن پەرلەمانتارەکێ ژ ھەموو پەرلەمانتارێن دی ب تەمەنتر وێ روونشتنێ ب رێڤەدبەت ژ بەر ڤێ چەندێ رێڤینگ ھرۆری، ئەندامێ خۆلا نوو یا پەرلەمانێ کوردستانێ ل سەر لیستا پارتی دیموکراتی کوردستان دێ ڤێ روونشتنێ ب رێڤەبەت”.
