ناڤێ به‌ربژارێن پارتيێن سياسى بۆ جڤاتا پارێزگه‌ها هه‌له‌بچه
ئه‌ڤرۆ نيوز، عەزیز ھەورامی:
پارتيێن سياسى ل هه‌له‌بچه ل رۆژا 5ى ئيلۆنا 2019ێ ناڤێ به‌ربژارێن خوه بۆ جڤاتا پارێزگه‌ها هه‌له‌بچه راده‌ستى ديوانا پارێزگه‌هێ كرن و رۆژا 10ى ڤێ هه‌يڤێ ناڤ دێ ژ پارێزگه‌ها هه‌له‌بچه هێنه بلندكرن بۆ وه‌زاره‌تا ناڤخۆ و پشتى هووربينيێ ناڤ دێ ژ وه‌زاره‌تێ بۆ جڤاتا وه‌زيران هێنه بلندكرن بۆ ده‌ركرنا فه‌رمانا دامه‌زراندنێ.
ئێكه‌تى نشتيمانى كوردستان شه‌ش كورسى ب به‌ر كه‌فتينه و هه‌ر ئێك ژ عوسمان عەبدوڵڵا و ئەختیار عەزیز و تابان حوسێن و سەیوان محەممەد و نزار حمە خان و شارا عەبدولکەریم به‌ربژار كرينه.
پارتی دیموکراتى كوردستان سێ کورسی ب بەرکەفتينە؛ ھەرئێک ژ ئەردەڵان ئەحمەد و شێنێ ھوشیار و کاروان ئەمین، به‌ربژار كرينه. د هه‌مان ده‌م دا سەرخێل ئەنوەر خەلیفە یونس کاندیدە بۆ رێڤه‌به‌رێ ناحیا بەمۆ.
ئێكگرتوو ئيسلامى كوردستان چار كورسى ب به‌ر كه‌فتينه و ناڤێ وان پێك دهێن ژ، ئەرسەلان عەتا و ھێرۆ محەممەد و ئیدریس محەممەد و یەحیا نەوزاد.
کۆمەلا ئیسلامی سێ کورسی ب به‌ر كه‌فتينه، پێك هاتينه ژ مستەفا تۆفیق مستەفا و ماموستا نەریمان و ڕازان ئەبوبەکر.
بزاڤا ئیسلامی دو به‌ربژار ب به‌ركه‌فتينه، سەلام کەریم عەبدوڵڵا و سەمیرە ئەحمەد حمە عەزیز.
حیزبا سۆسیالیست و حیزبی شوعی ئێك کورسی ب به‌ركه‌فتيه، ئامانج محەممەد ئەمین، به‌ربژار كريه.
كاكه‌يێن هه‌له‌بچه وه‌كو ئاين ئێك كورسى ب به‌ركه‌فتيه و د ناڤ خوه دا، ئاکۆ شاوەیس به‌ربژار كريه.
بزاڤا گۆڕان پێنج كورسى ب به‌ركه‌فتينه، به‌لێ چ ژ ئه‌گه‌رێ كێشێن ناڤخۆ يێن ناڤ وێ بزاڤێ يان ژى به‌رهه‌ڤ نه‌كرنا ناڤێن به‌ربژاران هێشتا به‌ربژارێن وان نه‌هاتينه ئاشكه‌را كرن.
