ئه‌ڤرۆنیوز چێرۆكا پێنج كه‌سێن د روودانا شڤێدى دا گیانێ خوه ژده‌ستداى به‌لاڤ دكه‌ت
ئه‌ڤرۆ نیوز، نه‌وزاد هلۆرى:
پشتى كو شه‌ڤا بورى ژ ئه‌گه‌رێ روودانه‌كا ترافیكێ ل نێزیك ناحیا باعه‌درێ یا سه‌ر ب قه‌زا شێخان پێنج كه‌سان ژ ئێك خێزان گیانێ خوه ژ ده‌ستدای و دو كه‌سێن دن ژى ژ هه‌مان خێزان برینداربووین، تورێن جڤاكى هه‌ژاندن و خه‌لك دلگران بوویه، ئه‌ڤرۆ نیوز چێرۆكا وێ خێزانێ ب ته‌مامى به‌لاڤ دكه‌ت.
روودان چاوان دروست بوویه؟ ئازاد ته‌ها، به‌رپرسێ راگه‌هاندنا رێڤه‌به‌ریا هاتنووچۆنا پارێزگه‌ها دهۆكێ بۆ ئه‌ڤرۆ نیوز دیاركر كو شه‌ڤا بورى ل ده‌مژمێر 11:30ێ ب شه‌ڤ نێزیك ئوڤه‌رپاسا باعه‌درێ روودانه‌كا ترافیكێ روویدایه و تێدا حه‌فت كه‌س بووینه قوربانى و گۆت: (روودان د ناڤبه‌را دو ترومبێلێن ژ جورێ ته‌كسى كوردستان و هیونداى تكسون دروست بوویه، به‌لێ ب مخابنی ڤه پێنج كه‌سان ژ ئێك خێزانێ گیانێ خوه ژ ده‌ستدایه و دو كه‌سێن دى ژى ژ هه‌مان خێزان برینداربووینه).
ئه‌و خێزانه كێ بوون؟ شوكرى محه‌مه‌د سالح حه‌جى برایێ وى كه‌سێ گیانێ خوه ژ ده‌ستدای دیاركر كو شه‌ڤا بورى ژ ئه‌نجامێ روودانه‌كا ترافیكێ د ناڤبه‌را ناحیا باعه‌درێ و دهۆكێ برایێ وى ل گه‌ل چار كه‌سێن دى ژ خێزانا وى گیانێ خوه ژ ده‌ستدایه و دو كه‌سێن دى ژى برینداربوینه و زێده‌تر گۆت: (ئه‌و كه‌سێن گیانێ خوه ژ ده‌ستداین پێكهاتینه ژ باب و هه‌ڤژین و سێ زاروكان بناڤێن (محه‌مه‌د تاهر محه‌مه‌د سالح حه‌جى) ژ دایكبویێ سالا 1973، هه‌ڤژینا وى بناڤێ (سعاد سلێمان محه‌مه‌د) ژ دایكبویا سالا 1985، دیسان (عه‌بدولغه‌نى محه‌مه‌د تاهر) ژ دایكبویێ سالا 2003، (خه‌دیجا محه‌مه‌د تاهر) ژ دایكبویا سالا 2004 و (بینا محه‌مه‌د تاهر) ژ دایكبویا سالا 2017 ، دیسان دو كه‌سێن بریندار ژى بناڤێن (سه‌عه‌د محه‌مه‌د تاهر) ژ دایكبویێ سالا 2016 و (نه‌جیبا محه‌مه‌د تاهر) ژ دایكبویا سالا 2018.
محه‌مه‌د تاهرى چ كار دكر؟ ب گۆره‌ى ئاخفتنێن شوكرى محه‌مه‌د سالح حه‌جى، برایێ وى شوفێرێ ته‌كسیێ بوو و ل ناڤخوه‌یا دهۆكێ و ده‌رڤه‌ی دهوكێ كاردكر و ژبلى وى كارى چو كارێن دى نه‌دكرن، ژیانا وان هه‌موو ئه‌ندامێن خێزانێ ل سه‌ر داهاتیێ كارێ ته‌كسیێ بوو، خێزانه‌كا هه‌ژار بوون و بارێ وان یێ دارایى گه‌له‌ك یێ باش نه‌بوو.
عه‌بدولره‌حیم به‌ربوهارى، د پوسته‌كێ د تۆرا فه‌یسبووكێ دا، دیاركر كو ئه‌و خێزان ده‌مه‌كه ل گوندێ وان دژیت و خێزانه‌كا هه‌ژار بوو و ئه‌وان ب هاریكاریا هژماره‌كا كه‌سێن دى زه‌كات و فتره بۆ وان كومكرینه و دیسان ماله‌كا دینداربویه و هه‌موو پێكڤه گرێدای نڤێژ و مزگه‌فتێ بوون و خێزانه‌كا ب ره‌وشت و ئارام بوون.
ئه‌و خێزان چاوان تووشى روودانا ترافیكێ بوون؟ برایێ شوفێر و سه‌رۆك خێزانا بوویه قوربانى د درێژاهیا ئاخفتنێن خوه‌دا دیاركر ژى كو به‌رى برایێ وى مالا خوه ببه‌ت گوندێ به‌رێ بهار، ل نێزیك زاویته ئه‌و ل گوندێ گوندك ل نێزیك دینارته دژیا و زێده‌تر گۆت: (كه‌سوكارێن برایێ من هه‌موو ل گوندێ گوندك و سنوورێ ناحیا دینارتێ نه، ئه‌ڤه ده‌مه‌كێ زور نینه برایێ من چوویه گوندێ به‌رێ بهار ول وێرێ دژیت، دوهى ب مه‌ره‌ما پیرۆزكرنا جه‌ژنێ ئه‌و ل گه‌ل خێزان و هه‌موو زاروكێن خوه ده‌رگه‌هێ مالا خوه دگرن و قه‌ستا ده‌ف مه دكه‌ن داكو پشكداریێ د جه‌ژنێ دا بكه‌ن، ده‌مێ هاتى مه هه‌موویان ده‌مه‌كێ خوه‌ش پێكڤه بوراند و جه‌ژنه‌كا خوه‌ش ئه‌نجامدا، پشتى بوویه شه‌ڤ برایێ من و خێزان و زاروكێن وى خواست جاره‌كا دى بزڤرن مال، پشتى كێمتر ژ ده‌مژمێره‌كێ ده‌نگوباس گه‌هشته مه كو ئه‌و یێن تووشى روودانه‌كا ترافیكێ بووین، ب مخابنی ڤه روودانه‌كا گه‌له‌كا دل ئێش و ناخ هه‌ژین بوو، ئه‌م هه‌موو تووشى حێبه‌تیێ كرین و روودانه‌كا جه‌رگ بربوو كو ئه‌و ژى خێزانه‌ك ب ته‌مامى بوویه قوربانێ روودانا ترافیكێ، هه‌ر چه‌نده هه‌تا نوكه مه پێزانین نینن كا روودان چاوان دروست بوویه، به‌لێ دلگرانین ب ڤێ روودانێ و خودێ سه‌بر و ئارامیێ بده‌ت مه).
ره‌وشا برینداران چاوایه؟ شوكرى دیاركر ژى كو نوكه ره‌وشا هه‌ردو برینداران گه‌له‌ك یا خراپه و دبێژیت: (هه‌تا نوكه هه‌ردو بریندار ل بن چاڤدێریا چر یا نوشدارى نه و ره‌وشا وان یا جێگیر نینه ب تایبه‌تى یا سه‌عه‌دى، هه‌تا نوكه هه‌ردو بریندار نوزانن كو دایك و باب و خوشك و برایێن وان گیانێ خوه ژ ده‌ستدایه).
ب گوره‌ى داتایێن رێڤه‌به‌ریا هاتنووچۆنا پارێزگه‌ها دهۆكێ د سێ روژێن جه‌ژنا ره‌مه‌زانێ دا، پێنج روودانێن هاتنوچۆنێ ل سنوورێ پارێزگه‌ها دهۆك رووداینه، د ئه‌نجام دا پێنج كه‌سان گیانێ خوه ژ ده‌ستدایه و 12 ژى بریندار بوینه.