ئه‌ڤرۆ هه‌شت پرتووكێن نڤیسه‌رێ خودێ ژێ رازی (اسماعیل تاهر جانگیر) دێ هێنه به‌لاڤكرن
دهۆك، شاكر ئه‌تروشی:
ب پشته‌ڤانیا سه‌رۆكاتیا هه‌رێما كوردستانێ، و ل بن درۆشمێ ( دهۆك اسماعیل تاهری ژبیرناكه‌ت) رێڤه‌به‌ریا گشتی یا ره‌وشه‌نبیری و هونه‌ری ل پارێزگه‌ها دهۆكێ، ب هه‌ڤكاری ل گه‌ل زانكۆیا نه‌ورۆز و رێكخراوا مه‌ند بۆ یه‌كسانیێ، ئه‌ڤرۆ 25/1 ل ده‌مژمێر یازده‌ی سپێدێ دێ روونشته‌كا تایبه‌ت بۆ به‌لاڤكرنا هه‌شت پرتووكێن رۆژنامه‌ڤان و نڤیسه‌رێ خودێ ژێ رازی (اسماعیل تاهر جانگیر) ی ل هولا زانكۆیا ناڤبری سازكه‌ت.
حه‌سه‌ن فه‌تاح، په‌یڤدارێ رێڤه‌به‌ریا گشتی یا ره‌وشه‌نبیری و هونه‌ری ل پارێزگه‌ها دهۆكێ، ل دۆر وێ روونشتنێ بۆ رۆژناما ئه‌ڤرۆ گۆت: ئه‌ڤ چالاكیه ب پشته‌ڤانیا سه‌رۆكاتیا هه‌رێما كوردستانێ دێ هێته ئه‌نجامدان و ل پێش ده‌م به‌رهه‌ڤیه‌كا باش بۆ هاتیه كرن و به‌رنامه بۆ هاتیه دانان، ئه‌و ژی پێشكێشكرنا چه‌ند بڕگه و په‌نه‌لانه، ل گه‌ل به‌لاڤكرنا هه‌ر هه‌شت پرتووكان دێ به‌حسی هژماره‌كا بیاڤێن كارگێڕی، جڤاكی، ره‌وشه‌نبیری، رۆژنامه‌ڤانی هێته كرن كو خودێ ژێ رازی ئیسماعیل تاهری خزمه‌ت تێدا كریه و ئه‌ڤا ئه‌ڤرۆ دهێته ئه‌نجامدان ئه‌ركه‌كێ بچووكه به‌رامبه‌ر وێ خزمه‌تا مه‌زنا كاك ئیسماعیلی بۆ باژێرێ دهۆكێ دوارێ جودا دا پێشكێشكری و مه هه‌موویان دیت ل ده‌مێ وه‌غه‌ركرنا وی خه‌لكێ دهۆكێ هه‌موو پێ ئێشان و هه‌ڤخه‌میا خوه بۆ مالباتا وی دیاركرن، له‌ورا مه درۆشمێ ڤێ روونشتنێ كره (دهۆك اسماعیل تاهری ژبیرناكه‌ت) و هیڤیا من ئه‌و ل سالڤه‌گه‌ڕا وه‌غه‌كرنا وی ئه‌م بشیێن بزاڤه‌كا مه‌زنتر و به‌رفره‌هتر كو ژ هه‌ژی خزمه‌تا وی بیت بۆ بكه‌ین و دبێژینه خێزان و زارۆیێن وی ئیسماعیل نه‌به‌س ژ هه‌وه چوو، به‌لكو ژ هه‌موو خه‌لكێ دهۆكێ چوو، ب تایبه‌ت ژی ته‌خا نڤیسه‌ر و رۆژنامه‌ڤان و ره‌وشه‌نبیران.
