ئه‌ڤ ساله ل سنوورێ قه‌زا ئاكرێ 17 هزار دارێن به‌رهه‌مدار هاتینه چاندن
ئه‌ڤرۆ نیوز ، نه‌وزاد هلۆرى:
پشتى كو قه‌یرانا دارایى درۆست بووى ، وه‌لاتى و جوتیاران ب ره‌نگه‌كێ به‌رفره‌ه ده‌ست ب چاندنا دار و بارێ به‌رهه‌مدار كریه ، و بتنێ ل سنوورێ قه‌زا ئاكرێ هه‌تا نها 17 هزار شتلێن داروبارێ به‌رهه‌مدار هاتینه چاندن ، و دخوازن كو حوكمه‌ت هاریكاریا وان بكه‌ت ب تایبه‌تى د ڤه‌كرنا بازاره‌كێ بو فروتنا به‌رهه‌مێن وان.
نه‌شوان عومه‌ر خودانێ ئێك ژ مشته‌لێن فروتنا شتلێن داروبارێ فێقى ل سنوورێ ناحیا دینارته بو ئه‌ڤرۆ نیوز گۆت: ( پشتى كو قه‌یرانا دارایى درۆست بوى و موچه گیروبوین ، مه ده‌ست ب فروتنا شتلێن داروبارى كرن و ئه‌ڤه زێده‌بارى كو ئه‌م ژى وه‌كو جوتیار دچینین، و ئه‌ڤ ساله رێژه‌یه‌كا زور یا شتلێن داروبارێ به‌رهه‌مدار مه چاندینه و فروتنیه)
زێده‌تر گۆت: (مه زێده‌ترى 10 جورێن شتلێن داروبارێن مینا سێڤ ، هژیر ، هنار، مژمژه، حلیك و گویز و چه‌ند جورێن دن هه‌نه و بهایێ وان بگوره‌ى شتلا دارێ دهێته گوهرین به‌لێ ب شێوه‌یه‌كێ گشتى دناڤبه‌را دوو هزار بو 10 هزار دیناران دهێته فروتن)
بێدار له‌زگین ئه‌و ژى ئێكه ژ جوتیار و وه‌لاتیێن دینارتێ و رێژه‌یه‌كا باش یا شتلێن داروبارى چاندینه بو ئه‌ڤرۆ نیوز گۆت: (پرانیا ئه‌و شتلێن كو ئه‌م دچینین شتلێن دارا گویزێ نه ژ جورێ ئوستورالى و دانیماركى كو پشتى چاندنێ ب ساله‌كێ یان دوو سالان دهێنه به‌رى و داره‌كا به‌ژن كورته و گویز ب شێوه‌یێ وشیێن ترى پێڤه دهێن)
ئه‌حمه‌د جه‌میل ئه‌بو زێد رێڤه‌به‌رێ چاندنا ئاكرێ بو ئه‌ڤرۆ نیوز گۆت : (وه‌كو هه‌موو سالان ئه‌ڤ ساله ژى رێژه‌یه‌كا زور یا شتلێن داروبارى ل سنوورێ قه‌زا ئاكرێ ب تایبه‌تى ناحیین دینارته و گرده‌سێن و بجیڵ هاتینه چاندن و هه‌تا نها زێده‌ترى 17 هزار شتلێن داروبارێ فێقى و به‌رهه‌مدار هاتینه چاندن و پروسه ژى یا به‌رده‌وامه)
زێده‌تر گۆت: (ل سنوورێ قه‌زا ئاكرێ هه‌موو جورێن داروبارێ به‌رهه‌مدار دهێته چاندن ب تایبه‌تى سێڤ و هنار و گویز و هژیر و حلیك و هرمى و چه‌ند جوره‌كێن دن و رووبه‌رێ گشتیێ هاتیه ته‌رخانكرن بو داروبارێ به‌رهه‌مدار ل سنوورێ قه‌زا ئاكرى َگه‌هشته 96 هزار دونه‌مێن عه‌ردى كو ئه‌ڤ یه‌ك ژى رێژه‌یه‌ك باشه و تێرا ده‌ڤه‌رێ و چه‌ند ده‌ڤه‌رێن دن ژى هه‌یه ، به‌لێ نه‌بوونا بازارى وه‌كو پێدڤى بو فروتنا به‌رهه‌مێ، جوتیاران ، كێشه‌یێن زور بو جوتیاران درۆست بوینه و زیانێ، زور ژى ب وان كه‌فتینه ، به‌لێ ئه‌گه‌ر حوكمه‌ت بازاران بو جوتیاران ڤه‌كه‌ت دێ زێده‌تر هێنه چاندن و داهاته‌كێ باش بو جوتیاران زڤریت)
رێڤه‌به‌رێ چاندنا ئاكرێ دده‌تن دیاركرن ژى كو ئه‌ڤ ساله دهێته پێشبینیكرن رێژه‌یه‌كا زور یا فێقى ل سنوورێ قه‌زا ئاكرێ بهێته به‌رهه‌مئینان و گۆت ژى: (ڤه‌كرنا ده‌رگه‌ه و رێیا دناڤبه‌را موسل و دهۆك دێ ده‌رگه‌هى به‌رامبه‌ر فروتنا به‌رهه‌مێن جوتیارێن ئاكرێ ڤه‌كه‌ت و تا راده‌یه‌كێ باش ژى دێ ئاریشه‌یێن وان چاره‌سه‌ركه‌ت)
