ژ ئه‌گه‌رێ روودانان زێده‌ترى 80 كه‌سان بووينه قوربانى
ئه‌ڤرۆ نيوز، نيوار محه‌مه‌د سه‌ليم:
د كۆنگره‌كێ رۆژنامه‌ڤانى دا، ئه‌ڤرۆ رۆژا دوشه‌مبى رێكه‌فتى 28ى كانوونا دويێ يا 2015ێ رێڤه‌به‌ريا به‌ره‌ڤانيا باژێرى ئامارا روودانێن 2015ێ راگه‌هاند كو ئه‌ڤه 10 ساله رێژا روودانان ب ڤى ره‌نگى زێده نه‌بوويه.
رائيدێ مافپه‌روه‌ر بێوار عه‌بدولعه‌زيز، به‌رپرسێ راگه‌هاندنێ ل رێڤه‌به‌ريا به‌ره‌ڤانيا باژێرى ل پارێزگه‌ها دهۆكێ گۆت: “ئه‌ڤ ساله سێ هزار و 94 روودان هاتينه تۆماركرن”.
زێده‌تر گۆت: “82 كه‌س د ڤان روودانان دا بووينه قوربان و 36 كه‌سان گيانێ خوه ژ ده‌ست دايه؛ 25 خه‌ندقينه و 11 كه‌س ژى سوتينه و 46 ژى بريندار بووينه”.
رائيدێ مافپه‌روه‌ر دا زانين ژى كو ژ ئه‌نجامێ ڤان روودانێن ل سالا 2015ێ رووداين، زيانێن مادى ب كۆژمێ شه‌ش مليار و 900 مليۆن ديناران هاتينه خه‌ملاندن “55 هزار دۆنه‌مێن ئه‌ردى ژى ژ ئه‌گه‌رێ بۆردۆناما فرۆكێن توركيا هاتينه سۆتن”.
به‌رپرسێ راگه‌هاندنێ ل رێڤه‌به‌ريا به‌ره‌ڤانيا باژێرى ل پارێزگه‌ها دهۆكێ ل دۆر خولێن هوشياريێ ژى ئاشكه‌را كر كو 79 خۆل هاتينه ڤه‌كرن كو تێدا دو هزار و 530 كه‌سان پشكدارى تێدا كريه.
ل دووماهيێ ژى بێوار عه‌بدولعه‌زيز گۆت: “د ماوێ 10 سالێن بۆرى دا ئه‌ڤ رێژا روودانێن زێده ل پارێزگه‌ها دهۆكێ نه‌هاتينه تۆماركرن”.
