ئه‌ڤ گوهۆڕينه د خشتێ مووچێ فه‌رمانبه‌ران دا هاته كرن
ئه‌ڤرۆ نيوز:
ب گۆره‌ى وان پێزانينێن ژ ژێده‌ره‌كى ل ناڤ جڤاتا وه‌زيرێن هه‌رێمێ هاتيه به‌لاڤكرن، خشتێ نوو يێ مووچێ فه‌رمانبه‌ران بۆ هه‌يڤا شوباتێ گوهۆڕين تێدا هاتينه كرن و ژ وان گوهۆڕينان ژى مووچێ ل خوار 300 هزار ديناران، مووچێن وان ناهێته پاشكه‌فت كرن.
هه‌ر ب گۆره‌ى وان پێزانينان يێن تۆڕا ده‌نگوباسێن سلێمانيێ به‌لاڤكرين ژبلى ڤێ گوهۆڕينێ هێشتا چو گوهۆڕينێن دى تێدا نه‌هاتينه كرن.
ب گۆره‌ى پێزانينێن ژ وه‌زاره‌تا دارايى و ئابوورى يا حوكمه‌تا هه‌رێما كوردستانێ ب ده‌ست هه‌مان ژێده‌ر كه‌فتين، فه‌رمان هاتيه كرن ب زووترين ده‌م ليستێ مووچه‌ى ب گۆره‌ى وان گوهۆڕينان بهێته رێكخستن دا كو مووچێ هه‌يڤا شوباتێ پاش نه‌كه‌ڤيت.
خشتێ نوويێ مووچه‌ى ب گۆره‌ى سيسته‌مى پاشكه‌فت بۆ كانوونا دويێ هاته بجهئينان ژ 100 هزار دينار بۆ 200 هزار دينار ب رێژا 15% هاتبوونه پاشكه‌فت كرن و ژ 200 بۆ 300 هزار ديناران ب رێژا 20% هاتبوو پاشكه‌فت كرن، به‌لێ د هه‌يڤا شوباتێ دا ئه‌و دو رێژه هاتينه لادان.
ژێده‌رێ ژ جڤاتا وه‌زيران به‌حس ل گوهۆڕينێن ب سه‌ر ليستا مووچه‌ى دا هاتين كرى، ئاماژه ب وێ چه‌ندێ كريه كو ئه‌ڤێ چه‌ندێ كارتێكرن ل سه‌ر رێژا پاشكه‌فتكرنا مووچان نه‌كريه ئانكو ئه‌ڤێن 300 بۆ 400 هزار ديناران وه‌ردگرن دێ 25% ژ مووچێ وان هێته پاشكه‌فتكرن.
