ئه‌گه‌رێن نه‌هنارتنا بودجا هه‌رێمێ ب دروستى ژ زار ده‌ڤێ نێچيرڤان بارزانى
ئه‌ڤرۆ نيوز:
سپێده‌يا ئه‌ڤرۆ رۆژا پێنجشه‌مبى رێكه‌فتى 14ى گۆلانا 2015ێ شانده‌كێ حوكمه‌تا هه‌رێما كوردستانێ سه‌ره‌دانا په‌رله‌مانێ كوردستانێ كر و ل وێرێ ل گه‌ل سه‌رۆكاتيا په‌رله‌مانى و فراكسيۆن و لژنا قانوونى و ژێده‌رێن سرۆشتى و وزه و په‌ترۆلێ كۆمبوون.
سه‌رۆكێ حوكمه‌تا هه‌رێما كوردستانێ د سه‌ره‌دانا خوه دا بۆ په‌رله‌مانێ كوردستانێ و د ناڤ هۆلا په‌رله‌مانى دا گۆت: “به‌غدا پابه‌ندى رێكه‌فتنا هه‌ولێر و به‌غدا نه‌بوويه”.
نێچيرڤان بارزانى، سه‌رۆكێ حوكمه‌تا هه‌رێما كوردستانێ زێده‌تر گۆت: “مه ئه‌و په‌ترۆلا پێدڤى ب گۆره‌يى رێكه‌فتنێ ره‌وانه كريه، به‌لێ به‌غدا پارێ ته‌مام نه‌هنارتيه”.
بارزانى دا زانين كو هێجه‌تا به‌غدا بۆ ئه‌وان ئه‌و بوويه كو پارێ به‌نكا بازرگانى ب كارئينايه، له‌ورا پشكا بودجا هه‌رێما كوردستانێ كێم بوويه، ئه‌ڤه دده‌مه‌كى دايه ب گۆره‌يى قانوونێ ئه‌و كاره هاتيه كرن و دبێژيت: “ل ده‌سپێكێ ب هيڤى بوون 50% ژ پارێ په‌ترۆلێ بۆ مه ب هنێرن، به‌لێ وه‌زيرێ په‌ترۆلا عيراقێ كێم كريه و كريه 10%ێ”.
ل 6ى گۆلانا ئه‌ڤ ساله، حوكمه‌تا عيراقێ بڕيار دا 543 مليار ديناران وه‌كو پشكا هه‌رێما كوردستانێ ژ بودجێ بۆ هه‌يڤا سێ ره‌وانه بكه‌ت، ئه‌ڤێ چه‌ندێ ژى حوكمه‌تا هه‌رێمێ گه‌له‌ك دلگران كر كو ئه‌وان پێشبينى دكر دووقاتى ڤى پاره‌يى پشكا هه‌رێمێ ب هنێرن ب گۆره‌يى رێكه‌فتنا د ناڤبه‌را هه‌رێم و به‌غدا دا، به‌لێ ل رێكه‌فتى 11ى گۆلانێ ئه‌ڤ كۆژمه ژى كێم كر و ب تنێ 488 مليار ره‌وانه كرن، ئه‌ڤ چه‌نده ژى بوويه ئه‌گه‌رێ وێ ئێكێ كو بۆ ماوێ چه‌ندێن رۆژايه حوكمه‌تا هه‌رێمێ ل گه‌ل لايه‌نێن شۆله‌ژێ كار ژ بوو چاره‌كرنا ڤێ كێشێ دكه‌ت.
