ئوردن ل شوینا تورکیا دێ بیتە بنگەھێ لەشکریێ ئەمریکی دژی داعشێ
ئه‌ڤرۆ نيوز:
ھژمارەکا شارەزایێن لەشکری ئاماژێ ددەن کو ئەمریکا و ھەڤپەیمانیا نێڤدەولەتی دژی داعشی، ئێدی پشت بەستنەکا مەزن ل سەر بنکەھێ ئەنجرلیک یێ تورکی ناکەن و پێدڤیە ئەمریکا و ھەڤپەیمانێن وێ ھزر د ڤەگۆھاستنا کەلوپەلێن خوە یێن لەشکری ژ وی بنگەھی بکەن و ل شوونگرەکێ دی بگەرن کو یێ گونجای بیت ژلایێ ھەرێمایەتی ڤە بۆ شەڕێ ژی رێکخستیێن تیرۆرستی.
چاڤدیر و شارەزایێن لەشکری، ل دووڤ راپۆرتەکا سایتێ ئەلخەلیج ئۆنلاین، خوەیادکەن کو ژ بەر چوونا چەکدارێن داعشێ بۆ نێزیک سنۆرێ ئوردن – سووریا – عیراق، ب پێدڤی دھێتە دیتن بنگەھێ (ئەزرەق) یێ ئوردنی بھێتە بکارئینان کو نوکە تنێ دو کۆمێن فرۆکێن F16 یێن ئوردنی و 20 فرۆکێن شەڕکەر یێن وەلاتێن ھەڤپەیمان وەکو بەلجیکا و فرەنسا، زێدەبارێ فرۆکێن ئەمریکی یێن بێ فرۆکەڤان.
شرۆڤەکارێ ئوردنی، سەعید شەرۆف بۆ سایتی ناڤبری دبێژیت، ئوردن یا بوویە جھێ باوەریا ئەمریکا و ھەڤپەیمانان و بوویە جھەکێ گونجای بۆ دانانا بنگەھێن لەشکری ل شوونا بنگەھێ ل وەلاتێن نێزیک ھەین، ب تایبەتی تورکیا.
ب دیتنا نڤیسەر و شرۆڤەکارێ سیاسیێ ئوردنی محەمەد ئەبو رومان، ل گەل دەستپێکا ھاتنا سەرۆکێ ئەمریکی ترامپی بۆ دەستھەلاتێ، ھەلویستێ لەشکری یێ ئەمریکی یێ گوھۆڕینان ب خوە ڤە دبینیت و بەلگە ل سەر ڤێ چەندێ ژی ئەوە ئەمریکا چو گرنگی و پیتەپێدان نەدا ھوشداریێن تورکیا ل دۆر ھاریکاریا کوردێن سووریێ و بەردەوامبوو ل سەر پرچەککرنا وان ب مەرەما شەڕێ رێکخستیا داعشێ.
شارەزایێ لەشکری یێ ئوردنی، مەحموود ردیسات، دبێژیت، ڤەگوھاستنا کاری ژبنگەھێ ئەنجرلیک بۆ بنگەھێ ئەزرەق یێ ئوردنی، یێ ب ساناھی نابیت و دەم بۆ دڤێت ژ بەر کو پێدڤی ب ڤەگۆھاستنا کەلوپەلێن لەشکری یێن گرانە زێدەباری کەلوپەلێن سەخبێریکرنێ و ئەڤە ژی رامانا وێ ئەوە دێ ھێرشێن ئەسمانی یێن ھەڤپەیمانان د دەمێ وی کاری دا ھێنە کێمکرن.
ل دۆر دووریا بنگەھێ ئەزرەق یێ ئوردنی و ھەبوونا چەکدارێن داعشێ د ناڤ ئاخا سووریێ دا، ردیسات دبێژیت، دووریا بنگەھی ناڤبری ژ چەکدارێن داعشی ل سووریێ 700 کیلۆمەترن کو ئەڤ چەندە پێدڤی دکەت سوتەمەنی بۆ فرۆکان ل ئەسکانی بھێتە دابینکرن، د دەمەکی دا بنگەھێ ئەنجرلیک یێ تورکی تنێ 400 کیلۆمەتران ژ رەققە یا دوورە.
