ئوروپا ل رێیەکا نوو بۆ چارەکرنا قەیرانا پەنابەران دگەریت
ئەڤرۆ نیوز:
ل گۆر راپۆرتەکا ئاژانسا فرانس پرێس پشتی شەرێ ل سووریێ، عیراقێ و لیبیا و گەلەک دەڤەرێن دی یێن جیھانێ خەلک ب رێژەکا بەرچاڤ ل وەلاتێن خوە درەڤن و بەرێ خوە دەنە ئوروپا، سەرەرای پێرابوونێن توند ل دژی ھاتنە پەنابەران دیسان ژی رۆژانە ب ھزاران پەنابەر خوە دگەھیننە ئوروپا و وێ یەکێ ژی ئالۆزیەکا نوو بۆ وەلاتێن ئوروپا دروست کریە، بەری نھا چەندین جاران ژی گرۆپێن ھشکباوەر ل ئەمریکا و فرەنسا ھێرشی کەمپێن پەنابەران کرن و داخواز ژ حکومەتێن وەلاتێن خوە ژی کرن کو ئێدی رێ نەدەن پەنابەر بھێنە وەلاتێ وان و نابیت حکومەت مافێ پەنابەریێ بدەتە چو کەسەکی.
ل گۆر راپرسێن کو چەندین دەزگەھێن ئوروپی ل وەلاتێن جودا جودا یێن ئوروپا دروست کرینە پرانیا خەلکێ ئوروپا دژی ھاتنا خەلکێ بیانی نە و ناخوازن ئێدی وەک جاران حوکمەت مافێ پەنابەریێ بدەتە خەلکێن رۆژھەلاتا ناڤین. ب تایبەتی ژی پشتی چالاکیێن تیرۆرستی یێن وەک شارلی ئیبدو نێرینا خەلکێ ئوروپا ل ھەمبەر پەنابەرێن بیانی ب تایبەتی ژی موسولمانان ب رەنگەکێ خراب ھاتیە گوھۆرین و نھا وەلاتێن ئوروپا ب تایبەتی ژی بریتانیا، فرەنسا و ئەلمانیا ل رێیەکا نوو دگەرن دا بشێن پرسا ھاتنا پەنابەران چارە کەن.
ل ئالیێ دی پارتێن توندرەو ل ئوروپا ژی ل دژی ھاتنا پەنابەران دەست ب چالاکیێن جودا جودا کرینە و وێ یەکێ ژی کاریگەریا خوە ل سەر دەستھەلاتا سیاسی کریە و ژ بەر ھندێ ژی دھێتە چاڤەرێکرن کو چەندین وەلاتێن ئوروپی دەست ب پێرابوونێن توند ل دژی ھاتنا پەنابەران بکەن و مافێ پەنابەریێ ژی وەک بەرێ ب ساناھی نەدەنە ھەر کەسەکێ کو دچنە ئوروپا و ئەو یەک ژی دێ کاریگەریەکا گەلەک خراب ل سەر وان کەسان کەت کو نھا ل کەمپێن جودا جودا ل ئوروپا ئاکنجی بووینە و چاڤەرێ دکەن کو مافێ پەنابەریێ بۆ وان بھێتە دان.
