ئيرانێ جاره‌كا دى ده‌ست ب مه‌هاندنا چه‌كێ ئه‌تۆمى كر
ئه‌ڤرۆ نيوز، فاتما مزوورى:
ئیرانێ راگه‌هاند كو وان جاره‌كا دى ناڤه‌ندا ئەتۆمی یا ئه‌سفه‌هانێ ئه‌كتيڤ كریه و ئەو دێ ده‌ست ب مه‌هاندنا يورانیۆمێ بۆ به‌رنامێ خوه یێ ئەتۆمی بكه‌ن.
ئاژانسا ئێنرجیا ئەتۆمی یا ئیرانێ راگه‌هاند كو وان دووباره ده‌ست ب به‌رهه‌مئینانا يورانیۆما مه‌یدانی ل ناڤه‌ندا ئەتۆمی یا ئه‌سفه‌هانێ كریه كو پشكه‌كا مه‌زن ژ يورانیۆمێ ژ بۆ به‌رنامێ ئەتۆمی يێ وی وه‌لاتی په‌یدا دكه‌ت.
ئاژانسا ئێنرجیا ئەتۆمی یا ئیرانێ دیار كریه كو ئیران يا پابه‌ندە ب رێكه‌فتنا ئەتۆمی یا كو د سالا 2015ێ دا ب وه‌لاتيێن گروپێ 5+1 ئیمزا كريه كو د ڤى ده‌مێ دووماهيێ دا ئه‌مريكا خوه ژ وێ رێكه‌فتنێ ڤه‌كێشايه.
هه‌مان ئاژانسێ هه‌روه‌سا دایه خویاكرن كو ئه‌كتیڤكرنا ناڤه‌ندا يورانیۆمێ ل باژێرێ ئه‌سفه‌هانێ ژ بۆ زێده‌كرنا شیانێن ئیرانێ د وارێ مه‌یاندنا يورانیۆمێ دایه.
وێ ئاژانسێ ئاشكه‌را ژی كریه كو ئەڤ پێنگاڤه پشكه‌كه ژ بجهئينانا بڕیارا رێبه‌رێ كۆمارا ئیسلامیا ئیرانێ عە‌لی خامنه‌يی كو داخوازا ئه‌كتیڤكرنا چالاكیێن ئەتۆمی یێن وی وه‌لاتی كربوو.
د 6ێ گولانا ئه‌ڤ ساله ب بڕیارا سه‌رۆكێ ئامه‌ریكا، دۆنالد ترومپ، ئامه‌ریكا ب فه‌رمی ژ رێكه‌فتنا ئەتۆمی یا ل گه‌ل ئیرانێ ڤه‌كشیا و د پشت دا چه‌ند سزايێن دى ل سه‌ر ئيرانێ سه‌پاندن.
پشتی ڤه‌كێشانا ئه‌مریكا ژ رێكه‌فتنا ئەتۆمی، رێبه‌رێ ئیرانێ، عە‌لی خامه‌نێی د گۆتاره‌كێ دا ره‌خنێن توند ل هه‌لوێستێ ئه‌مریكا گرتبوو.