ئيران بزاڤا لادانا سيستانى دكه‌ت
ئه‌ڤرۆنيۆز:
ئاژانسا رويته‌رز راپۆرته‌ك ل دۆر سه‌ره‌دانا مه‌حمود هاشمى شه‌هرۆردى كو ئێك ژ مه‌رجه‌عێن شيعانه بۆ نه‌جه‌فێ به‌لاڤكر وتێدا ئاماژێ دده‌ت كو ئيران يا بزاڤان دكه‌ت ل شوونا عه‌لى سيستانى مه‌رجه‌عێ بلند يێ شيعان ب دامه‌زرينيت.
ل دووڤ وێ ئاژانسێ، شه‌هرۆردى يێ ل نه‌جه‌ف وئيران يا بزاڤێن بلندكرنا ئاستێ جه‌ماوه‌ريێ وى دكه‌ت ل سه‌ر كيستێ سيستانى بۆ وێ چه‌ندێ وه‌كو مه‌رجه‌عێ نوو يێ شيعان ل سه‌ر عيراقيان ب سه‌پينيت.
دياركر ژى، شه‌هرۆردى يێ 69 سالى چه‌ندين رۆژ ژسه‌ره‌دانا خوه ل گه‌ل به‌رپرسێن جڤاكى وكه‌سايه‌تيێن ئايينى ل ئۆفيسا خوه ل نێزيك مه‌زارێ عه‌لى كۆرێ ئه‌بو تالبى بۆراندينه و ژزارده‌ڤێ هنده‌ك ژبه‌رپرسێن په‌يوه‌نديدارێن عيراقى ڤه‌گوهاستيه كو شه‌هرۆردى ب مه‌ره‌ما جهگرتنا سيستانى (87 سال) ده‌ست ب لڤينان كريه. دده‌مه‌كى دا ئيران بزاڤێن مه‌زن دكه‌ت بۆ ب هێزكرنا جهێ خوه ل ( حه‌وزا علمى) ل نه‌جه‌ف ئه‌وا دهێته هژمارتن پيرۆزترين ده‌ڤه‌را شيعان ل جيهانێ. سه‌ره‌راى وێ چه‌ندێ ئيران دبينيت كو چاره‌نڤيسێ سياسيێ عيراقێ ل نه‌جه‌ف بريارا ل سه‌ر دهێته دان.