ئۆسمان بایدەمیر: کۆبانێ بناغەکا ب ھێز بۆ ئێکەتیا کوردان دروست کریە
ئەڤرۆ نیوز:
د دیدارەکێ دا بۆ رۆژناما ئەڤرۆ کو سەرجان مەحمود بەرھەڤکریە، سەرۆکێ بەرێ یێ باژێرڤانیا ئامەدێ و سیاسەتمەدارێ ناڤدارێ باکورێ کوردستانێ دیار دکەت کو کۆبانێ نموونا ھەری بەرچاڤ یا ئێکەتیا کوردانە و ئەزموونا کوبانێ نیشا دا دەمێ کورد ئێکگرتی بن چو ھێزەک نەشێت وان ژناڤ ببەت و ئەڤرۆکە نێرینا جیھانێ ل ھەمبەر کوردان ھاتیە گوھۆرین و کورد پتر ژ ھەر دەمەکێ ب ھێزن و دڤێت ھێزێن سیاسی یێن کورد ژی د زووترین دەم کۆنگرێ نەتەوی بگێرن و سەرکەڤتنا گەلێ کورد ژی دێ وەسا ھێتە مسوگەر کرن.
ئۆسمان بایدەمیر سەرۆک بەرێ یێ باژێرڤانیا مەزن یا ئامەدێ و سیاسەتمەدارێ ناڤدارێ کورد د دیدارەکا تایبەت دا بۆ رۆژناما ئەڤرۆ دیار کر کو ھێزێن کوردی شیان د شەرێ داعشێ دا سەرکەڤتنێن مەزن تۆمار بکەن، کوردان شیا ل ھەمبەر مەزنترین رێکخراوا تیرۆری یا جیھانێ شەری بکەن و وان لاواز بکەن و ژ بەر ڤێ یەکێ ژی ئەڤرۆکە ل ھەموو جیھانێ کورد وەک قارەمانێن ئازادیێ دھێنە دیتن و ژ بەر ڤێ یەکێ ژی وەلاتێن جیھانێ بەرھەڤن ھاریکاریا کوردان بکەن و گۆت: “چوونا پێشمەرگەی بۆ کۆبانێ و گەھاندنا چەکی بۆ شەرڤانێن کورد ب رێیا فرۆکێن ئەمریکا براستی ژی روودانێن دیرۆکی نە و دڤێت ئەم ژبیر نەکەین و ئەو یەک ژی نیشا ددەت کو ئەڤرۆکە جیھان ھزرەکا مەزن بۆ کوردان دکەت و دەلیڤەکا مەزن ژی بۆ کوردان ھاتیە پێش و ژ بەر ڤێ یەکێ ژی دڤێت ھێزێن سیاسی یێن کوردی د زووترین دەم دا کۆنگرێ نەتەوی دروست بکەن و پێکڤە ل سەر ستراتیژیەکا نەتەوی کار بکەن”.
ئۆسمان بایدەمیر د بەردەوامیا ئاخڤتنا خوە دا ئەو یەک ژی دیار کر کو ئەم ھەر دەم دبێژین دەمێ کورد ببنە ئێک کەس نەشێت وان ژناڤ ببەت، نموونا شەرێ ل کۆبانێ و پێکڤە شەرکرنا پێشمەرگە و شەرڤانان ل دژی تیرۆرستان ئەو راستی جارەکا دی نیشا مە دا و ژ بەر ڤێ یەکێ ژی دڤێت ئەزموونا کۆبانێ ببیتە دەستپێکا قۆناغەکا نوو و فەرە ھەموو ھێزێن کوردی ئێدی دەست ب لاپەرەکا نوو بکەن و دژبەریا ھەڤدو نەکەن و پێکڤە کار بکەن، چونکو دۆژمنێن کوردان جارەکا دی پێکڤە شەرێ کوردان کر دا کوردان ژناڤ ببەن و دەمێ دۆژمنێن مە وەسا پێکڤە دژی مە کار دکەن دڤێت ئەم ژی د ناڤا خوە دا ئێکگرتی بین و گۆت: “گەلێ کورد دەمەکە ئێکەتیا خوە دروست کریە، روودانێن ل شنگال و کۆبانێ ئەڤ راستی جارەکا دی نیشا مە دا، گەلێ مە ب ھەر رەنگەکێ خوەدان ژ ھەڤدو دەرکەڤتن، ژ ئورۆپا ھەتا رۆژھەلات و باکور و ھەرێما کوردستانێ کوردان پێکڤە دژی داعشێ ھەلویستەک نەتەوی نیشا د و لاوێن کورد بەرێ خوە دانە سەنگەرێن شەری دا بەرەڤانیێ ژ کوردستانێ بکەن، پێشمەرگە چوونە کۆبانێ و ئەو یەک ژی نیشا ددەت کو کورد بووینە ئێک و نھا دڤێت پارتێن سیاسی یێن کوردی ژی ئێکەتیا خوە دروست بکەن و گۆت: “چ دبیت بلا ببیت، ئێدی چو کوردەک قەبوول ناکەت کو پارتێن مە یێن سیاسی ژ بەر ھندەک ئەگەران دژبەریا ھەڤدو بکەت، نھا مەترسیەکا مەزن ل سەر رۆژئاڤایێ کوردستانێ ھەیە و رێککەفتنا ل دھۆکێ گەلەک گرنگ بوو، ھیڤی دکەم کو ھێزێن رۆژئاڤایێ کوردستانێ پێکڤە کار بکەن و نەھێلن تیرۆرست وەلاتێ مە خراب بکەن”.
سەبارەت ب قۆناغا ئاشتیێ و پرسا کوردی ل تورکیا ژی ئۆسمان بایدەمیر راگەھاند کو ھەرچەندە گەلەک جاران بەحسێ چارەکرنا پرسا کوردی و پرۆژێن حوکمەتا تورکیا دھێتە کرن، لێ یا راست ھەتا نھا د بیاڤێ پراکتیکی دا چو پێنگاڤێن وەسا بەرچاڤ نەھاتنە ئاڤێتن و ژ بەر ڤێ یەکێ ژی ئەڤرۆکە بێ باوەریەک مەزن د ناڤبەرا کوردان و حوکمەتا تورکیا دا دروست بوویە، چونکو دەمەکە بەحسێ چارەکرنا پرسا کوردی دھێتەکرن و چو نەھاتیە کرن و ژ بەر ڤێ یەکێ ژی ھەکە براستی تورکیا بڤێت پرسا کوردی چارە بکەت دڤێت بەری ھەر تشتەکێ نێرینا دەولەتێ ل ھەمبەر کوردان بھێتە گوھۆرین و نابیت ھێشتا وەک وەلاتیێن دەرەجە دو سەرەدەری ل گەل کوردان بھێتە کرن.
سەرۆکێ بەرێ یێ باژێرڤانیا مەزن یا ئامەدێ د دووماھیا ئاخڤتنا خوە دا ژی ئەو یەک دیار کر کو ھەکە کورد ل تورکیا نەگەھنە مافێن خوە یێن سیاسی و جڤاکی پرسا کوردی ژی چارە نابیت، ھەتا نھا ب ھزاران لاوێن کورد جانێ خوە فیدا کرینە و چو کەسەک ژی قەبوول ناکەت کو ب ھندەک درووشمان دەولەت بزاڤا خاپاندنا کوردان بکەت و گۆت: “دڤێت زۆرداریا ل سەر کوردان بھێتە راکرن و چو ئاستەنگی ل ھەمبەر پەروەردا ب زمانێ کوردی نەمینن، دڤێت سەرۆک کۆمار و سەرۆک وەزیرێن تورکیا زمانێ خوە یێ توند ل ھەمبەر کوردان بدەنە گوھۆرین و یا ھەرا گرنگ ژی دڤێت بەندێ ١٠% یێ ھەلبژارتنان ل تورکیا بھێتە راکرن، چونکو ئەو بەندە ل دژی گەلێ کورد ھاتیە دانان و ب تەمامی ل دژی دیموکراسیێ یە”.
