ئۆپۆزسيۆنا سوريا: ناھێلین ل سووریێ دەولەتەکا کوردی بھێتە راگەھاندن
ئەڤرۆ نیوز:
سەرۆک وەزیرێن حوکمەتا بەروەخت یا سووریێ کو وەک ھێزەکا مەزن یا بەرھنگاریا وی وەلاتی دھێتە نیاسین راگەھاند کو کوردێن سووریێ بزاڤێ دکەن کو دەولەتەکا کوردی ل باکورێ وی وەلاتی ئاڤا بکەن و ئەم ب چو رەنگەکێ ناھێلین کو تشتەکا وەسا روو بدەت.
ئەحمەد سالح توما سەرۆک وەزیرێن حوکمەتا بەروەخت یا سووریێ د دیدارەکێ دا ل گەل کەنالێ CNN تورک دیار کر کو پەیەدە و بورکان فرات و ھندەک ھێزێن دی پێڤکە ب بەھانا شەرێ ل دژی داعشێ بزاڤێ دکەن کو ل باکورێ سووریێ دەولەتەکا کوردی بھێتە ئاڤاکرن، ھەموو بزاڤێن وان ژی بۆ وێ یەکێ نە و مە زانیاریان دروست ل بەر دەست ھەیە کا ئەو چاوا ل سەر بەرنامەکا دارێتی کار دکەن و ئارمانجا وان راگەھاندنا دەولەتا کوردی ل سووریێ یە و گۆت: (گەلەک جاران بەرپرسێن وێ پارتیێ دبێژ کو ئەم دەولەتا کوردی ناخوازین، لێ ئەم باش دزانین کو ئەو یەک تەکتیکە و ئەو نھا لاوازن و ناخوازن کو تورکیا و گەلەک ئالیێن دی دژبەریا وان بکەن و ژ بەر ھندێ ژی گۆتنێن وەسا دبێژن، لێ ھەکە ئەو ب ھێز کەڤتن و رەوشا سووریێ ژی خرابتر لێ ھات ئەو دێ دەولەتا کوردی ل باکورێ سووریێ رابگەھینن و ئەم ب چو رەنگەکێ وێ یەکێ قەبوول ناکەین و دێ ھەلویستێ مە ژی گەلەک توند بیت).
ناڤھاتی د بەردەوامیا ئاخڤتناخوە دا ئەو یەک ژی دیار کر کو ئەم ب چو رەنگەکێ ل گەل پەیەدێ کار ناکەین و ھەکە وان بڤێت ل گەل مە ھەڤپەیمانیێ دروست بکەن ئەم وێ رەت بکەین. چونکو ئارمانجا وان دیارە. مەرەما وان ئەوە کو عەرەب، تورکمان و خەلکێن ل دەڤەرێن کوردی یێن باکورێ سووریێ دەربخینن و دەولەتا کوردی ئاڤا بکەن، چونکو ل گرێ سپی و گەلەک دەڤەرێن دی ئەو یەک ھاتیە کرن و ژ بەر ھندێ ژی ئەم نەشێین ل گەل وێ پارتیێ کار بکەین و گۆت: (مە گەلەک جاران ئەو یەک بۆ ئەمریکا و ھێزێن دی یێن نێڤدەولەتی ژی دیار کرینە، لێ ژ شەرێ داعشێ و پاراستنا وەلاتیان نھا ھێزێن ھەڤپەیمان ب رێیا ئاسمانی ھاریکاریا یەکینەیێن پاراستنا گەل دکەن و وان ژی دڤێت وێ پشتەڤانیێ بۆ خوە بکار بینن و دەولەتا کوردی راگەھینن).
سەرۆکێ حوکمەتا بەروەخت یا سووریێ ئەو یەک ژی دیار کر کو ئەو پشتەڤانیێ ل ئاڤاکرنا ھەرێمەکا ئارام ژ ئالیێ تورکیا ڤە دکەن و ھەتا نھا ژی چەندین جاران وان دیار کریە کو ب ئاڤابوونا ھەرێمەکا ئارام ژ ئالیێ تورکیا ڤە ئەو دشێن خەباتەکا مەزن ل دژی رژێمێ برێڤە ببەن و مە دیار کریە کو ژی ھەکە ھەرێمەکا وەسا ئاڤا ببیت ئەم بەرھەڤین وێ ھەرێمێ برێڤە ببەین و تورکیا ژی پاراستنا مە بکەت و گۆت: (مە چ ناکۆکی ل گەل کوردان نینن، چونکو ئەو ژی وەلاتیێن سووریێ نە و دڤێت وەک ھەموو خەلکێن دی ل سووریێ بژین. مە دڤێت کوردان ژی رۆل د ئاڤاکرنا سووریا نوو دا ھەبیت، لێ جارەکا دی دۆپات دکەم کو ئەم ب چو رەنگەکێ ناھێلین دەولەتا کوردی ئاڤا ببیت و بزاڤێن وەسا دێ مەترسیەکا مەزن بۆ پاشەرۆژا سووریێ دروست بکەن و دێ رێ بۆ کارەساتێن نوو ڤەکەن، ژ بەر ھندێ ژی یا باش ئەوە کو ھەموو خەلکێن سووریێ پێکڤە بۆ سووریایەک نوو و دیموکراتی کار بکەن، چونکو ژ بلی پێکڤەژیانێ ب چو رەنگەکێ دی ئالۆزیێن ل سووریێ چارە نابن).