ئۆپەراسیۆنا له‌شكرى ل ئدلبێ دێ بیتە ئەگەرێ کارەساتێن مرۆڤی
ئه‌ڤرۆ نيوز:
وەزیرێ دەرڤە یێ ئەلمانیا راگەھاند کو ئۆپەراسیۆنا سەربازی یا ل ئدلبێ دێ بیتە سەدەمێ قەیرانا مرۆڤی و دڤێت ئالیێن شەری ب ھەستیاری بزاڤێ بکەن و گۆت: (ھەتا ژ دەستێ مە بھێت ئەم دێ بزاڤێ کەین قەیرانا مرۆڤی ل ئدلبێ روو نەدەت و د سەرەدانا خوە یا بۆ تورکیا دا ئەز دێ ل گەل بەرپرسێن تورکیا ل سەر ڤێ بابەتێ ئاخڤم).
ھایکو ماس وەزیرێ دەرڤە یێ ئەلمانیا راگەھاند ژی کو ئەنجامدانا ئۆپەراسیۆنا سەربازی ل ئدلبێ ناھێلیت کو شەرێ ناڤخوەیی ل سووریێ ب دووماھی بھێت و گۆت: (نھا د ئاستێ نێڤدەولەتی دا بزاڤێن باش بۆ دیتنا چارەکا سیاسی ل سووریێ ھەنە و نھا دەلیڤەکا باش ژی ھاتیە پێش دا شەرێ ناڤخوەیی یێ کو ئەڤە حەفت سالن بەردەوام دکەت، ب داوی بھێت و بۆ ڤێ چەندێ دڤێت رژێما سووریێ و ھێزێن ل ھەرێمێ ھزرا خەلکێ سڤیل بکەن دا کو قەیرانەکا مەزن یا مرۆڤی روو نەدەت و ژ بەر ھندێ ژی گرنگە خوە ژ ھزرا ئۆپەراسیۆنەکا سەربازی دوور بکەن).
د داویا ئاخڤتنا خوە دا ژی وەزیرێ دەرڤە یێ ئەلمانیا راگەھاند کو ل تورکیا ھژمارەکا وەلاتیێن ئەلمانیا ھاتینە گرتن و ھەتا نھا سەدەمێ گرتنا وان دیار نینە و گۆت: (د سەرەدانا خوە یا رۆژا چارشەمبیێ دا دێ ل گەل وەزیرێ دەرڤە یێ تورکیا کۆم بم و دێ داخواز ژێ کەم دا سەدەمێ گرتنا وەلاتیێن مە ئاشکرا بکەت و دڤێت تورکیا ئێدی ژ بەر ھزرێن وان یێن سیاسی دەست ژ گرتنا وەلاتیێن مە بەردەت).
