ئیرادا كوردستانیان بۆ پرسێن نه‌ته‌وه‌یی یا لاوازه‌ !!

هه‌ر ژ سه‌رده‌مێن كه‌ڤن یێ نه‌ته‌وا كورد تا ئه‌ڤرۆ و سه‌ره‌رایی كو چه‌ندین نه‌خۆشی و كاودان و نه‌هامه‌تی و كێشه‌ و ده‌لیڤه‌ ل سه‌ر ده‌رباز بووینه‌ به‌لێ هێشتا ملله‌تێ كورد بریارا وی و ئیرادا وی یا لاوازه‌ و هنده‌ جارا نه‌ دده‌ستێن ویدا نینه‌!! به‌لكو پارتێن سیاسی و لایه‌نێن حزبی مه‌زنێن عه‌شیره‌تان ل شوونا وان بریاران دده‌ن! و زۆربه‌یی جاران ده‌مێ كێشه‌ د ناڤبه‌را لایه‌نێن سیاسیداپه‌یدا دبن زه‌ره‌رمه‌ندێ ئێكێ خه‌لكه‌ و ئه‌ڤ لایه‌نه‌ ب دژی ئێكدو خه‌لكی بكاردئینن و جادێ ل دژی ئێكودو دئێخنه‌ كاری!! هه‌كه‌ ل مێژوویه‌كا نێزیك یا ڤی ملله‌تی بزڤرین و ب تایبه‌ت ل ئه‌نفالێن سالا 1988 و پشتی شه‌ڕێ كه‌نداڤی یێ ئێكێ و سه‌رهلدانا بوهارا سالا 1991 و هه‌تا ئه‌ڤرۆ دێ بینین كو سه‌ره‌رایی وێ هاریكاریا مه‌زن ئه‌وا ل ئه‌نفالكریان هاتیه‌ كرن ژ لایێ خه‌لكیڤه‌ به‌لی ڤی ملله‌تی چ هه‌لویستن مه‌زن و چ خوه‌نیشاندنێن مه‌زن نه‌كرن كو ده‌نگڤه‌ده‌ت ل دونیایێ و جڤاكێ نێڤده‌وله‌تی ئاگه‌هداریا وان تاوانێن هۆڤانه‌ بیت یێن كو رێژێما به‌عس دژی كوردان دكرن له‌ورا تا نوكه‌ ئه‌م ل به‌گا دگه‌ریین دا بو خه‌لكی بسه‌لمینین كا چ هاتیه‌ سه‌رێ كوردان! و كا چاوا خه‌لك پێكڤه‌ ره‌ڤی و به‌ر ب سنۆرێن تركی و ئیرانێ چوو و دونیایێ هه‌میێ ب كێشا كوردان ئاخفت به‌لێ پشتی زڤرین دشیان بۆخوه‌نیشادانه‌كێ بۆ پشته‌ڤانیا مافێن گه‌لێ كورد زۆر بریارێن گرنگ ژ جهێن په‌یوه‌ندیدار ده‌ربێخێن به‌لێ نه‌كر!! خه‌لكی چ رۆل د هه‌لكرنا شه‌ڕێ براكوژیێدا نه‌بوو به‌لكو كێشه‌كا حزبی بوو و ژ چارچووڤێ خوه‌ ده‌ركه‌ت به‌لێ خه‌لكی چ رۆل نه‌بوو ژبۆ راوستاندنا شه‌ڕی كود شیا ل وی ده‌می خۆنیشادانه‌كا مه‌زن بكه‌ن و زۆریێ لایه‌نان بكه‌ن كو شه‌ڕی راگرن!! به‌لێ نه‌كر!! پشتی كه‌تنا به‌غدا ل سالا 2003 هه‌تا سالا 2005 و كونترۆلكرنا كوردان بۆ زۆربه‌یا ناوچێن كوردی كو ل وی ده‌می خه‌لك دشیا ب هه‌لویسته‌كی و خوه‌نیشادانه‌كێ هه‌ڤسه‌نگیا سیاسی ل عیراقێ بگوهۆریت و ب ته‌مامی ژ عیراقێ جودا بن به‌لێ نه‌كر!! پشتی سه‌رهلدانا كێشا ل گه‌ل به‌غدا ل ده‌سپێكا سالا 2011 تا گه‌فێن شه‌ڕی و برینا بودجێ و مووچان دیسا خه‌لكێ كوردستانێ یێ بێ هه‌لویست بوو و هنده‌ك چالاكیێن سنۆردار هاتنه‌ كرن به‌لێ ل ئاستێ پێدڤی نه‌بوون!! كو دڤیا هه‌لویست ب وی ره‌نگی بان كو عیراق هه‌ژاندبان به‌لێ ئه‌ڤ چه‌نده‌ چێ نه‌بوو!!پشتی دیاربوونا راستیا برینا بۆدجه‌ و مووچه‌یان و كه‌یسێن گه‌نده‌لیێ ب هه‌می ره‌نگان و خرابیا خزمه‌تگوزاریا و نه‌ جێبه‌جێكرنا داخوازیێن خه‌لكی ب ره‌نگه‌كێ راست و دورست دیسا خه‌لكێ كوردستانێ یێ بێ ده‌نگ بوو و چ هه‌لویست نه‌بوون!! پاشی هاتنا تومه‌تبارێ ئێكێ یێ دروستكرنا كێشان بۆ كوردستانێ كو نوری مالكی بوو بۆ سلێمانیێ و ل وی ده‌می فه‌ر بوو خه‌لكی خوه‌نیشادانێن مه‌زن كربان و رێ نه‌دابایێ بهێته‌ هه‌رێمێ دیسا هه‌ر خه‌لك یێ بێ ده‌نگ بوو و چ هه‌لویست نه‌بوون !! ئه‌ڤه‌ ژ لایێ ناڤخوه‌ ڤه‌ ژ لایێ ده‌ره‌كیڤه‌ بۆ چه‌ندین سالان و چه‌ندین جاران ئیرانێ و تركی و هه‌تا عیراقێ زیده‌گاڤی دكرن ل سه‌ر سنۆرێن كوردستانێ و مه‌ چه‌ندین شه‌هید دان ژ به‌ر تۆپبارانا وان بۆ ده‌ڤه‌رێن سنۆری ئه‌ڤه‌ زێده‌باری زیانێن مادی هه‌ر دیسا خه‌لك یێ بێ هه‌لویست بوو و ب چ ره‌نگا ئیدانا ڤێ چه‌ندێ نه‌كر ب چ چالاكیان!! ئه‌ڤه‌ و پشتی هاتنا داعش و رۆخیانا له‌شكرێ عیراقێ و داگیركرنا وێ بۆ چه‌ندین ده‌ڤه‌ر و پارێزگه‌هان و پاشی كونترۆلكرنا كوردان بۆ ده‌ڤه‌رێن كوردستانی یێن ده‌رڤه‌یی هه‌رێما كوردستانێ فه‌ر بوو ل وی ده‌می خه‌لكێ كوردستانێ به‌ری بریارا سه‌رۆكێ هه‌رێمێ خۆنیشادانه‌كا سه‌رتاسه‌ری كربا بۆ ریفراندومێ و راگه‌هاندنا ده‌وله‌تا كوردی كو دابیته‌ مه‌زنترین پالپشتی بۆ سه‌ركردایه‌تیا كوردی كو ب رژدیتر كار ل سه‌ر ڤێ چه‌ندێ كربا به‌لێ دیسا خه‌لكی چ نه‌كر و یێ بێ هه‌لویست بوو !! هۆسا دیار دبیت كو خه‌لكێ كوردستانێ ئیرادا وی یالاوازه‌ ئان دده‌ستێن ویدا نینه‌ به‌لكو حزب و عه‌شیره‌ت و لایه‌نێن سیاسی و به‌رژه‌وه‌ندیێن به‌رته‌نگ وی بء خوه‌ دئێخنه‌ كاری و ئه‌و ب كه‌یفا وان كاردكه‌ت نه‌ك ل دووڤ هزر و بیر و بۆچونێن خوه‌ كو بزانیت چ باشه‌ بۆ خزمه‌تكرنا ڤی ملله‌تی له‌ورا دبێژین هه‌كه‌ كار ل سه‌ر ڤێ چه‌ندێ نه‌ ئێته‌ كرن پرۆژێ ریفراندومێ و راگه‌هاندنا ده‌وله‌تا كوردی و كو مه‌زنترین كاره‌ ل پێشیا سه‌ركردایه‌تیا كوردی دا تووشی چه‌ندین كێشێت مه‌زن بیت و ترسا هه‌یی سه‌ر نه‌گریت !!!

کۆمێنتا تە