دێ چ کەی دا ئاڤتەزینک گەلەک کارەبێ نەمەزێخیت؟
سندس سالح سلێڤانەی:
ژبەر کارکرنا وێ یا بەردەوام ب درێژاهیا رۆژێ، ئاڤتەرزینک ئێك ژ پتر ئامێرێن مالێ یە کو کارەبێ د مەزێخیت. ب راستى، ل دویڤ پسپۆران، ئاڤتەرزینک دشێت نێزیکی 30% ژ مەزاختنا کارەبێ یا ئامێرێن مالێ پێکبینیت. دبیت باوەریێ ب ڤێ چەندێ نەئینی، لێ شێوازێ دانانا وێ کارتێکرنێ ل سەر تێچوویێن کارەبێ دکەت، و ئێك ژ هەرە خەلەتیێن بەربەلاڤ دانانا وێ ب لەزاندن ب دیوارڤەیە.
ئەڤە ژبەر وێ چەندێ یە کو ئاڤتەرزینک پێدڤی ب هاڤێتنا گەرماتیێ هەیە یا کو ژ ناڤخوەیا خۆ ڤەکێشیت. بۆ ئەنجامدانا ڤێ چەندێ، ئاڤتەرزینک پێکئینەرێن جودا یێن سیستەمێ سارکرنێ بکار دئینیت، یێن کو دبیت ل پشتێ یان ل جهێن دی بن. ب واتایەکا دی، ئەگەر ئامێرێ جهەکێ تێرا نەبیت بۆ هاڤێتنا ڤێ گەرماتیێ، دبیت ب کارامەییەکا کێمتر کار بکەت و کارەبەکا زێدەتر ب مەزێخیت.
ئەڤە ل دویڤ جورێ ئاڤتەرزینکێ جودا دبیت، و هەردەم باشترە بچی سەر رێنمایێن دابمەزراندنێ یێن کۆمپانیا چێکەر. لێ، کۆمپانیا LG ئاماژە ب وێ چەندێ ددەت کو پێدڤییە فەرەکا نە کێمتر ژ پێنج سانتیمەتران ل پشت هندەك ئاڤتەرزینکێن خۆ بهێلیت. هەروەسا رێنمایی دهێتە کرن کو ل دەف فڕنێ یان تەباخێ نەهێتە دانان، و ژ تیشکا رۆژێ یا راستەوخۆ بهێتە دویرکرن.
ئەو ب سادەیی یە: هەر چەندە گەرماتییا کو ئاڤتەرزینک تێدا دمینیت زێدەتر بیت، ب هەمان رێژە پتر پێدڤی ب هەولدانێ دبیت بۆ سارکرنا خارنێ، و ب ڤێ چەندێ پتر کارەبێ دمەزێخیت. گرنگە کو کونێن هەوادرێژکرنێ یێن ئاڤتەرزینکێ نەهێنە گرتن و ب پاقژی بهێنە هێلان، ژبەر کو خول دبیت ل سەر کۆم ببیت و رێگریێ ل هەوادرێژکرنێ بکەت.
ئاشکرایە کو پلەیا گەرماتیێ ژی کارتێکرنێ ل سەر مەزاختنا کارەبێ دکەت، لەورا رێنمایی دهێتە کرن کو پلەیا گەرمی یا ئاڤتەرزینکێ ل سەر نێزیکی 5 پلەیێن سەدی بهێتە رێکئێخستن، و بەفرگرێ (فریزەرێ) ژی ل سەر نێزیکی -18 پلەیێن سەدی، ل دویڤ رێنمایێن رێکخراوا بکاربەرێن ئیسپانی (OCU). ب جهئینانا ڤان رێنمایان دێ ئاڤتەرزینک ب کارامەییەکا زێدەتر کار کەت، و دێ رێگریێ ل بەرزەبوونا نەپێدڤی یا کارەبێ کەت.
