ئیراقێ پێدڤی ب دادگەهەكێ هەیە كو ب رێیا پشتەڤانییا مادەیا 92 یا دەستوورێ بهێتە دروستكرن
دیدار/ دلۆڤان ئاكرەیی
ئەندامەكێ فراكسیونا پارتی دیموكراتی كوردستان ل جڤاتا نوونەرێن ئیراقێ دیاركر: د ئەزموونەكا دی دا، دادگەها فیدرالی سەبارەت ب دادپەروەربوونێ ل هەمبەر هەرێما كوردستانێ یا سەركەفتی نەبوویە و پێدڤییە دادگەها بلند یا فیدرالی پشتبەستنێ ب بەرپرسیارەتییێ و دەستورێ فیدرالی بكەت.
سیپان شێروانی، ئەندامێ فراكسیونا پارتی دیموكراتی كوردستان ل جڤاتا نوونەرێن ئیراقێ ل دووڤ چەوانییا رەفتاركرنا دادگەها بلندا فیدرالی یا ئیراقێ ل گەل كێشەیێن هەرێمێ ل گەل حوكمەتا فیدرال بۆ رۆژنامەیا (ئەڤرۆ) گوت» ل دووڤ سیستەمێ فیدرالی و دەستورییێ ئیراقێ ، دادگەها بلند ل دەما دروستبوونێ كو د ناڤبەرا دو سازییێن گشتی یان تێكنەگەهشتنێ ل سەر دەقەكێ دەستوری كو پرس ئێكە ، د راستیدا ، دادگەها بلندا فیدرالی پێدڤییە پشتبەستنێ ب بەرپرسیارەتییێ و دەستورێ فیدرالی بكەت، ل دووڤ دەستور و سیستەمێ فیدرالیێ ئیراقێ ، ل دەما دروستبوونا كێشەیەكێ د ناڤبەرا حوكمەتا فیدرال و هەرێمێدا دروست دبیت، پێدڤییە دادگەها بلند رۆلێ ئێكلاكەر هەبیت ئەڤە ژی تایبەتمەندییەكا گرنگ یا دادگەهێیە بۆ رۆهنكرنا دەقێن دەستوری و بەندێن قانوونی بۆ بجهئینانا دەستوری و پارێزگاریكرن ژ سیستەمێ فیدرالی».
سەبارەت رۆلێ دادگەها بلندا فیدرالی گوت» باندۆرا ڤێ دادگەهێ بتنێ ل سەر ئاستێ یاسایی و دەستوری نینە، بەلكو كاریگەرییا سیاسی ژی هەیە، لەوما بزاڤ هاتینە كرن بكەڤیتە دبن باندۆرا دا، بتایبەتی ژی ل هەمبەر هەرێما كوردستانێ، پشتی بڕیارا تەیف سامی كو چەندین شاشییێن زق تێدا بوون، چەند فەرمانبەران ل دەستپێكا هەیڤا شەش ل دادگەها بلند سكالا تۆماركرن، بەلێ هەتا نوكە چو بڕیار ل سەر نەهاتینە دان، ئەڤێ چەندێ ژی جارەكا دی بێلایەنییا دادگەها فیدرال ئێخستە د بن پرسیارێدا، ل سیستەمێ فیدرالی هەر دەما كێشەیەك هەبیت دێ چیتە هەمبەر دادگەهێ، بەلێ پرسیار ئەوە ل ئێراقا ئەڤرۆ كو دادگەه كەڤتیە دبن باندۆرا هندەك ئالییێن سیاسیدا دێ چەوا شێت كێشەیان ب شێوەیەكێ دادپەروەرانە چارەسەركەت».
سەبارەت هەبوونا دەولەتەكا فیدرالی ل ئیراقێ گوت» ئیراق وەك دەولەتەكا فیدرالی پێدڤی ب دادگەهەكا بلند یا فیدرالی و بێ ئالی و سەربەخوە هەیە كو ب رێكا پشتەڤانییا مادەیا 92 یا دەستوری بهێتە دروستكرن».
