ئیراق ل به‌ر ده‌رگه‌هێ شه‌ڕێ ناڤخوه‌یی یە.. ئه‌رێ هه‌رێما كوردستانێ یا به‌رهه‌ڤه؟
ڕەمزی سیسۆ
ئه‌ڤرۆ ئیراق هێدی هێدی به‌ر ب بارودۆخه‌كێ نه سه‌قامگیر ڤه دچیت و دچیته ناڤ قووناغه‌كا هه‌ستیاردا و ئه‌گه‌رێ سه‌ره‌كی یێ ڤێ ئالۆزیێ ژی بڕیارا دویماهیێ یا سه‌رۆك وه‌زیرێ ئیراقێ عه‌لی زه‌یدی یه، كو بریار دایه گرۆپێن چه‌كدار، ب تایبه‌تی حه‌شدا شه‌عبی، ژ چه‌ك بكه‌ت و بێخیته د ناڤ سۆپایێ فه‌رمی دا.
ئه‌ڤ بڕیاره وه‌كی ئاگره‌كی بوو كه‌فته ناڤخۆیا ئیراقێ و دوبه‌ره‌كیه‌كا مه‌زن ئێخسته ناڤ مالا شیعه‌یان ب خوه. هه‌تا نوكه حه‌شدا شه‌عبی ب فه‌رمی ملكه‌چێ وێ بڕیارێ نه‌بوویه و ب ئاشكرا دبێژین ئه‌م ل ژێر فه‌رمانا سه‌رۆك وه‌زیران نینین. ئه‌ڤه ب خوه دهێته واته‌یا شكه‌ستنا ده‌ستهه‌لاتا ده‌وله‌تێ.
به‌لگه‌یێن سیاسی دبێژن ئه‌ڤ پێنگاڤا زه‌یدی ب هه‌ماهه‌نگیه‌كا به‌رفره‌هـ ل گه‌ل ئه‌مریكا و ئیسرائیل و سعوودیێ هاتیه هاڤێتن، ب مه‌به‌ستا زێده‌تر گه‌مارۆدانا ئیرانێ و رزگاركرنا ئیراقێ ژ بن ده‌ستێ وێ و قوتكرنا ده‌ستێ وێ ژ ئابووری و ئه‌منیا ئیراقێ.
لێ راستیه‌كا ته‌حه‌ل و مێژوویی یا هه‌یی كو نابیت ژبیر بكه‌ین، پشتی رۆخیانا رژێما به‌عس ل سالا 2003، بۆ ماوه‌یێ 23 سالان ئیرانێ ب پلانه‌كا درێژخایه‌ن هه‌می ئاماده‌كاری كرینه و تۆڕه‌كا بهێز ژ گرۆپێن لایه‌نگرێن خوه، سیاسی و سه‌ربازی و ئابووری، ل ناڤ ئیراقێ ئاڤاكرینه. ئیران ل ئیراقێ بتنێ میلیشیا نینه، به‌لكو ده‌وله‌ته‌كا د ناڤ ده‌وله‌تێ دا ئاڤا كریه. ژبه‌ر وێ چه‌ندێ ئه‌ڤرۆ گرۆپێن چه‌كدار ژ حوكمه‌تا به‌غدا ب خوه بهێزتر و پاره‌دارتر و رێكخستیترن.
د ڤی بارودۆخێ هه‌ستیار دا، پرسیارا سه‌ره‌كی و چاره‌نڤیسی ئه‌وه، ستراتیژیه‌تا هه‌رێما كوردستانێ دڤێت چ بیت؟
ب بۆچوونا من، نابیت هه‌رێم ببیته پشكه‌ك ژ ڤی شه‌ڕی. دڤێت حوكمه‌تا هه‌رێمێ سێ خالێن گرنگ ل به‌رچاڤ وه‌رگریت.
خالا ئێكێ: بێلایه‌نیا چالاك
گرنگیه‌كا زێده‌تر بده‌ته په‌یوه‌ندیێن خوه یێن نێڤده‌وله‌تی و خوه دویر ژ شه‌ڕێ مالا شیعه‌یان بێخیت. په‌یوه‌ندی ل گه‌ل واشنتن و تاران و ئه‌نقه‌ره و ریازێ ب هه‌ڤسه‌نگی بهێلین. هه‌رێم دڤێت ببیته فاكته‌رێ ئارامیێ، نه‌كو پشكه‌ك ژ هه‌ڤپه‌یمانیا كه‌سێ.
خالا دویێ: ئێكرێزیا ناڤخۆ.
دڤێت ب زووترین ده‌م په‌رله‌مانێ كوردستانێ بهێته كاڕاكرن و حوكمه‌تا نوی د ده‌مه‌كێ كورت دا بهێته پێكئینان. ئیراق ئه‌گه‌ر به‌ر ب شه‌ڕێ ناڤخۆیی بچیت، هه‌رێم نابیت بێ حوكمه‌ت و دو ئیداره بیت. دوبه‌ره‌كیا پارتی و ئێكه‌تیێ یان هه‌ر لایه‌نه‌كێ دیتر دێ بیته خالا لاوازیا مه و دێ ده‌رفه‌تێ ده‌ته دوژمنێن كوردستانێ.
خالا سێیێ: ئاماده‌كاریا ئه‌منی و ئابووری
سه‌ركردایه‌تییا كوردستانێ دڤێت بۆ هه‌می ئه‌گه‌ران به‌رهه‌ڤ بیت. گرۆپێن چه‌كدار هه‌ڕه‌شێ ل سه‌رۆك وه‌زیران دكه‌ن و ئیراق دێ تووشی مه‌زنترین قه‌یرانا ئه‌منی و ئابووری بیت. دڤێت پێشمه‌رگه ل سه‌ر سنوورێن كه‌ركووك و مووسل و خانه‌قینێ به‌رهه‌ڤ بیت، ژبه‌ركو داعش و گرۆپێن تێكده‌ر دێ هه‌ولده‌ن ڤێ ڤالاهیێ بكاربینن. ل رویێ ئابووری ژی دڤێت هه‌رێم خه‌زێنه‌كا تایبه‌ت هه‌بیت بۆ ئه‌گه‌رێ راگرتنا مووچه و بودجه‌یا ئیراق.
دبینن بارودۆخ به‌ر ب ئالۆزیێ ڤه دچیت و پرسیار ل ڤێره ئه‌وه: ئه‌رێ ئیراق دێ بیته قوربانییا ململانێیا ده‌ستێ ئه‌مریكا و ئیرانێ پشتی 30ێ ئیلۆنێ؟
به‌رسڤه‌كا كورت و پۆخته، دێ ب خوه روودانێن چه‌ند رۆژێن بهێت دیاركه‌ن، كا گرۆپێن چه‌كدار دێ ملكه‌چ بن یان ئیراق دێ چیته ناڤ ئاگره‌كی دی یێ كو ده‌ركه‌فتن ژێ ب ساناهی نابیت. ئه‌وێ دێ به‌رسڤێ ده‌ت، نه داخۆیانی یه، به‌لكو ئه‌رده.
