ئیران:دێ دەرگەهێن سنووری ل گەل هەرێما کوردستانێ ڤەکەینەڤە
ئەڤرۆ نیۆز،زنار تۆڤی:
سەرۆک ئەرکانێ هێزێن چەکدارێن ئیرانێ راگەهاند،ل ڤاا رۆژانێن داهاتیدا کێشەیێن سنووری یێن دناڤبەرا ئیران و هەرێما کوردستانێ دێ هێنە چارەسەرکرن و دێ ڤەگەرنە دۆخێ خۆ یێ ئاسایی.
محەممەد حوسێن باقری، سەرۆک ئەرکانێ هێزێن چەکدار یێن ئیرانێ، رۆژا دووشەمبی 30-10-2017 د پەراوێزا سمینارەکا سەربازیدا ل تەهرانێ راگەهاند، ئەو بەربەستێن سنووری یێن دناڤبەرا ئیرانێ و هەرێما کوردستانێ هاتینە دانان،ل ڤان چەند رۆژێن داهاتیدا دێ هێنە راکرن.
باقری دانپێدان ب هندێ کر،کو وەلاتێ وی ژ هندێ نیگەران بوویە،کو هەکە پرۆژێ دابەشبوونا عێراقێ و سەربەخۆیا هەرێما کوردستانێ بگەهیتە ئەنجامی،ئەو پڕۆژە دا هێتە ڤەگۆهاستن بۆ ئیرانێ ژی،لەورا مە سنوورێن خۆ داخستن.
وەکە کارڤەدانەک ل بەرامبەری ئەنجامدانا گشتپرسیێ، رۆژا 15 ئۆکتۆبەرێ كۆمارا ئیسلامی یا ئیرانێ هەرسێ دەروازێن سنووری یێن فەرمی (پەروێزخان و باشماخ و حاجی ئۆمەران) ل سەر هەرێما كوردستانێ داخستن،پشتی 10 رۆژان دەروازێ باشماخ هاتە ڤەکرن،بەلێ هەتاکو نوکە هەردو دەروازێن دی نەهاتینە ڤەکرن.
