ئیرانێ موشەک ژ روسیا وەرگرتن
ئه‌ڤرۆ نيوز:
حسێن جابر ئەنساری پەیڤدارێ وەزارەتا دەرڤە یا ئیرانێ راگەھاند کو کاروانێ ئێکێ یێ موشەکێن (س ٣٠٠) یێن روسیا گەھشتنە ئیرانێ کو ئەڤ موشەکە وەک موشەکێن گەلەک پێشکەفتی نە و وەک موشەکێن بەرگیریا ئەسمانی دھێنە نیاسین و گۆت: (دەمەک درێژە ئەم چاڤەرێی گەھشتنا وان موشەکان بووین، لێ ژ بەر ھندەک ئالۆزیان و گەفێن ئەمریکا گەھشتنا وان گیرو بوو بەس نھا ئەو موشەک گەھشتنە ئیرانێ و ئەم چاڤەرێ دکەین کو د دەمەکێ کورت کاروانەکێ دی ژی بگەھیتە دەستێ مە).
پەیڤدارێ وەزارەتا دەرڤە یا ئیرانێ ئەو یەک ژی دیار کر کو گرێبەستا کرینا وان موشەکان ل سالا ٢٠٠٧ ھاتیە ئیمزا کرن و ئیرانێ پارێن وان موشەکان ژی داینە و گەھشتنا وان د دەمەکێ وەسا دا کو رەوشا رۆژھەلاتا ناڤین گەلەک ئالۆزە بۆ بەرەڤانیا وەلاتێ مە گەلەک گرنگە.
ل ئالیێ دی وەزارەتا دەرڤە یا ئەمریکا د داخۆیانیەکێ دا نەرازیبوونا خوە ل ھەمبەر ھنارتنا موشەکان بۆ ئیرانێ دیار کر و راگەھاند کو ھێشتا سزایێن ل سەر ئیرانێ ب تەمامی نەھاتنە راکرن و دڤێت روسیا پێگریێ ب رێککەڤتنا ل گەل ئیرانێ بکەت و ھنارتنا وان موشەکان بۆ ئیرانێ دێ کاریگەریەکا خراب ل سەر رەوشا دەڤەرێ بکەت، چونکو پرانیا وەلاتێن رۆژھەلاتا ناڤین ئیرانێ وەک مەترسیەکا مەزن بۆ خوە دبینن و ھەتا رەوشا دەڤەرێ ئاسایی نەبیت نابیت روسیا چەکێن وەسا بدەتە ئیرانێ.
