ئیران بەرهەڤیان بۆ شەڕەکێ دەمدرێژ ل دژی ئەمریکا دکەت
رۆژنامەیەکا ئەمریکی دیار دکەت، بەرپرسێن نها یێن ئیرانێ گەلەک توندرەون و ناخوازن ل گەل ئەمریکا دانوستاندن بهێنە کرن و نها ئیران بەرهەڤیان بۆ شەڕەکێ دەمدرێژ ل دژی ئەمریکا و هەپەیمانێن وێ ل دەڤەرێ دکەت.
رۆژنامەیا وول ستریت جۆرنال یا ئەمریکی د راپۆرتەکێ دا دیار کریە، پشتی کوشتنا رێبەرێ ئیرانێ نها فەرماندارێن سوپایێ پاسداران ل ئیرانێ دەستهەلات گرتینە دەست و هەموو بریارێن چارەنڤیسساز ژ ئالیێ وان کەسان ڤە دهێنە دان، بەرپرسێن نها یێن ئیرانێ توندرەون و ل دژی ڤێ یەکێ نە کو ل گەل ئەمریکا دانوستاندن بهێنە کرن و وان دڤێت دەست ب شەڕەکێ مەزن و بەرفرەه ل دژی ئەمریکا بکەن و ژ بەر ڤێ یەکێ ژی دەمەکە ئیران یێ بەرهەڤیان بۆ ڤێ یەکێ دکەت کو حوسیێن یەمەنێ و گرۆپێن چەکدار ل ئیراقێ ئێرشی هێزێن ئەمریکا و هەڤپەیمانێن وێ ل دەڤەرێ بکەن.
هەمان رۆژنامەیێ ئەو یەک ژی دیار کریە، توندرەوێن ل ئیرانێ وەسا دبینن دشێن ب رێیا شەڕەکێ دەمدرێژ زیانێن گەلەک مەزن بگەهیننە ئەمریکا و ئەمریکا نەچار بکەن دا هەموو هێزێن خوە ژ رۆژهەلاتا ناڤین ڤەکێشیت، چونکی بەرپرسێن نها یێن ئیرانێ وەسا دبینن ب رێیا دانوستاندنان و رێککەفتنان چو دەمەکێ پرسێن هەی چارەسەر نابن و ئەمریکا دێ گاڤ ب گاڤ ئیرانێ لاواز کەت و وەسا دێ کار بۆ گوهۆڕینا رژێما نها کەت و ژ بەر ڤێ یەکێ ژی کەسێن وەکو ئەحمەد وەحیدی و فەرماندارێن دی وەسا دبینن دڤێت دەست ب شەڕەکێ مەزن و دەمدرێژ ل دژی ئەمریکا و هەڤپەیمانێن وێ ل دەڤەرێ بهێتە کرن.
ل گۆر هەمان رۆژنامێ د چەند رۆژێن بۆری دا فەرماندارێن سوپایێ پاسداران د نامەیەکێ دا بۆ رێبەرێ ئیرانێ دیار کرینە کو نابیت ب چو رەنگەکێ دەرتەنگا هورمزێ بهێتە ڤەکرن، دڤێت دەرتەنگا هورمزێ یا گرتی بیت، چونکی ئەو یەک کارتەکا گەلەک مەزن و بهێزە و دڤێت ئەو کارتە ب رەنگەکێ باش ل دژی ئەمریکا و هەڤپەیمانێن وێ بهێتە بکارئینان و ئیران دشێت ب رێیا دەرتەنگا هورمزێ زیانێن گەلەک مەزن بگەهیننە ئابووریا دوژمن و نەیارێن خوە.
د دووماهیا راپۆرتێ دا ئاماژە ب ڤێ یەکێ ژی هاتیە کرن کو ئیرانێ شیایە د دەمەکێ گەلەک کورت دا گەلەک کارگەهێن خوە یێن دروستکرنا موشەک و درۆنان نوو بکەت و ئیرانێ د دەمەکێ گەلەک کورت دا گەلەک موشەکێن بالیستی و درۆنێن نوو دروست کرینە و خوە بۆ شەڕەکێ مەزن و بەرفرەه ل دژی ئەمریکا و هەڤپەیمانێن وێ ل دەڤەرێ بەرهەڤ کریە و هەروەسا ئیران یێ ب هەموو رەنگەکێ کار بۆ دروستکرنا چەکێ ئەتۆمی ژی دکەت.
