ئیران: دێ ب هه‌موو ره‌نگه‌كێ به‌رسڤا ئیسرائیلێ ده‌ین
ئه‌ڤرۆ:
محه‌مه‌د جه‌واد زه‌ریف وه‌زیرێ ده‌رڤه یێ ئیرانێ راگه‌هاند كو ئیسرائیلێ هێرشی بنگه‌هێ ئه‌تۆمی یێ نه‌ته‌نز ل ئیرانێ كریه و ئه‌و یه‌ك ژی نیشا دده‌ت كو ئیسرائیلێ دڤێت ئاریشێن گه‌له‌ك مه‌زن بۆ ئیرانێ دروست بكه‌ت، ئیران ل هه‌مبه‌ر زێده‌گاڤیێن ئیسرائیلێ بێده‌نگ نامینیت و ده‌م یێ هاتی كو ب توندی به‌رسڤا ئیسرائیلێ بده‌ین.
ئه‌و یه‌ك د ده‌مه‌كێ دایه كو دو رۆژان به‌ری نها كه‌نالێ كان یێ ته‌له‌فزیونا ئیسرائیلێ كو د هه‌مان ده‌می دا كه‌نالێ فه‌رمی یێ ده‌وله‌تا ئیسرائیلێ یه راگه‌هاند كو بسپۆرێن ئیسرائیلی هێرشه‌كا ئه‌له‌كترۆنی كرینه سه‌ر بنگه‌هێ نه‌ته‌نز یێ ئیرانێ و نها بنگه‌هێ ئه‌تۆمی یێ ئیرانێ ژ كار كه‌فتیه.
به‌ری چه‌ند رۆژن بنیامین نه‌تانیاهۆ سه‌رۆك وه‌زیرێن ئیسرائیلێ ژی دیار كر كو ئه‌و ب چو ره‌نگه‌كێ رێ ناده‌ن كو ئیران ببیته خوه‌دان چه‌كێن ئه‌تۆمی و دێ ب هه‌موو ره‌نگه‌كێ ئاسته‌نگیان ل هه‌مبه‌ر به‌رنامێ ئه‌تۆمی یێ ئیرانێ دروست كه‌ن.
سه‌رۆك وه‌زیرێن ئیسرائیلێ داخواز ژ ئه‌مریكا ژی كر كو رێككه‌فتنا ئه‌تۆمی یا سالا ٢٠١٥ ل گه‌ل ئیرانێ كارا نه‌كه‌ت و ده‌ست ب سزادانا ئیرانێ بكه‌ت، چونكو هه‌ر دانوستاندنه‌ك ل گه‌ل ئیرانێ دێ بیته ئه‌گه‌رێ هندێ ئیران پتر ژ جاران ده‌ستێوه‌ردانێ د كاروبارێن وه‌لاتێن رۆژهه‌لاتا ناڤین دا بكه‌ت.
