ئیران ژ پێشڤەچوونا پەیوەندیێن تورکیا و ھەرێما کوردستانێ یا دلگرانە
ئەڤرۆ نیوز:
پشتی سەرەدانا سەرۆکێ ھەرێما کوردستانێ بۆ تورکیا و ئەو پێشوازیا گەرم یا کو لێ ھاتیە کرن و ئالایێ کوردستانێ بۆ جارا یەکێ د دیرۆکا تورکیا دا ھاتە بلند کرن بەرپرسێن ئیرانێ نەرازیبوونا خوە ل ھەمبەر وێ یەکێ دیار کرن و راگەھاندن کو بارزانی و تورکیا بزاڤا پارچەکرنا عیراقێ دکەن و ل ھەمبەر وێ یەکێ ژی ب ھزاران چالاکڤانێن کورد نەرازیبوونا خوە ل ھەمبەر بەرپرسێن ئیرانێ و سازیێن راگەھاندنا وان دیار کرن.
روستەم جیھانگیری ئەندامێ مەکتەبا سیاسی یا پارتی دیموکراتی کوردستان- ئیران بۆ رۆژناما ئەڤرۆ دیار کر کو سەرەدانا سەرۆکێ ھەرێما کوردستانێ بۆ تورکیا و ئەو پێشوازیا کو لێ ھاتیە کرن گوھۆرینەک مەزن بوو د دیرۆکا تورکیا دا، چونکو ئەو وەلاتێ کو ھەتا دوھی ھەبوونا کوردان قەبوول نەدکر ئەڤرۆکە ب ئالایێ کوردستانێ پێشوازی ل سەرۆکێ ھەرێما کوردستانێ کر و ئەو یەک ژی دانپێدانەکە ژ ئالیێ تورکیا ڤە ب راستیا کورد و کوردستانێ و گۆت: (مخابن ل ھەمبەر وان گوھۆرینان ھێشتا بەرپرسێن ئیرانێ ب رەنگێن گەلەک سڤک و دوور ژ بھایێن مرۆڤاتیێ سەرەدەریێ ل گەل خەلکێ کوردستانێ دکەن و چەند مالپەرێن سەر ب رژێما ئیرانێ ڤە سڤکاتی ب سەرەدانا سەرۆکێ ھەرێما کوردستانێ کرن و نەرازیبوونا خوە ل ھەمبەر تورکیا ژی دیار کرن و ئەو دبێژن کو تورکیا دخوازیت عیراقێ پارچە بکەت و ژ بەر ھندێ ژی چالاکڤانێن کورد ب رەنگێن جودا جودا دژبەریا خوە ل ھەمبەر ئیرانێ دیار کرن و د ئەنجام دا ئەو سازیێن کو سڤکاتی ب بھایێ نەتەوی یێ خەلکێ مە کربوو داخوازا لێبۆرینێ کر).
ناڤھاتی ئەو یەک ژی دیار کر کو ترسا ئیرانێ ژ ھندێ دھێت کو دێ دەولەتا کوردی ل عیراقێ ھێتە راگەھاندن و ئەو دترسن کو پشتی عیراقێ و سووریایێ دۆرا ئیرانێ ژی بھێت و دەمێ ئەم نھا بەرێ خوە ددەینە دەزگێن وان یێن راگەھاندنێ و ھەروەسا نێرینا گەلەک بەرپرسێن وی وەلاتی ئەو یەک ب رەنگەکێ ئاشکرا دیار دبیت.
ل ئالیێ دی مالپەرێ ئیرنا یێ ئیرانێ کو ب رەنگەکێ دوور ژ بھایێن مرۆڤاتیێ سڤکاتی ب جل و بەرگێن کوردی و سەرەدانا سەرۆکێ کوردستانێ بۆ تورکیا کربوو دەمێ دیتی ب ھزاران چالاکڤانێن کورد ب رێیا تۆرێن جڤاکی بەرسڤەکا توند دانە وان داخوازا لێبۆرینێ ژ گەلێ کورد کر و راگەھاند کو ئەو بابەت ژ عیراقێ ھاتبوو ھنارتن و مە بابەت راکریە و ئەم داخوازا لێبۆرینێ دکەین.
پشتی سەرەدانا سەرۆک بارزانی بۆ تورکیا گەلەک مالپەرێن فەرمی یێن ئیرانێ وەک مێھر و ئیران دبلۆماسی و چەندین مالپەرێن دی بابەت و نێرینێن چاڤدێرێن سیاسی یێن ئیرانێ بەلاڤ کرن و وان تێدا ب رەنگەکێ ئاشکرا دژبەریا خوە ل ھەمبەر تورکیا دیار کرن و راگەھاندن کو نابیت تورکیا ئالایێ کوردستانێ ل کۆچکا تورکیا دانیت، چونکو عیراق دەولەتەکا ئێکگرتی یە و ئالایێ خوە ھەیە و دڤێت ل سەرەدانێن فەرمی یێن بەرپرسێن عیراقی بۆ دەرڤە تنێ ئالایێ عیراقێ بھێتە بلند کرن و یێن کو ئالایەکێ دی بلند دکەن وان دڤێت عیراقێ پارچە بکەن و نابیت خەلکێ عیراقێ ل ھەمبەر بزاڤێن وەسا بێدەنگ بن.
مالپەرێ مێھر یێ ئیرانێ د راپۆرتەکێ دا دیار دکەت کو ھاتنا سەربازێن تورکیا بۆ عیراقێ و بلندکرنا ئالایێ کوردستانێ ل تورکیا نیشا ددەت کو تورکیا وەک دەولەت سەرەدەریێ ل گەل ھەرێما کوردستانێ دکەت و ئەو یەک ژی پێنگاڤەکا گەلەک ب ترسە و دڤێت بەرپرسێن عیراقێ ل ھەمبەر بزاڤێن تورکیا و بارزانی بێدەنگ نەمینن و نەرازیبوونا خوە ل ھەمبەر وان نیشا بدەن، چونکو نھا عیراق د شەرەکی گەلەک مەزن دایە ل دژی تیرۆرێ و دڤێت ھەموو پێکھاتێن عیراقێ پێکڤە ل دژی تیرۆرێ شەری بکەن و نەھێلن کو وەلاتێ وان بھێتە پارچە کرن.
